Read Ot Danum 1 TESALONIKA 5 Bible Online

1 TESALONIKA 5 - Ot Danum bible

1 TESALONIKA 5

¹Konduang-konduang eam porulu ihkai nyurat ahkan'kam mira ohkotoh ijo kona hal-hal rih ahkan nyolung.

² Kotului ihkam bongon kota'an honong jelas, ijo Ondou polombut Tuhan rih ahkan johcok kolou ponyilou lombut a'ang ngolomi ondou.

³Amatmira ulun nuhtui: ‘‘Paringoh aman tutang tentram,’’ mahka aang ohkot rih solenga iro ahkan tonopahas korusak tutang eam ihcobehti ka duon lolos. Hal orih ahkan nyolung songola, kolou anyam poros nganak, ijo nopahas ihcobehti bawi ijo ahkan nganak.

⁴Tahpi ihkam eamoh ulun ijo bolum ang luwang kopindong, nyiring ondou orih nokonyat ihkam, kolou polombut ponyilou.

⁵Konduang paringoh anairih ulun ijo bolum luwang koloang, ihkam barih aang hondou ijo boloang. Ihto eam ulun ijo bolum luwang kopindong ata'ai ijo barih ang ngolomi ijo pindong.

⁶Tului rih ihto eam tou tiru-tiruh iou kolou ulun bohkon. Ihto harus bosodia tutang tiruk ihto harus boloang.

⁷Aang ngolomi ondou ulun tiruh, tutang a'ang ngolomi ondou ka'a ulun monjadi bobusou.

⁸ Tahpi ihto tuh, ulun-ulun ijo barih aang hondou ijo boloang; tului rih tiruk ihto harus boloang. Ihto harus tehtep porocaya umba Tuhan tutang ngasi ulun-ulun bohkon hawoi bokoharap honong yakin, ijo Pohotala ahkan monyolamat ihto. Orihrih sonjata ijo ngolindung ihto a'ang kolahi molawan kopindong.

⁹Pohotala mitih ihto eam ahkan tonohukum, tahpi ahkan tonyolamat, nguha Tuhan ihto Yesus Kristus.

¹⁰Io mahtoi ahkan ihto mangat aang ohkot Io lombut noin — inon ihto magun bolum, inon ihto jari mahtoi — ihto dahpot bolum hihco Io.

¹¹Tului orih, kohondakoh ihkam botahtap, saling hojuhung saling hokomba'as, sama kolou ijo ihkam rahat nguai huntuh.

¹²Konduang-konduang, ihkai nyawot hawui paham, mangat ihkam morega ulun-ulun ijo bogawi ang tohun-tohun ihkam, iorih iro ijo jari tomitih bain Tuhan ahkan niting tutang ningak ihkam.

¹³Piosnguanrih iro honong sohoromat-horomatoh, tutang umba kasihsayang kotului ingat, inon ijo iro nguaioh. Bolum toturus hawui rukun.

¹⁴Ihkai nyawot ka'a. Konduang-konduang, ningakrih iou hawui kopios umba ulun ijo eam kani bogawi, tabahrih ahtoi ulun ijo pomihkoh, dohoprih ulun ijo porulu tondohop, tutang sabarrih toharep paring ulun.

¹⁵Jagarih mangat ara anai ijo malos koja'at umba koja'at. Bousaharih toturus ahkan nguan ang pios, ihcobehti ahkan ijo bohkon tutang ahkan paring ulun.

¹⁶Hondakrih ihkam turus tongojorih,

¹⁷tutang bodo'a hototurus.

¹⁸Aang kokaro koada'an, hondakrih ihkam norimakasih, kotului orihrih ijo Pohotala jolik tahkan ihkam, kolou ulun ijo bolum hihco umba Kristus Yesus.

¹⁹Ara nahan Roh Pohotala.

²⁰Ara ngohu enteng auh kabar-kabar ijo tononga bain Roh Pohotala.

²¹Kokaro ang'co harus tonguji, tutang ijo pios harus tonumbun.

²²Ngomahcurih, iou tahkan kokaro mahcam gawi ja'at.

²³Keleh Pohotala bongoi ijo nonga ahkan ihto kosanang, ngonjorian ihkam ulun ijo tu'u-tu'u bolum khusus ahkan Pohotala. Keleh Pohotala monjaga arop'kam poringoh, pios roh, homboruan, oluka behtin'kam, nyiring eam anai cahcatoh ang ohkot Tuhan ihto Yesus Kristus lombut hoduli.

²⁴Pohotala ijo jari na'ah ihkam, ahkan nguan hal orih rih kotului Io sotia.

²⁵Bodo'a ahkan ihkai, Konduang-konduang!

²⁶Botabe-tabe paring, cara mesra kolou konduang Kristen.

²⁷Ngosan kowasan Tuhan, ahku nyawot hawui paham, mangat ihkam mbasa surat tuh ahkan paring konduang ijo 'cokoporocaya.

²⁸Keleh Tuhan ihto Yesus Kristus mborehkat ihkam. Horomat ihkai, Paulus