Read Ot Danum 2 TESALONIKA 1 Bible Online

2 TESALONIKA 1 - Ot Danum bible

2 TESALONIKA 1

¹ Konduang-konduang ukup ang Tesalonika, ijo monjadi ukup ain Pohotala, Amai ihto, tutang Tuhan Yesus Kristus! Ihkai, yorih Paulus, Silas tutang Timoteus,

²moharap, keleh Pohotala, Amai, tutang Tuhan Yesus Kristus, nonga borehkat tutang kosanang ahkan ihkam.

³Konduang-konduang, ihkai toturus pahtut ngohawot torimakasih ahkan Pohotala kotului ihkam. Tutang puna kopahtutoh ihkai nguan kodorih, kotului ihkam mahi-mahi porocaya umba Kristus tutang ihkam mahi ngasi ihco umba ijobohkon.

⁴Orihrih kotuluioh ombai ihkai bopander tohou ihkam nyinong tikat ihkai masap ukup-ukup Pohotala. Honong tamam ihkai monyorihta, koloukuwoh ihkam tohtap tehen porocaya umba Kristus, ang parak tonoporos tutang ngarot ijo ihkam nyuruoh.

⁵Tutang ang ohtoi rih korinah eaminon adiloh bosara Pohotala: Ihkam jari ngarot kotului Kolunon Bohua Ain Pohotala, tutang tului orih ihkam ahkan tongohu layak ahkan nyolong nokuh luwangoh.

⁶Io ahkan monguanoh inon ijo adil, tutang ahkan mombalos kokarot ahkan ulun ijo nguan ihkam mongarot.

⁷Tutang ahkan'kam ijo uhuntuh ngarot — kodorih ka'a umba ihkai — Pohotala ahkan nonga kosoroah aang ondou Tuhan Yesus nosuluh tahkan soruga, tutang ngorinah arop-Oh hawui molehkat-molehkat Aiu ijo motong,

⁸tutang honong baho ijo ngonjelak-jelak. Io mosuluh ahkan mohukum ulun-ulun ijo eam poduli Pohotala, tutang ijo eam kani bolum sorurui umba Kabar Hinut tohou Yesus Tuhan ihto.

⁹ Ulun-ulun rih ahkan norima hukum korusak turus-jahamoh todian nokuh ruar tahkan barih Tuhan tutang tahkan kowasai-Oh ijo hajo,

¹⁰paringohrih ahkan nyolung ang ondou Io lombut noin ahkan tongohajo bain ukup-Oh, tutang ahkan tonohoromat bain paring ulun ijo porocaya. Ihkam ka ahkan anai ang louk ukup ain Pohotala rih, kotului ihkam jari porocaya umba kabar ijo ihkai ngitotoh ahkan'kam.

¹¹Orih kotuluioh ihkai toturus bodo'a ahkan'kam. Ihkai bodo'a mangat Pohotala ngonjorian ihkam layak ahkan bolum numbun kohondak-Oh; ahkan orih rih Io na'ah ihkam. Keleh Pohotala umba kowasa-Oh, molalus kojolik-Oh, ahkan nguan kopios. Tutang nyoporuna paring gawi ijo ihkam nguaioh, tului porocaya umba Kristus.

¹²Honong kodorih Tuhan ihto Yesus Kristus tonohajo bain ihkam, tutang ihkam ka tonohajo bain Yesus, kotului kopios ahtoi Pohotalan ihto tutang Tuhan Yesus Kristus.