Read Ot Danum 1 TIMOTEUS 1 Bible Online

1 TIMOTEUS 1 - Ot Danum bible

1 TIMOTEUS 1

¹ Timoteus, anak'ku ijo sojahti ang luwang Tuhan! Surat tuh tahkan ahku, Paulus, rasul Kristus Yesus ngosan poretah Pohotala, Ponyolamat ihto, tutang ngosan poretah Yesus Kristus koharap ihto. Keleh Pohotala, Amai, tutang Yesus Kristus Tuhan ihto nonga borehkat, pononganasi tutang kosanang ahkan'kam.

³Ahku jolik mangat ihko tahtap mahcon ang Epesus, kolou ius ahku nahtap ahkan'kam, ang ohkot ahku tulak nokuh Makedonia. Kotului, ang Epesus anai pira-pira ulun ijo monyiar ajaran ijo eam morong, tutang ihko harus nondorih iro.

⁴Nuhtui umba iro mangat a'ai hino rajin ngonih a'ang korimoi-korimoi, tutang sosana-sosana, asal-usul ijo eam pahtot-pahtotoh. Paringoh rih tihkas tou mpolombut kosangit iou, tutang eam mpomiar rancana Pohotala, ijo baya dahpot tongosono, nguha porocaya umba-Oh.

⁵Titun tingak'ku tuh, anairih mangat ulun dahpot ngina ahtoi ijo hinut tutang ahtoi bua ijo tu'u borasih, hawui tu'u-tu'u porocaya umba Tuhan, tutang honong kodorih iro dahpot hosita sama aropoh.

⁶Anai 'cokobagi ulun ijo jari eam bolum kolou orih hino, tutang sosat a'ang soaljawab-soaljawab ijo eam anai gunaioh.

⁷Iro kani monjadi guru-guru agama padahal iro bongoi eam paham auh-auh ijo iro hapai ata'ai hal-hal ijo iro nyorihtarih umba kodorih yahkinoh.

⁸Ihto kota'an ijo hukum agama puna pios, amat mohaparih kolouinon mustioh.

⁹Kopunaoh harus tongingat, ijo hukum tonapa eam toharep ulun pios, molekan toharep ulun polanggar hukum, bola ponyilou, ulun rusak bejad, toharep ulun bodusa, ulun ijo eam boagama, ulun cara kolunon, toharep ulun ijo pomunu amaioh ata'ai inaioh, dolang pomunu aang paringoh,

¹⁰toharep ulun-ulun kihal, bahkas ngoruh bahkas, ponahput, pobula, monjadi saksi-saksi alik, tutang inon iou ijo nguan hal-hal ijo hokolawan umba ajaran ijo morong.

¹¹Ajaran rih ihto sombangoh ang luwang Kabar Hinut ijo monyiaroh tomorocaya ahkak'ku, yorih Kabar Hinut tahkan Pohotala ijo hajo tutang harus tonara.

¹²Ahku ngohawot torimakasih ahkan Kristus Yesus Tuhan ihto. Io jari nonga koba'as ahkak'ku ahkan mohalu Io, tutang Io ijo ngohu ahku layak ahkan gawi orih,

¹³ oluka soun ahku mopitnah tutang ngoporos hawui mohina Io. Tapi Pohotala mongasih ahku, kotului ang ohkot orih ahku jaha porocaya, jadi ahku eam kota'an inon ijo ahku nguai.

¹⁴Tutang ahku malah tonopuhak umba ponongaasi Tuhan ihto. Io nonga ahkak'ku kodahpot ahkan porocaya umba Oh tutang ngasi sosama ulun. Kodahpot orih tononga ahkan ihto paring ijo jari hihco umba Kristus Yesus.

¹⁵Tu'u-tu'u morong auh tuh — bain orih pahtutrih tonorima tutang tomorocaya holowioh, ‘‘Kristus Yesus lombut nokuh kolunon tuh ahkan nyolamat ulun bodusa.’’ Tutang ahku rih ulun bodusa ijo paling ja'at.

¹⁶Tahpi justru bain kotului orih rih, Pohotala ngasi ahku, mangat Kristus Yesus duon monunjukoh paring kosabaran-Oh toharep ahku, ulun ijo paling bodusa tuh. Tutang tuh monjadi ihco sutu ahkan paring ulun ijo noin ahkan porocaya ahkai-Oh tutang dahpot pombolum sojahti tutang kototahiu.

¹⁷Pohotala, Lahca kokaron jaman, pahtut tonohoromat tutang tonotara hototurus, kotului Io ijo kototahiu, ijo eam gihtan, tutang tihkas Tukan! Amen.

¹⁸Timoteus anak'ku! Gawik'ku tuh, ahku morocayaoh umba'kam mongingat ahkan pohtoh Pohotala ijo tonuhtui bain nabi-nabi aang ukup tohou arop'kam. Kohondakrih pohtoh rih monjadi bohahti bagi'kam, a'ang kolahi ijo hinut.

¹⁹Hokolahi sambil nambit aang koporocaya ijo morong tutang umba ahtoi bua ijo borasih. Anai ulun-ulun ijo eam poduli ahkan auh ahtoi buaoh, nyiring lonyuh koporocayaan iro.

²⁰Ang marakndo iorih Himeneus tutang Aleksander. Koduo behti rih jari ahku hukum hawui nyorah iro nokuh Sehtan, mangat iro bajar ahkan tondo ngonja'at Pohotala.