Read Ot Danum 1 TIMOTEUS 3 Bible Online

1 TIMOTEUS 3 - Ot Danum bible

1 TIMOTEUS 3

¹Tu'u-tu'u morong auh tuh, ‘‘Ulun ijo jolik monjadi pohalu ukup, ngojolik ihco gawi ijo paham borega.’’

² Ihcobehti pohalu ukup harusrih ulun ijo earo kosalai, tutang tihkas ihco iou oruhoh, ngota'an nahan aropoh, pihtar, tutang tertib, io jolik norima ulun ang luwang lohpouoh, tutang tou majar ulun,

³ara ulun ijo pombusou, ata'ai ijo rajin hokolahi. Sobalikoh, io harus bolemu lembai tutang jolik ahkan kobuah. Io eam tou mahta duitan.

⁴Io harus ta'an ngahtur lohpou awuoh honong pios, tutang mondidik anak-anakoh mangat te'et, tutang io horomat ahkaioh.

⁵Tului amat ulun eam tou ngahtur lohpou awuoh bongoi koloukuwohrih io tou ngahtur ukup Pohotala?

⁶Ihcobehti pohalu ukup, eam tou ulun ijo bohua iou monjadi Kristen, tului noin io monjadi bojuhu, turus tonulut kolou Sehtan lomoi.

⁷Io harusrih ulun ijo anai aran pios a'ang ulunaro, bain amat eam kodorih, mahka io ahkan tonohina ulun, nyiring ngonyahtu nokuh pinda sokohtung Sehtan.

⁸Pondohop ang ukup harusrih ka'a ulun ijo pios tutang tulus; eam mahta duitan tutang eam jolik ngorih paham aro tuak.

⁹Iro harus nambit ba'a-ba'as umba ahtoi homboruan ijo borasih aang ajar koporocayaan Kristen, ijo jari tongorinah bain Pohotala.

¹⁰Hondakoh iro ponoriksa houn, tutang amat korinah iro earo kosalai, punanrih iro duon jadi pondohop ang luwang ukup.

¹¹Oruh iro ka harus ulun ijo hinut, eam ulun ijo jolik mandernohou desas-desus. Iro harus kota'an nahan aropoh tutang jujur a'ang kokaro hal.

¹²Pondohop ukup harus ngina tihkas ihcobehti iou oruhoh, io harus ta'an majar anak-anakoh tutang lohpou awuoh honong pios.

¹³Ulun-ulun ijo pondohop honong pios, ang luwang ukup, ahkan tonohoromat tutang monjadi mahi-mahi bohanyi bopander tohou koporocayaan iro ahkan Kristus.

¹⁴Ahku bokoharap, eam tahi hino ahku ahkan masap ihkam. Oluka kodorih, ahku nyurat ka'a surat tuh ahkan'kam,

¹⁵mangat amat ahku rakah, ihko jari ta'an koloukuwoh ihto harus bolum kolou bobuhan Pohotala, yotuh ukup Pohotala ijo bolum. Ukup jituh kolou johi tombok tutang nyuku ajaran ijo morong tahkan Pohotala.

¹⁶Eam ihcobehti ka dahpot molawan, eaminon kohajoioh rahasia agaman ihto, Io ngorinah arop a'ang tapan kolunan, tutang tongorinah morong bain Roh Pohotala, hawui gihtan bain dolang molehkat. Borihtaoh uras konahan ang tohun uhtus-uhtus, tutang Io toporocaya ang hopus kolunon tutang konahtang nokuh soruga.