Read Ot Danum 1 TIMOTEUS 6 Bible Online

1 TIMOTEUS 6 - Ot Danum bible

1 TIMOTEUS 6

¹Ulun-ulun Kristen ijo monjadi jihpon, harus ngohu ijo tuan iro pahtut tonohoromat, mangat ulun eam tou ngonjaat aran Pohotala ata'ai pongojaran ihto.

²Jihpon-jihpon ijo tuanoh ulun Kristen, eam tou mopohian tuanoh, tului iro sama-sama ulun Kristen. Malah iro koharusoh mohalu tuan iro rih honong labih pios hino, tului tuan ijo tonohaluoh umba pios orih rih uras sama-sama ulun porocaya ijo tonokasih. Koparingoh tuh harusrih ihko majar tutang ningakrih.

³Ia-iai ngajar ajaran ijo bohkon tahkanmba orih, tutang eam sotuju umba ajaran ijo morong tahkan Tuhan ihto Yesus Kristus, tutang umba ajaran agaman ihto,

⁴anairih ulun ijo bojuhu, tutang eam kota'an ino-inon! Ponyahkitoh iorih jolik bodebat tutang hojawab, tohou istilah-istilah nyiring mopolombut hiri ahtoi, kopusitoh, pitnah, hokobohu ijo eam pios,

⁵tutang hosolisih ijo eam tou ohpa-ohpah. Jalan tiruk ulun-ulun orih, jari kahput tutang earo hino komorong. Iro ngohu tou monjadi tahtou tahkan agama.

⁶Puna agama nonga koutung ijo hajo, amat ulun komo sukup umba inon ijo io anai tonginaoh.

⁷Tului earo angihcoka, ijo ihto ngomiu nokuh luwang kolunon tuh, tutang earo angihco ka, ka'a ijo dahpot ihto ngomiu nokuh ruar!

⁸Jadi amat anai ukun tutang pokahjan, orih jari sukup.

⁹Tahpi ulun ijo kani monjadi tahtou, tonihkos tutang tojorat bain bomahca-mahcam kojolikoh, ijo uong tutang ijo morusak. Kojolik-kojolik orih nguan ulun monjadi lonyuh tutang colahka.

¹⁰Kotului tahkan kasih umba duit, lombut karo mahcam koja'at. Anai 'cobagian ulun ijo hodulu duit nyiring jari eam numbun hino ajaran Kristen, turus iro tonopahas aro kokarot ijo molonyuh ahtoi'ndo.

¹¹Tahpi ihko anairih ulun ain Pohotala, jadi ihko harus ngomahcu paringoh rih. Bousaha monjadi ulun ijo morong ang mahtan Pohotala, ijo mongabdi umba Pohotala, porocaya umba Kristus, mongasih sosama, tahan a'ang kokarot, tutang sihkap bolomu lembai.

¹²Hokolahi tu'u-tu'u ahkan bolum kolou ulun Kristen, mangat ihko nyomba'an hodiah pombolum sojahti tutang kototahiu. Kotului ahkan orihrih Pohotala na'ah ihko, ang kotihka ihko ngahku ang toharep aro ulun, ijo ihko porocaya umba Kristus.

¹³ Tutang huntuh, ang toharep Pohotala ijo nonga hasong ahkan karo ang'co, tutang ang toharep Kristus Yesus, ijo nonga kosaksian ijo morong ahkan Pontius Pilatus, ahku nyawot tuh tahkanaang ihko.

¹⁴Ne'etrih umbaparing poretah orih socara brasih, tutang eam sala johcok ang ondou Tuhan ihto Yesus Kristus lombut hoduli.

¹⁵Polombut-Oh ahkan tonuhkas ang ohkot ijo metuk bain Pohotala bongoi. Io rih Pongowasa ihco-ihcooh; Io hajo, Lahca karon lahca, tutang Tuhan karon tuan.

¹⁶Iorih iou ijo eam tou tonokowasa bain popahtoi; Io bolum ang koloang ijo eam dahpot tongondoni bain iaika ka'a. Eam aro ihcobehti ulunka ijo pu'u nohto-Oh, ata'ai dahpot nohto-Oh. Ahkai-Oh horomat tutang kowasa ahkan turus-jahamoh! Amen.

¹⁷Ahkan ulun-ulun ijo tahtou ang kolunon tuh, hondakrih ihko nyawot, mangat iro ara bojuhu, tutang ara bokoharap ahkan ramui-ramui ijo eam bunggut — kolou haloh umba ponahtou. Iro harus bokoharap ahkan Pohotala, ijo nonga karon aang'co ahkan ihto honong molowi, mangat ihto komonanyamoh.

¹⁸Nyawotrih ahkan iro, mangat nunjuk kopios, ahkan aro nguan hal-hal ijo pios, murah ahtoi, tutang rajin mononga.

¹⁹Honong kodorih iro nipun ponahtou, ijo monjadi puhku ijo pios, ahkan ohkot ijo ahkan lombut. Tutang umba orih rih iro ahkan ngondahpot pombolum kototahiu, io orih pombolum ijo sojahti.

²⁰Inon ijo jari tomorocaya ahkan'mu, ngina orih pio-pios. Timoteus! Ngomahcu pander-sorihta ijo eam bogunaioh tutang soal-jawab tohou hal-hal ijo cara koliru, konohawot ‘‘Pongotaan’’.

²¹Kotului anai ulun-ulun ijo ngohawot ijo iro tepun pongotaan rih, nyiring mohiwang tahkan ajaran-ajaran Kristen ijo iro porocaya lomoi. Keleh Tuhan mborehkat Konduang-konduang! Amen. Horomat ihkai, Paulus