Read Ot Danum TITUS 2 Bible Online

TITUS 2 - Ot Danum bible

TITUS 2

¹Tahpi ihko, Titus, hondakrih ihko mongajar, ajaran ijo kona.

²Ningakrih ulun-ulun bahkas ijo ohko, mangat iro nahan aropoh, bijaksana tutang bolum kolou ulun ijo pahtut tonohoromat. Iro harus ka'a nambit aang ajaran ijo morong tahkan Pohotala, mongasih honong soporuna, tutang ngarot honong tabah.

³Kodorih ka'a hondakrih ihko ningak ulun bawi-bawi ijo oko, mangat hadat iro hotohorong umba inon ijo pahtut, bagi ulun ijo bolum khusus ahkan Pohotala. Iro eam tou mopitnah ulun bohkon, tutang eam tou kotagihan ngorih ijo mbusouoh. Iro pahtut majar hal-hal ijo pios,

⁴mangat umba orih iro dahpot mondidik bawi-bawi biou mangat nyayang bosaioh tutang anak-anak,

⁵monjadi pihtar, bolum borasih, tutang kolou inai ang lohpou kosalahoh ijo pios, ijo tunduk umba auh bosaioh. Honong kodorih eam anai ulun ijo dahpot nosala borihta tahkan Pohotala.

⁶Kodorih ka'a, ningakohrih ulun-ulun biou mangat iro monjadi ulun bijaksana.

⁷A'ang kokaron hal, hondakrih ihko monjadi sutu hadat ijo hinut. Amat ihko majar, ihko harus bujur tutang tu'u-tu'u.

⁸Haparih tuhtui-tuhtui ijo bijaksana, ijo eam duon nosalan bain ulun, mangat musuh-musuh'mu jadi mia, tului eam anai hal-hal maram ijo duon iro nuhtui tohou ihto.

⁹Jihpon-jihpon harus tunduk umba tuan'ndo, tutang ngojorih ahtoioh a'ang kokaro hal. Iro eam tou molawan,

¹⁰ata'ai nahkou. Hondakrih iro pokarah ijo iro toturus honong sihkap pios tutang te'et, mangat umba sihkap iro rih, ulun monara ajaran tohou Pohotala, Ponyolamat ihto.

¹¹Tului Pohotala jari pokarah ponongaasi-Oh, guna nyolamat paring ukup kolunon.

¹²Pononganasi Pohotala rih mondidik ihto, mangat eam hino bolum hokolawan umba kohondak Pohotala, tutang eam numbun kojolik kolunonoh. Ihto todidik ahkan bolum luwang kolunon tuh hawui ta'an nahan arop, bujur tutang te'et umba auh Pohotala.

¹³Uhuntuh ihto rahat ngindoi Ondou, ijo ihto paham mohara-harapoh rih; ang Ondou orih rih kolunon ahkan nohto kohajon Yesus Kristus, yorih Pohotala Mahahajo tutang Lahca Ponyolamat ihto.

¹⁴ Io jari moporahpah arop-Oh bagi ihto, ahkan momorodehka ihto tahkan kokaro koja'at, tutang ngonjorian ihto ihco ukup ijo morodehka tahkan dusa, tutang ijo monjadi Aiu-Oh iou, hawui ijo rajin nguan ang hinut.

¹⁵Majarohrih iou paringoh tutang ningakoh hawui pingat dolang pongonih ajaran'mu, tutang tuwi pongaroh. A'ai mohonau ihcobehti ka, nopahjah ihko pinda.