Read Ot Danum PILEMON 1 Bible Online

PILEMON 1 - Ot Danum bible

PILEMON 1

¹Konduang Pilemon, jolahan tutang sobat ihkai! Ahku, Paulus, ihcobehti ulun tohukum kotului Kristus Yesus, homboh umba konduang ihto Timoteus, nyurat surat tuh ahkan'mu,

² tutang ahkan ukup ijo hopuhpung ang lohpou'mu; ka'a ahkan konduang bawi Appia, tutang injah hihcokolahin ihto Arkhipus.

³Ihkai moharap, keleh Pohotala, Amai ihto, tutang Tuhan Yesus Kristus, nonga borehkat tutang kosanang ahkan'mu.

⁴Nyinong tikat ahku bodo'a ahku ngohawot aran Konduang tutang ngohawot torimakasih ahkan Pohotala.

⁵Bain ahku ngonih ijo Konduang tu'u-tu'u porocaya umba Tuhan Yesus tutang mongasih paring ukup Pohotala.

⁶Ahku bodo'a keleh pongonduang ihto, kolou ulun-ulun porocaya, ahkan momua kohorahti, ijo labih hajo, ngosan kokaron borehkat ijo ius ihto nginaoh kotului hihco umba Kristus.

⁷Konduang Pilemon, kasih'mu rih toharep paring ukup Pohotala, ngojorih ahku tutang nonga ngojuhung ahkak'ku! Paring ulun ukup Pohotala jari monjadi jorih tului Konduang.

⁸Bain kotului rih, kolou ihcobehti konduang ijo porocaya, ahku tou iou moretah Konduang ahkan nguan inon ijo harus Konduang nguaioh.

⁹Tahpi tului ahku ngasih Konduang, ahku tihkas nyawot iou. Ahku ihcobehti oko, tutang huntuh rahat tonahan ang luwang sipir kotului Kristus Yesus.

¹⁰ Ahku, Paulus, nyapai ihco ponyawot umba'mu tohou Onisimus anakaik'ku a'ang Kristus. Kotului ang luwang sipir tuh ahku jari nyolung amai rohanioh.

¹¹Lomoi io eam anai boguna ahkan'mu, tahpi huntuh io anai gunai, eam iou tihkas ahkan'mu, tahpi ahkak'ku ka'a.

¹²Uhuntuh ulun ijo ahku mongasihoh rih, ahku ngirim hoduli ahkan'mu.

¹³Kotu'uioh ahku jolik nahan io hihco ahku kolou tokirin ihko, mangat io tou dohop ahku, kotahin ahku tonahan luwang sipir tuh, tului mborihta Kabar Hinut tahkan Pohotala.

¹⁴Tahpi ahku eam kani nguan ino-inon, amat Konduang jaha nonga sotujuoh. Ahku labih jolik, amat Konduang nguaioh hawui rela-ahtoi bongon; ahku eam kani hojojuan'mu.

¹⁵Punatou Onisimus hombilang tahkan Konduang ahkan pondehan kotihka, mangat Konduang tou dahpot io hoduli ahkan kototahiuoh.

¹⁶Huntuh io eam baya ihcobehti jihpon ahkan Konduang; io labih tahkan orih. Io anairih samasama ulun Kristen ijo tonokasih. Io aro gunai samasino ahkak'ku, inonhino ahkan'mu! Botatu io arogunai samasino pios kolou jihpon, mahika kolou ihcobehti konduang a'ang Tuhan!

¹⁷Bain kotului orih, kotului Konduang ngohu ahku jolahan sosama Kristen, torima hoduli Onisimus monjadi kolou Konduang norima ahku.

¹⁸Amat io bosala, ata'ai anai utangoh umba ihko, nauh ahku ijo nahkung paring orih.

¹⁹Nah, piosrih ahku nyurat bongok ang ohtoi: Ahku, Paulus, ahkan molunas paringoh. (Puna eam perulu ahku mingatoh ijo Konduang bongon anaingina utang umba ahku, io rih pombolum'mu ijo bohua kolou ulun Kristen.)

²⁰Kotului rih, a'ang aran Tuhan cubalah dohop ahku, ngojorih ahtoi'ku kolou konduang ang luwang Kristus.

²¹Ahku nyurat surat tuh kotului yahkin ijo Konduang ahkan molalus inon ijo ahku nyawot. Molekan ahku ta'an Konduang ahkan nguan labih tahkan orih.

²²Pondehan rih, dohop nahtap tahkun ahkak'ku ang lohpou'mu, tului ahku harap Pohotala molalus do'a, Konduang-konduang paringoh, tutang ngomin ahku hoduli nohkuh ihkam.

²³ Epafras, ijo anai hihco ahku ang sipir tului Kristus Yesus ngirim tabeoh ahkan'mu.

²⁴ Torima ka'a tabe jolahak-jolahak'ku Markus, Aristarkhus, Demas tutang Lukas.

²⁵Keleh Tuhan Yesus Kristus mborehkat ihkam. Horomat ihkai, Paulus