Read Ot Danum IBRANI 10 Bible Online

IBRANI 10 - Ot Danum bible

IBRANI 10

¹Hukum agama Yahudi baya nonga gambaran ijo kawu-kawus, tutang hal-hal ijo hinut ijo ahkan lombut, tutang eam gambar ijo kotu'uioh tahkan hal-hal orih. Eam mustitou hukum orih dahpot nyoporuna ulun ijo lombut nyembah Pohotala tutang ngomin ponyorahan, oluka nyinong toun toturus tonyorah porahpah-porahpah ijo sama.

²Jakaauh ulun-ulun ijo nyembah Pohotala rih moro-morong jari tomorasih tahkan dusa, iro eam hino ahkan anaingina nanyam bodusa, tutang porahpah eam ahkan tonosorah hino.

³Tahpi korinahoh porahpah-porahpah ijo tonosorah nyinong toun rih, justru mopingat ulun ahkan dusa-dusan iro,

⁴bain puna dahan sahpi tutang dahan kambing dalungoh rih eam duon muhi dusa.

⁵ Orihrih kotuluioh ang ohkot Kristus nyolong nokuh kolunon, Io nuhtui umba Pohotala, ‘‘Ihko eam nohuang porahpah tutang ponyorahan; sombalikoh, Ihko jari monyodia behti bagi-Ku.

⁶Ihko eam ngilak porahpah 'jo ponahpong, ata'ai porahpah ahkan ngapun dusa.

⁷Turus Ahku nuhtui, ‘Jituhrih Ahku, yo Pohotala! Ahku lombut ahkan nguanrih kohondak-Mu, kolou ijo tonyurat tohou arop-Ku ang luwang Surat Borasih.’ ’’

⁸Sula-sulak Kristus nuhtui, ‘‘Ihko eam mohondakoh porahpah tutang ponyorah; Ihko eam ngilak ahkan porahpah ohcin ijo tonomahpong, kolou ponyorah tutang porahpah ahkan apun dusa.’’ Kristus nuhtui kolourih, oluka karo porahpah rih tonyorah numbun hukum agama Yahudi.

⁹Ulirih rih Kristus nuhtui, ‘‘Jituh Ahku, yo Pohotala! Ahku lombut ahkan monyolung kohondak-Mu,’’ Jadi Pohotala ngindiu karo porahpah ijo lomoi rih, tutang monokirioh umba porahpah Kristus.

¹⁰Yesus Kristus jari nguan inon ijo tongohondak Pohotala tutang nyorah arop-Oh monjadi porahpah. Umba ponyorahan rih, ijo konuai-Oh tihkas sino iou ahkan turus-jahamoh, ihto paring tonomuhi tahkan dusa.

¹¹ Nyinong imam Yahudi molalus gawiuoh, kolou imam nyino-nyinong ondou, tutang dulang duli Io monyorahrih porahpah-porahpah ijo sama. Tahpi porahpah-porahpah rih samasino eam dahpot ngudaprih dusa.

¹² Sobalikoh Kristus, monyorah baya sino porahpah ahkan pongapun dusa, tutang porahpah rih nyolung ahkan turus-jahamoh. Ulijari monyorahoh porahpah rih, Yesus tuot ang sila kotoun Pohotala tutang moretah sama-sama umba Io.

¹³Tutang huntuh Kristus ngindoi nyiring Pohotala nguan musuh-musuh-Oh nyembah umba Io.

¹⁴Jadi umba ihco porahpah, Kristus nyoporuna ulun-ulun, ijo jari tonomuhioh tahkan dusa.

¹⁵Tohou hal rih Roh Pohotala nongaoh ka'a kosaksian-Oh ahkan ihto. Roh Pohotala nuhtui,

¹⁶ “ ‘Jituhrih bowot ijo ahkan Ahku napa umba iro aang ondou-ondou ijo ahkan lombut,’ hion Tuhan, ‘Ahku ahkan ngina hukum-hukum-Ku nokuh luwang ahtoi iro tutang nyuratoh ko luwang tiruk iro.’ ’’

¹⁷ Pohotala ka'a nuhtui, “Ahku ahkan nolingou dusa-dusa tutang koja'at-koja'at iro.’’

¹⁸Jadi, dusa-dusa tutang koja'at-koja'at rih jari tonapunoh, mahka eam usah hino monyorah porahpah ahkan pongapun dusa.

¹⁹Nah, Konduang-konduang, kobain popahtoi Yesus rih, ihto huntuh bohanyi nyolong Ruang Palingborasih.

²⁰Yesus jari nguap ihco jalan, ijo bohua bagi ihto, yorih jalan ijo nonga pombolum. Jalan rih nguha dindingbenang, yorih behtin Yesus bongoi.

²¹Tutang ihto huntuh tepun ihcobehti Imam ijo Hajo, ijo botanggung-jawab ngosan Lohpou Pohotala.

²² Bain orih, olairih ihto ngondoni Pohotala umba ahtoi ijo tulus tutang koporocaya ijo segah; umba ahtoi ijo jari borasih tahkan pokomo ijo sala, tutang umba behti ijo jari ponorasih umba danum ijo kotining.

²³Kohondakrih ihto nambit segah aang koharap ijo ihto ngahkuoh, kobain Pohotala dahpot tomorocaya tutang Io ahkan ngonyolung bowot-Oh.

²⁴Tutang hondakrih ihto saling nohtoani, mangat saling hotonga hojuhung ahkan ngasi sosama tutang nguan hal-hal ijo hinut.

²⁵Hondakrih ihto tohtap hopuhpung hombo-homboh, tutang ara langak kolou ulun bohkon. Ihto justru harus labih te'et, saling komba'as, bain ihto ta'an ijo eam tahi hino Tuhan ahkan lombut.

²⁶Kobain amat borihta ijo morong tahkan Pohotala, jari tonyampairih ahkan ihto, tahpi ihto tahtap iou nguan dusa, hawui songaja, mahka eam anai hino porahpah hapa muhi dusan ihto.

²⁷ Ihco-ihcooh ijo anai bagi ihto, yorih noharep bosaran Pohotala tutang baho kosangit-Oh ijo ahkan mahpong ohpah ulun-ulun ijo molawan Io!

²⁸ Ulun ijo eam mone'et hukum ijo tononga bain Museh, tonohukum mahtoi, earo apun, amat ngosan kosaksian duo tolu behti, io tobukti bosala.

²⁹ Eaminon labih bahat hukuman ijo harus tongonyahtu ngosan ulun ijo nihcak-ngihik Anak Pohotala. Ulun rih ngohu hina daha bowot Pohotala, jorih popahtoi Kristus ijo ngomuhi-Oh tahkan dusa. Io mohina Roh nonga pononganasi.

³⁰ Ihto ta'an, iai Io ijo nuhtui, ‘‘Ahku ahkan malos! Ahku ahkan mohukum!’’ tutang ijo nuhtui, ‘‘Tuhan ahkan momuhtus ukup-Oh.’’

³¹Eaminon kongolioh amat ngonyahtu ang longon Pohotala Ijo Bolum!

³²Ingat rih koloukuwoh koada'an Konduang-konduang ang ohkot ijo nokalou. Ang ohkot rih, ulijari koloang Pohotala nyingah'kam, ihkam aro mongarot; tahpi ihkam tohtap molawan umba kogigih.

³³Anai wayahoh ihkam tongohina tutang tononguanrih honong eam pios ang husuk ulunaro. Anai sosinooh ka'a ihkam ahkan nginyam kokarot umba iro ijo tononguan kolourih,

³⁴tutang ihkam umba ka'a nginyam poros ahtoi ulun ijo ang sipir. Tutang kotihka paring ijo ihkam tepui tonosuwit, ihkam norima orih honong sanang ahtoi, tului ihkam ta'an, ijo ihkam magun tepun angihco ijo paling hinut, ijo ahkan botahan turus-jahamoh.

³⁵Bain kotului orih, ara putus-asa, kotului amat ihkam bokehtep porocaya, mahka anai upah ijo hajo ahkan orih!

³⁶Ihkam harus sabar, mangat ihkam duon nguan kohondak Pohotala, tutang honong kolourih norima inon jo tonobowot-Oh.

³⁷ Kotului luwang Surat Borasih tonyurat, ‘‘Tihkas honjulu iou hino mahka Io ijo ahkan lombut rih, ahkan bojoin lombut; Io eam ahkan nguhu-nguhut polombut-Oh.

³⁸Tutang ukup-Ku ijo morong ahkan porocaya tutang bolum; tahpi amat anai ang louk iro ijo undur, mahka Ahku eam ahkan sanang umbaoh.’’

³⁹Ihto tuh eam ukup ijo undur tutang lahcat. Tombalikoh, anairih ukup ijo porocaya umba Pohotala tutang ijo tonyolamatoh.