Read Ot Danum IBRANI 12 Bible Online

IBRANI 12 - Ot Danum bible

IBRANI 12

¹Nah, tohou ihto bongon, ang kodiling ihto anai aro sino saksi! Tului orih, olai ihto dian paring ijo ngombahat ihto, tutang dusa ijo turus lehket aang ihto. Tutang olai ihto honong bokehtep nyuru kosolanja ijo anai ang toharep ihto.

²Hondakrih topahjah ihto nitu umba Yesus, bain Io ijo mbolum porocayan ihto tutang mohaga tahkan pahtuk nyiring laiu. Yesus tahan ngarot, ang kahju sopolahki! Io eam poduli ijo mahtoi, ang kahju sopolahki rih anairih angihco hal ijo ngomia. Io tihkas ingat ahkan kojorih ijo ahkan tonginyam-Oh pongohuli. Huntuh Io tuot ang sila kotuon pododusan Pohotala tutang moretah hihco umba Io.

³Cuba nirukrih, koloukuwoh koporosoh Yesus noharep ulun-ulun bodusa, ijo molawan-Oh hawui kolourih sangit! Bain rih ara kuik ahtoi tutang putus asa.

⁴Kotului a'ang kolawan'kam umba dusa, ihkam jaha pu'u hokolawan nyiring harus nusuh daha.

⁵ Tutang ara nolingou tingak Pohotala tuh, ijo tononga ahkan'kam kolou anak-anak-Oh: ‘‘Anak-Ku nohtoanioh pio-pios ajaran Tuhan, tutang ara koik ahtoi amat Io nyingi ihko.

⁶Tului Tuhan mohajar nyinong ulun ijo tonokasih-Oh, tutang Io mahcat nyinong ulun ijo tonongahku-Oh kolou anak-Oh.’’

⁷Hondakrih ihkam norima pahcat tahkan Pohotala, kolou ihco ajaran tahkan ihcobehti amai. Tului inonrih, pu'u ihcobehti anak eam konohukum bain amaioh?

⁸Amat ihkam eam umba, tonohukum kolou paring anakoh ijo bohkon tuh, rimai ihkam eam anak sah, molehkan anak ijo eam sah.

⁹Ihto anaitepun amai ang kolunon. Io majar ihto, tutang ihto mohoromatoh. Nah, inonhino toharep Amai homboruan ihto ijo ang soruga, puna ihto pahtut labih nyembah umba Io mangat ihto bolum.

¹⁰Ulun oko ihto ijo ang kolunon, majar ihto tihkas aang ohkot ijo botihkas, numbun inon ijo iro nanyam pios. Tahpi Pohotala majar ihto ahkan kopios ihto bongon, mangat ihto dahpot monjadi borasih hombo-homboh umba Io.

¹¹Puna aang ohkot ihto tongajar, hukum orih eam nyanang ahtoi ihto, molekan baya ngoporos iou. Tahpi pongohino tahkan orih, bagi ihto ijo jari tongajar hukum rih, kotuluirih ihto bolum, numbun konohuang Pohotala, tutang mohasilrih pokomo mangat aang ihto.

¹² Tului rih, ngomba'asohrih longon'kam ijo bolomu, tutang tu'ut'kam ijo nohcot rih!

¹³ Nyalanrih turus ang jalan ijo rahta, mangat pa'an'kam ijo tipang rih, ara tolehcok, tahpi malah monjadi pios.

¹⁴Bousaharih, ahkan bolum ruhkun umba paring ulun. Bousaharih ka'a bolum borasih, khusus ahkan Tuhan. Tului eam ihcobehti ka dahpot nohto Tuhan, amat io eam bolum kolourih.

¹⁵ Bojagarih, ara nyiring anai ihcobehti ka ijo soluka tahkan barih kopios ahtoi Pohotala, mangat ara anai ijo monjadi kolou kombulan bosowui ang tohun-tohun ihkam nyiring polombut kosusah tutang korusak aro ulun bain sowuioh.

¹⁶ Jagarih, mangat ara anai ijo bolum kihal ata'ai eam morega hal-hal rohani, kolou ijo konuan bain Esau. Io morahkang hakoh kolou anak ijo oko, tihkas bagi ihco pikan ukun.

¹⁷ Ihkam ta'an ijo pongohino, Esau jolik dahpot borehkat rih tahkan amaioh, tahpi io tonulak. Tului sinoka umba tangihoh io ngurah jalan ngobuah kosalaioh, kosapet ahkan orih eam anai hino.

¹⁸ Konduang-konduang eam lombut noharep aangihco, kolou ijo tonoharep bain uhtus Israel lomoi. Iro noharep angihco ijo tou ngayap. Yorih Puruk Sinai honong bahooh ijo ngonjelak-jelak; iro noharep kopindong, kotinget tutang bohiu pusukmonyawung;

¹⁹iro noharep auh sorunai, tutang konahan auh tuhtui ijo hebat. Kotihka ulun-ulun Israel ngonih tuhtui rih, iro nyawot hawui paham, mangat auh rih eam pander hino ahkan iro.

²⁰ Kotului iro eam tahan ngonih poretah ijo tonyapai bain auh rih. Kotului auh rih nuhtui, ‘‘Paring ijo nigung puruk tuh, eam poduli, inon rih ohcin, ata'ai iai ka ka'a harus medak umba bahtu nyiring mahtoi.’’

²¹ Inon ijo tonohto bain ulun-ulun Israel rih, kolourih hebat nyiring Museh nuhtui, ‘‘Ahku mihkoh tutang hogenjeh!’’

²²Tombalikoh ihkam jari lombut nokuh Puruk Sion tutang Lowun Pohotala ijo bolum, io rih Yerusalem ijo ang soruga umba bokuhjan-kuhjan molehkatoh.

²³Ihkam umba ihco puhpungpulou ijo rami — puhpungpulou rih ain anak-anak pongoko ain Pohotala, ijo arai-araioh tonoliting ang luwang soruga. Ihkam lombut noharep Pohotala. Hakim paring ukup kolunon. Ihkam noharep roh-roh, karo ulun-ulun hinut, ijo jari nyolung soporuna.

²⁴ Ihkam lombut noharep Yesus, Poholat ahkan bowot ijo bohua rih; ihkam noharep daha ponalit, ijo monjamin hal-hal ijo labih hinut, tahkanumba ijo tojamin bain dahan Abel.

²⁵ Tului rih bua-buahrih, ara nyiring ihkam eam kani ngonih Io ijo pander rih. Iro ijo eam kani ngonih Io ijo jari lombut nokuh tana, tutang monyiar borihta tahkan Pohotala, eam duon mokila arop. Inonhino ihto tuh, ijo ngonih Io ijo bopander tahkan soruga! Amat ihto eam kani ngonih-Oh, Amoh ahkantou ihto duon luhput!

²⁶ Aang ohkot rih, auh-Oh nokonyat tana. Tahpi uhuntuh Io nobowot, ‘‘Sino hino, Ahku ahkan nokonyat, eam baya tana, tahpi langit ka'a.’’

²⁷Hioioh, ‘‘sino hino’’ nunjuk ijo paring kolunon ijo jari tona'oi ahkan moruguh tutang tonyaro, mangat ijo bototah, bayarih ijo eam dahpot konorukuh.

²⁸Kotului orih, hondakoh ihto ngohawot torimakasih ahkan Pohotala, kotului ihto norima tahkan Io ihco kolahca'an ijo eam dahpot tonoruhkuh. Hondakrih ihto norimakasih tutang sombayang ahkan Pohotala hawui horomat tutang mihkoh, numbun cara ijo tongojolik baiu-Oh bongoi.

²⁹ Kotului Pohotalan ihto kolou baho ijo monyaha.