Read Ot Danum IBRANI 6 Bible Online

IBRANI 6 - Ot Danum bible

IBRANI 6

¹Kotului rih, olai ihto miar nokuh polajaran-polajaran ijo labih ombu tohou kookooh pombolum Kristen, tutang ara tihkas nuneng ajas-ajas pahtuk ajaran agaman ihto. Ara ihto nokoluli hino ajaran dasar, ijo ulun harus tondo nguan hal-hal ijo eam boguna, tutang harus porocaya ahkan Pohotala,

²ata'ai ajaran dasar tohou popondus ata'ai tohou ngahtang longo ngosan ulun, ata'ai tohou bolum hoduli limbah mahtoi, ata'ai hukuman ijo kototahiuoh.

³Olairih ihto, jahka Pohotala nongaijinoh miar nokuh ajaran-ajaran ijo labih ombu!

⁴Tului ulun-ulun ijo jari murtad, eam harapan toniting hoduli. Iro lomoi jari anaimohcon ang luwang koloang tahkan Pohotala, tutang jari nginyam ponongan Aiu. Iro jari ka'a umba konowasa bain Roh Pohotala.

⁵Iro kota'an tahkan pongalaman iro, ijo auh Pohotala rih hinut, iro jari nginyam pononga-pononga ijo tuwi kowasa tahkan jaman ijo ahkan lombut.

⁶Tahpi uliorihrih iro murtad! Umah harapan niting iro buli ahkan hubah hino, tahkan dusa-dusan iro. Kotului iro rahat nyopolahki hino Anak Pohotala tutang nguan Io tonohina ang toharep ulunaro.

⁷Tana ijo nomot danum uhjan, ijo bojoin nosuluh nokuh ngosanoh, turus polombutbua kombulan-kombulan ijo boguna ahkan ulun ijo manggawioh, tana rih tomborehkat bain Pohotala.

⁸ Tahpi amat tana rih polombutbua tingan tutang tumbu ruwut duhi, mahka tana orih eam anai gunai tutang noin ahkan tonulut bain Pohotala tutang laiuoh tonyaha lingis.

⁹Tahpi Konduang-konduang ijo ahku ngasihoh, olu sinoka ihkai nuhtui kolourih, tahpi ihkai yakin tohou ihkam. Ihkai yakin ijo ihkam ius monorima hal-hal labih pios, iorih borehkat-borehkat ijo kolou bagian tahkan kosolamat'kam.

¹⁰Pohotala eamoh Pohotala ijo eam adil. Io eam nolingou, inon ijo ihkam nguairih bagi-Oh, tutang asi ijo ihkam nunjukrih ahkai-Oh, angohkot ihkam dohop konduang-konduang samakoporocaya, ijo houn tutang uhuntuh.

¹¹Ihkai jolik sino, mangat ihkam nyinong-behti turus bosomangat johcok laiu, nyiring ihkam norima inon ijo ihkam moharap-harapoh rih.

¹²Ihkai eam kani, ihkam monjadi nohkas. Tahpi ihkai jolik, mangat ihkam bolum kolou ulun-ulun, ijo norima inon ijo nobowot Pohotala, tului porocaya umba Io, tutang tului ngindoi honong kosabar.

¹³Kotihka Pohotala nobowot ahkan Abraham, Io bonulut ijo Io ahkan monguan inon ijo jari tonobowot-Oh. Tutang tului eam anai ijo labih isung tahkanumba Pohotala, mahka Io botulut ang arop-Oh bongoi.

¹⁴ Io nuhtui, ‘‘Ahku nobowot ahkan mborehkat Ihko tutang ngonjorian lihit'mu monjadi aro.’’

¹⁵Abraham ngindoi honong sabar, mahka io norima inon ijo jari tonobowot ahkaioh.

¹⁶Amat ulun botulut, io botulut ngosan aran ulun bohkon ijo labih isung tahkanumba io, mahka tulut rih nondo kokaro kopaut.

¹⁷Pohotala kani nuhkasrih ahkan ulun-ulun ijo norima bowot-Oh, ijo Io eam ahkan ngubah rancana-Oh. Orihrih kotuluioh Io ndahang tulut aang bowot-Oh rih.

¹⁸Duo hal orih eam dahpot boubah, Pohotala eam harapan ngobalik tohou bowot tutang tulut-Oh. Tului orih, ihto ijo jari bokolindung aang Pohotala, tononga juhungan ba'as, ahkan nambit tehen aang koharap ijo tohampar ang husuk ihto.

¹⁹ Koharap ihto rih, kolou sauh ijo tokelem paham timbon tutang monjadi ponambit ijo segah tutang sanang ahkan pombolum ihto. Koharap rih morutat dindingbenang, Ruang Ijo Mahaborasih ang Lohpou Tuhan ang soruga.

²⁰ Yesus jari nandang jalan nokuh unuk rih ahkan ihto, tutang jari nyolong nokuh anan, monjadi Imam Hajo ahkan ihto, ahkan turus-jahamoh, kolou Imam Melkisedek.