Read Ot Danum 1 PETRUS 3 Bible Online

1 PETRUS 3 - Ot Danum bible

1 PETRUS 3

¹ Kolourih ka'a ihkam, oruh-oruh, pahtut minda auh bosai, mangat amat ang tohun ihkam anai, ijo eam porocaya ahkan borihta tahkan Pohotala, hadat dasar'mu duon nguan iro monjadi porocaya. Tutang eam porulu ihkam nuhtui ino-inon ahkan iro,

²kotului iro nohto hadat dasar'mu ijo hinut tutang saleh.

³ Ara kobohinoi'mu tihkas bohinoi'mu ang ruar, kolou tindungoh, ndare balou, ata'ai hapa pokahjan ijo hajo regai.

⁴Tombalikoh, hondakrih kobohinoi'mu lombut tahkan luwang ahtoi, budi basa ijo bolomu luwah tutang teneng; orih rih kobohinoi abadi ijo paham borega numbun ponopahjah Pohotala.

⁵Umba cara tuhrih ang jaman houn bawi-bawi boagama ijo porocaya umba Pohotala, mompohinoi aropoh hawui tunduk umba bosai iro.

⁶ Sarah ka, kolourih ka'a, io te'et umba Abraham, tutang ngohawot io tuanoh. Konduang huntuh, anairih anak-anak Sarah, amat ihkam nguan hal-hal ijo hinut, tutang eam mihkoh umba iai ka.

⁷ Tutang ihkam ka'a, bosai-bosai, hondakrih bolum honong tuwi umba pongosono toharep oruh'mu, tutang hawui borondong ijo iro anairih barih ijo bolomu. Horaguohrih iro hawui horomat, tului iro hihco umba ihkam, ahkan norima ponongan pombolum ijo sojahti tahkan Pohotala. Nguan ohrih tuh, mangat eam anai ijo mohalang do'ako.

⁸Kolopuhtaioh iorih; hondakrih Konduang-konduang soiyoh sotutui tutang hihco-nanyam. Hondakrih ihkam saling ngasi-sayangoh kolou ulun-ulun ijo hokonduang. Tutang hondakrih ihkam saling hobalos-ngasihan rih, tutang sikap randah ahtoi.

⁹Ara malos koja'at umba koja'at, ata'ai cahci-mahki umba cahci mahki; sobalikoh malos rih umba nyawot borehkat tahkan Pohotala. Bain Pohotala na'ah ihkam, justru mangat ihkam norima borehkat tahkan umba-Oh.

¹⁰ Ang luwang Surat Borasih tonyurat koloutuh, ‘‘Ulun ijo kani monginyam pombolum tutang kani monyuru ondou-ondou ijo pios, harus mohaga nyamaioh mangat eam momanderoh hal-hal ijo ja'at tutang eam ngohawotoh hal-hal ijo alik.

¹¹Io harus ngomahcuoh ijo ja'at tutang nguanohrih ijo pios; hondakrih io kolahi tu'u-tu'u ahkan mondahpot kobuah.

¹²Kotului Tuhan toturus nohtoani ulun-ulun ijo numbun konohuang-Oh, tutang Tuhan toturus ngonih do'a-do'a iro; tahpi Tuhan molawan ulun-ulun ijo nguan koja'at.’’

¹³Iairih ijo kani nguan koja'at ahkan'mu, amat ihkam sanang nguan kopios?

¹⁴ Tahpi sinoka ihkam harus ngarot kotului nguan hal-hal ijo hinut, ihkam botuah! Ara mihkoh umba iai ka, tutang ara kowatir.

¹⁵Tahpi ang luwang ahtoi'mu, hondakrih ihkam nunga ahkan Kristus kohoromatan ijo khusus, ijo tohorong umba ponuot-Oh, kolou Tuhan. Tutang hondakrih ihkam toturus bosodia, ahkan nonga auhputah ahkan nyinong ulun, ijo ngisok tohou koporocaya ijo ihkam nginaoh.

¹⁶Tahpi nguanohrih honong bolomu luwah tutang horomat. Tutang hondakrih ahtoi bua'mu borasih, mangat amat ihkam tonopitnah, kotului ihkam bolum hawui hinut kolou murid Kristus, mahka ulun ijo mopitnah rih ahkan monjadi mia bongoi.

¹⁷Labih pios ngarot kotului nguan hinut — amat orih anairih kohondak Pohotala — tahkanumba karot kotului nguan ijo ja'at.

¹⁸Kotului Kristus bongoi mahtoi tihkas sino iou, ahkan turus-jahamoh kotului dusan kolunon — ihcobehti ijo eam bosala, mahtoi ahkan ulun ijo bosala. Kristus nguan ohrih rih, mangat Io dahpot nihting ihkam nokuh Pohotala. Io tomunu socara behtiuoh, tahpi tonombolum hoduli socara rohani.

¹⁹Aang koada'an rohani Io tulak monyiar borihta tahkan Pohotala ahkan roh-roh ijo tonosipir:

²⁰ yorih roh, ulun-ulun ijo eam te'et umba Pohotala ang jaman Noah. Ang ohkot orih, Pohotala ngindoi honong sabar, kotahin Noah nguan bonamaoh. Tihkas ulun-ulun ijo ang bonama iou — paringoh jalu behti — ijo tonyolamat nguha danumsuhu hajo rih.

²¹Nah, kojodian rih kolou tindung, tahkan pompondus ijo huntuh monyolamat ihkam. Pompondus tuh, eamrih ihco upacara momuhi behti tahkan paring ijo kojilo-jilok, molekan kolou bowot'mu umba Pohotala tahkan ahtoi bua ijo pios. Pompondus rih monyolamat ihkam kotului Yesus Kristus, jari bolum hoduli tahkan popahtoi,

²²tutang jari nuhkat nokuh soruga. Huntuh Io bokowasa hihco umba Pohotala, tutang moretah paring molehkat, paring pongowasa honong paring koba'as.