Read Ot Danum 2 PETRUS 1 Bible Online

2 PETRUS 1 - Ot Danum bible

2 PETRUS 1

¹Konduang-konduang ijo tu'u-tu'u porocaya kolou ihkai! Yesus Kristus iorih Pohotala, tutang Lahca Ponyolamat ihto, nguandahpot ihto porocaya umba Io, tului Io monguan ijo morong. Surat tuh tahkan Simon Petrus, ijo behti jihpon tutang rasul Yesus Kristus.

²Keleh Pohotala nonga borehkat tutang kosanang ahkan'mu hawui momurai, bain ihkam ngosono Pohotala tutang Yesus, Tuhan ihto.

³Pohotala jari hapan kowasa ko-Pohotalai-Oh, ahkan nunga ahkan ihto karo aang'co ijo porulu ahkan pombolum bosombayang. Io nguan tuh, nguha inon ijo ihto kota'aioh tohou Yesus Kristus, ijo ius na'ah ihto ahkan nginyam kohajoi tutang kopios-Oh.

⁴Umba cara orihrih Pohotala monyarah ahkan ihto, borehkat-borehkat ijo paham luar biasa, tutang borega ijo jari tonobowot-Oh. Umba borehkat-borehkat rih ihkam duon tokuwat tahkan kojolik-kojolik ja'at, ijo morusak ang kolunon tuh, tutang ihkam norima sipat Pohotalai.

⁵Bain kotului orih bousaha tu'u-tu'u, mangat ihkam tehtep porocaya umba Kristus tutang koporocaya'mu rih, tonyukah bain pombolum ijo pios. Ang bambai pombolum ijo pios, ihkam porulu monjadi ulun ijo anai pongotaan,

⁶tutang ang bambai pongotaan, ihkam harus ka'a dahpot mongowasa arop. Tutang bohkonumba dahpot mongowasa arop, hondakrih ihkam ka'a momupuk arop, ahkan tabah noharep kokaron aang'co. Ang bambai tabah noharep kokaron aang'co, ihkam harus ka'a bolum numbun konohuang Pohotala.

⁷Tutang bolum numbun konohuang Pohotala harus ka'a tonyukup umba kasihsayang'kam umba konduang-konduang ihcokoporocaya. Koturus-Oh hondakrih kasihsayang ahkan konduang-konduang ihcokoporocaya, ndahang umba ngasi toharep paring ulun.

⁸Paringoh rih anairih sipat-sipat ijo ihkam poroluoh. Amat sipat-sipat orih anai a'ang ihkam hawui momurai, ihkam ahkan monjadi giat tutang bohasir, tutang kosono Yesus Kristus Tuhan ihto honong labih pios hino.

⁹Tahpi ulun ijo eam anaingina sipat-sipat rih, topahjahoh pihcik; io eam tou nohto, tutang io nolingou ijo dusa-dusaoh ijo tokalou jari tonomuhi-Oh.

¹⁰Kotului orih, Konduang-konduang, bousaha iou labih ba'as mangat ta'ah Pohotala tutang pitih-Oh ngosan arop'mu rih monjadi mahi segah. Amat ihkam nguan rih, ihkam eam ahkan murtad.

¹¹Umba kolourih ihkam ahkan tononga hak tuwi ahkan nyolong Kolahca'an ijo kototahiu tahkan Tuhan tutang Lahca Ponyolamat ihto Yesus Kristus.

¹²Tului orih, ahku toturus nonga mopingat'kan ihkam tohou hal kolourih, oluka ihkam ius ngota'aioh tutang porocaya samasino ahkan ajaran tahkan Pohotala ijo jari ihkam torima rih.

¹³Kotahin ahku magun bolum, ahku komo pahtut mopingat'kan ihkam, ahkan hal-hal orih.

¹⁴Bain ahku ta'an ijo eam tahi hino ahku ahkan nohtah kolunon tuh, kotului Tuhan ihto Yesus Kristus jari nyorihtaoh hawui jelas umba ahku.

¹⁵Mahka ahku ahkan bousaha, mangat uli ahku palus ka, ihkam toturus mingat hoduli hal-hal tuh.

¹⁶Ang ohkot ihkai momborihta ahkan'kam, eaminon kohajoioh polombut Tuhan ihto Yesus Kristus, ihkai eam bohahpang aang dongeng-dongeng kabar-alik bain kolunon. Kohajon Yesus Kristus rih jari ihkai nohtooh umba mahta kuhung bongon.

¹⁷ Ihkai anai ang anan, kotihka Io tohoromat, tutang tonohajo bain Pohotala, Amai. Ang ohkot rih konahan auh tahkan Ijo Mahahoromat ijo homouh umba Io, ‘‘Tuhrih Anak-Ku ijo Ahku ngasih-Oh. Io ngonjorih ahtoi-Ku!’’

¹⁸Ihkai bongon ngonih auh orih ijo lombut tahkan soruga, kotihka ihkai anai homboh Io, ang isun puruk ijo borasih rih.

¹⁹Orih kotuluioh ihkai labih yahkin hino umba pohtoh Pohotala ijo tonujum bain nabi-nabi. Kopiosoh ihkam nohtoani pohtoh rih, kotului pohtoh rih kolou sumbu ijo nyingah ang unuk ijo pindong, nyiring kaloang ngorolondang tutang kotarang potion tahkan timur nyingah ang luwang ahtoi'mu.

²⁰Mambahtang samasino, hondakrih ihkam ingat tuh; pohtoh Pohotala ijo tonyapai bain kokaron nabi eam tou tonafsir numbun tiruk bongon.

²¹Tului eam pu'u, pohtoh tahkan Pohotala tomborihta tihkas numbun konohuang ulun. Tahpi Roh Pohotala mongowasa ulun rih, ahkan monyiar pohtoh tahkan Pohotala bongoi.