Read Ot Danum 2 PETRUS 2 Bible Online

2 PETRUS 2 - Ot Danum bible

2 PETRUS 2

¹Ang ohkot ijo tokalou, ang louk ukup Pohotala, jari lombut nabi-nabi polasu. Kolourih ka'a ang marak ihkam, ahkan lombut guru-guru polasu. Iro ahkan moposolong ajaran-ajaran ijo eam tu'u, ijo morusak ulun. Tutang iro ahkan ngorana Pongowasa ijo jari moliwus iro. Honong kolourih, iro mopolombut korusak ngosan aropoh bongoi, ijo ahkan nopahas iro hawui jion.

²Oluka kolourih, aro ulun ahkan nutut cara pombolum guru-guru polasu rih, ijo tongowasa bain kojolik bolai iro. Tutang gawin guru-guru rih ahkan nguan aro ulun motanah Jalan Komorong ijo nitu ahkan Pohotala.

³Tului iro bokuhu, mahka guru-guru polasu rih ahkan monyorihta ahkan'kam sorihta-sorihta ijo tonongarang bongoi ahkan ngomin utung tahkan ihkam. Tahpi bosara ahkan monopahas hukuman ahkan ngosan iro jari tahi tonyodia, tutang korusak jari tonahtap ahkan iro, rahat ngindoi iro.

⁴Molehkat-molehkat ijo bodusa ka'a eam Pohotala mohanau liwus tahkan hukum, molekan tongondian ahkan luwang norahka. Iro ponosolong ahkan luwang guha ijo pindong, ahkan tonahan ang anan nyiring Ondou Ponosara.

⁵ Kolourih hino umba kolunon jaman ijo lomoi. Pohotala eam mohonau liwus tahkan hukum. Pohotala ngirim danumsuhu hajo nokuh kolunon, ulun-ulun ijo ja'at ang ohkot rih. Tihkas Noah homboh umba pihtu behti bohkonoh iou, ijo tonyolamatoh, Tului Noah monyiar kabar tohou pombolum ijo ngojorih ahtoi Pohotala.

⁶ Sama ka'a haloh umba lowu Sodom tutang Gomora; Pohotala polumusoh lowu-lowu rih umba baho, mangat monjadi sutu, tohou inon ijo ahkan nyolung, ahkan ulun-ulun ijo ja'at.

⁷ Tahpi Lut tonyolamat, tului io numbun konohuang Pohotala; io paham ngarot, kotului hadat ijo eam sononoh tahkan ulun-ulun bejad.

⁸Ang tahun-tohun ulun-ulun somahcam orih, Lut ijo pios rih bolum umba homboruan tonosiksa, tului nyinong ondou io nohto tutang ngonih gawin-gawin iro ijo ja'at.

⁹Jadi, Tuhan ta'an, koloukuwoh nyolamat'kan ulun-ulun ijo numbun konohuang-Oh, amat iro noharep tihkos-tihkos. Tutang Tuhan ngota'an, koloukuwoh ngina ulun-ulun ijo ja'at ahkan tonosiksa ang Ondou Ponosara,

¹⁰khususoh ulun-ulun ijo numbun kojolik-kojolik bolai iro ijo kojilok tutang ijo mohina kowasan Pohotala. Kolourih kohanyi tutang kojuhuoh guru-guru polasu rih nyiring iro eam teka-tekan mohina dolang aangbolum ijo tonohoromat ang soruga ka!

¹¹Rahatrih molehkat-molehkat ijo mahcu koba'asoh tutang kowasaoh tahkan guru-guru polasu rih eam ndawa dolang aangbolum ijo tonohoromat rih, umba auh-auh pohina ang toharep Tuhan.

¹²Tahpi guru-guru rih eam inon! Iro kolou ohcintana ijo konanak ahkan tonawan tutang tomunu iou. Iro eam bopikir, tahpi baya nguai numbun pokomo iou, nyiring iro nyarang hal-hal ijo eam ngosonooh umba auh-auh pohina. Kotului orih, bain karon-gawin iro bongoi, iro ahkan rusak kolou ohcintana-ohcintana bosiak.

¹³Kolou palos ngosan karot ijo jari iro kotuluioh, iro ahkan ngarot koporos. Bagi iro, hal ijo nyanang ahtoi iorih nguan inon iou, ang tohun ondou, ahkan meda konohuang behtin iro. Amat iro tuot hombo-homboh ihkam a'ang pesta kuman, cara iro kojilok, kotului iro bobusou bain kojorik bolai.

¹⁴Iro eam peda-peda nguan dusa, tutang kojolik iro iorih nopahjah bawin sundal. Tutang ulun ijo punai porocaya, tutang magun kurang yakin, iro jorat. Ahtoi iro jari pahtuh umba kokuhu. Iro anairih ulun-ulun ijo tonulut!

¹⁵ Tului iro eam kani nitoi jalan ijo morong, mahka iro sosat. Iro ngomin jalan ijo tonitoi bain Bileam anak Beor lomoi. Bileam orih jolik samasino dahpot duit, tahkan gawiou ijo ja'at.

¹⁶Tahpi io dahpot tingak ijo paham toharep koja'atoh rih, kotihka keledaioh pander hapa auh ulun. Mahka nabi rih tohojojuan ahkan nondo gawiouoh ijo gila rih.

¹⁷Guru-guru polasu rih, anai kolou mahtan danum ijo tohjah, tutang kolou ombun ijo tonahpi bain bahiu blowut. Pohotala jari monyodia bagin iro, ihco unuk ijo paham pindong.

¹⁸Iro nguan korinah-korinah ijo tama-tamam tutang buang; bolaiusi ijo nyundal orih hapan bain iro, mangat nombohos ulun-ulun ijo punai iou nopara toliwus tahkan barih ulun ijo bolum lahcat.

¹⁹Guru-guru polasu rih, mbowot komorodehka ahkan ulun-ulun rih, rahatoh iro bongoi nohojihpon bain kopahtuh-kopahtuh ijo morusak ulun. Tului amat ulun tonokalah bain angihco, mahka io jihpon tahkan ijo mopokalahoh rih.

²⁰Ulun ijo ngosono Tuhan tutang Ponyolamat ihto Yesus Kristus, jari morodehka tahkan kowasan-kowasan kolunon ijo nyowui ulun. Tahpi amat pongohino io tojorat huli, nyiring tonokalah bain kowasa-kowasa rih, mahka akibat ulun rih ang laiuoh, labih ja'at tahkan io hounumbaoh.

²¹Labih pios ulun-ulun somahcam rih eam pu'u ngosono jalan komorong tahkan Pohotala, tahkanumba iro ngosonooh, tahpi pongohuli eam kani nutut poretah-poretah ijo tononga Pohotala ahkan iro.

²² Inon ijo iro nguaioh, mombukti komorong paribasa tuh, ‘‘Asu ahkan kuman hoduli inon ijo jari tonguhtaoh,’’ tutang ‘‘Urak ijo jari tonopondusoh, ahkan huli ngolobangan ang luwang luhtak.’’