Read Ot Danum 2 PETRUS 3 Bible Online

2 PETRUS 3 - Ot Danum bible

2 PETRUS 3

¹Konduang-konduang ijo ahku sitaoh! Tuhrih surat'ku ijo koduo ahkan'kam. Ang luwang koduo surat tuh ahku bousaha ngomonyun tiruk-tiruk ijo borasih aang ihkam.

²Ahku nyuhumopingat mangat ihkam bingat, ahkan auh-auh ijo lomoi tonohawot bain nabi-nabi Pohotala, tutang poretah-poretah tahkan Tuhan, Lahca Ponyolamat, ijo tonyorihtaoh ahkan'kam nguha rasul-rasul.

³ Sula-sulakoh ihkam harus ngota'an, ijo aang ondou-ondou laiu, ahkan lombut ulun-ulun ijo pombolumoh konowasa bain kojolik bolai iro bongoi. Iro ahkan hololea ihkam

⁴honong nuhtui koloutuh, ‘‘Hioioh, Tuhan nobowot ahkan lombut! Uhuntuh umoh Io? Amai-amai tahtu ajuh lomoi jari palus, tahpi kokaron-karonoh magun sama iou kolou tahkanuhun tona'oioh pindalangit!’’

⁵ Iro ha'atoh eam kani ngahku ijo sounlomoi Pohotala, naoi langit tutang tana ngosan auhoh. Tana ngojadian-Oh tahkan danum, tutang umba danum,

⁶ tutang umba danum ka'a — yorih danum tahkan ba'ah hajo — kolunon sounlomoi rih tonorusak.

⁷Tahpi langit tutang tana ijo anai uhuntuh, tonohaga bain auh Pohotala, rih ka'a ahkan tongondian umba baho noin. Uhuntuh langit tutang tana magun tonohaga johcok aang ondou ulun-ulun ijo ja'at tonohukum tutang tongondian.

⁸ Tahpi konduang-konduang'ku, ihco hal tuh ararih ihkam nolingouoh ijo aang topahjah Tuhan, ihco ondou eam aro kobohkoi umba sokuhjan toun — koduo-duooh sama iou bagi-Oh.

⁹Tuhan eam borahkah nonga inon ijo jari tonobowot-Oh, oluka anai ihco ngohu kolourih. Sobalikoh Io sabar toharep'kam, kotului Io eam kani ihcobehti ka rusak. Io jolik mangat paring ulun hubah tahkan dusai-dusaioh.

¹⁰ Tahpi Ondou polombut Tuhan ahkan johcok kolou ponahkou. Ang Ondou rih, langit ahkan dilap honong auh ngorutung, tutang ramun-ramun ang langit ahkan lingis bosaha, tutang tana hawui paring ijo anai ang luwangoh ahkan dilap.

¹¹Kotului paringoh rih ahkan tonolonyuh umba cara ijo kolou rih, koloukuwohrih koharusoh ihkam bolum? Ihkam pahtut bolum borasih, tutang khusus ahkan Pohotala,

¹²kotahin ihkam ngindoioh tutang morinduoh polombutoh Ondou Pohotala. Aang Ondou rih langit ahkan opah bosaha, tutang tului kopodioh, mahka ramu-ramu ijo ang langit ahkan lonyuh.

¹³ Tahpi ihto ngindoi inon ijo jari tonobowot Pohotala, yorih langit ijo bohua, tutang tana ijo bohua, ang amoh sombang koadilanoh.

¹⁴Kotului orih, Konduang-konduang ijo tonosita, pondehan ihkam ngindoi Ondou rih, bousaha tu'u-tu'u ahkan bolum borasih tutang earo kosalai ang toharep Pohotala. Tutang mohaga kohihco ijo hinut umba Pohotala.

¹⁵Ngohurih kosabar Tuhan ihto kolou kosapet ijo tononga-Oh ahkan'kam, mangat dahpot solamat. Paulus, konduang ihto ijo tonokasih, jari nyurat ijo kolourih ka'a ahkan'kam. Io nyurat rih umba kopihtaran ijo tononga Pohotala ahkaioh.

¹⁶A'ang paring suratoh, Paulus turus nyurat tohou hal orih. Puna anai pira-pira hal rih ijo bohali tongumang luwang surat-suratoh rih. Tutang bagian orih tomutar-balik bain ulun-ulun ijo eam ngota'an ino-inon, tutang ijo eam segah koporocayaoh. Hal orih earo mohelan, kotului tahkan bagian-bagian bohkon, tahkan Surat Borasih tononguan kolourih ka'a bain iro. Inon ijo iro nguai orih tihkas ngojorian kolonyuh iro bongoi.

¹⁷Tahpi ihkam, Konduang-konduang ijo tononyita, ius ngota'an tohou hal rih. Kotului rih, bojaga-jaga iou, ara nyiring ihkam toomin-omin nokuh luwang kolahcat, ulun-ulun bejad nyiring ihkam ngonyahtu tahkan unuk'mu botihcak ijo segah.

¹⁸Hondakrih ihkam mahi-mahi anai nginyam pononganasin Yesus Kristus, Tuhan tutang Lahca Ponyolamat ihto, tutang hondakrih ihkam ka'a mahi-mahi kosono Io. Tararih Io, tahkan huntuh tutang nyiring turus-jahamoh! Amen. Horomat ihkai, Petrus