Read Ot Danum 1 YOHANES 2 Bible Online

1 YOHANES 2 - Ot Danum bible

1 YOHANES 2

¹Anak-anak'ku! Ahku nyurat tuh ahkan ihkam, mangat ihkam ara nguan dusa. Tahpi amat anai ijo nguan dusa, mahka ihto anai ihcobehti pondohop, yorih Yesus Kristus ijo adil rih; Io ahkan nyawot bagi ihto ang toharep Amai.

²Honong poholat Yesus Kristus orih rih, dusa-dusan ihto tonapunoh. Tutang eamoh dusa-dusan ihto iou, molekan dusan paring ukup kolunon ka'a.

³Amat ihto te'et umba poretah-poretah Pohotala, orih tandaoh ijo ihto ngosono Pohotala.

⁴Ulun ijo homouh, ‘‘Ahku kosono Pohotala,’’ tahpi eam te'et umba poretah-poretah-Oh ulun rih bobalik, tutang Pohotala eam anai ang luwang ahtoioh.

⁵Tahpi ulun ijo te'et umba auh Pohotala, ulun orih sita Pohotala honong soporuna. Orih rih tandaoh ijo ihto bolum hihco umba Pohotala.

⁶Ia-iai nuhtui ijo Io bolum hihco umba Pohotala, Io harus bolum nutut lohkun Kristus.

⁷ Konduang-Konduang ijo ahku nyitaoh! Ijo ahku nyurat tuh eamrih ihco poretah ijo bohua. Tuhrih poretah tahi ijo jari tonyiar ahkan'kam tahkan ihkam pahtuk porocaya ahkan Kristus, yorih borihta tahkan Pohotala, ijo jari ihkam ngonih sounumbaoh.

⁸Oluka kolourih, poretah ijo ahku nyuratoh tuh punai ka'a; tului kotu'uioh dahpot tonohto aang arop Kristus, tutang aang arop ihkam. Tului kopindong mahi-mahi dilap, tutang koloang ijo tu'u jari nopara monyingah.

⁹Ulun ijo nuhtui ijo io anai ang luwang koloang, tahpi ulun rih magun bosingi konduangoh, ulun rih magun mohcon ang kopindong nyiring huntuh.

¹⁰Ulun ijo ngasih Konduangoh, bolum luwang koloang, nyiring eam anai angihco ka aangoh, ijo ahkan kotuluioh ulun bohkon ngonyahtu luwang dusa.

¹¹Tahpi ulun ijo bosingi konduangoh mohcon luwang kopindong. Io nyalan luwang kopindong tutang eam ta'an nokuh umoh io tulak, kotului kopindong rih nguan io eam dahpot nohto.

¹²Ahku nyurat ahkan'kam, Anak-inyam, bain dusan'kam jari tonapunoh, tului Kristus.

¹³Ahku nyurat ahkan'kam, Amai-amai, tului ihkam kosono Io ijo jari anai tahkan pahtuk nopara. Ahku nyurat ahkan'kam, Ulun-ulun biou, bain ihkam jari ngalahrih ijo Ja'at.

¹⁴Ahku nyurat ahkan'kam, anak-inyam, tului ihkam ngosono Pohotala, Amai. Ahku nyurat ahkan'kam, Amai-amai, tului ihkam ngosono Auh ijo jari anai tahkan pahtuk nopara. Ahku nyurat ahkan'kam ulun-ulun biou, bain ihkam ba'as. Auh Pohotala anai ang luwang ahtoi'kam, tutang ihkam jari mongalah ijo Ja'at.

¹⁵Ara ngasih kolunon tuh, ata'ai inon ka'a ijo anai ang luwang kolunon tuh. Amat ihkam ngasih kolunon, ihkam eam ngasih Amai.

¹⁶Kokaron angihco anai ang luwang kolunon tuh — ijo tongojolik bain tobiat ulun ijo bodusa, ijo tonohto turus tongojolik tutang ijo tonama-namamoh — paringoh anairih hal-hal ijo eam asar tahkan Amai molekan tahkan kolunon.

¹⁷Kolunon tutang kokaro aang'co ang luwangoh ijo tongojolik bain ulun, rahat dilap. Tahpi ulun ijo numbun konohuang Pohotala, tehtep bolum nyiring turus-jahamoh.

¹⁸Anak-anak'ku, lain jaman jari doni! Jari tonyorihta ahkan ihkam hounoh ijo Musuh Kristus ahkan lombut; tutang uhuntuh jari lombut, aro ulun ijo momusuh Kristus. Orih tandaoh ijo lain jaman jari doni.

¹⁹Musuh-musuh Kristus rih, anairih ulun-ulun ijo jari nohtah ihto, tului iro kotu'uioh puna eam ulun-ulun ihto. Amat iro ulun-ulun ihto, tontu iro tahtap hihco umba ihto. Tahpi iro nohtah ihto, mangat korinahrih ijo eam ihcobehti ka tahkan iro, ijo tu'u-tu'u barihihto.

²⁰Tahpi ihkam jari monorima Roh Pohotala, ijo tonusuh bain Yesus Kristus, tutang orih kotuluioh ihkam paringoh kosono ajar ijo morong rih.

²¹Jadi, ahku nyurat tuh ahkan'kam, eamoh tului ihkam eam kosono ajaran ijo morong, tahpi malah bain ihkam jari ngosonooh, tutang ihkam ka'a kota'an ijo eam anai alik a'ang ajaran ijo morong rih.

²²Ijo bobalik anairih ulun ijo nuhtui, ijo Yesus bohkonoh Lahca Ponyolamat ijo tonobowot bain Pohotala. Ulun rih Polawan Kristus; io eam mongahkuoh Amai mahika Anak.

²³Ulun ijo eam ngahku Anak, rimai eam monorima Pohotala rih Amai ka'a. Tutang ulun ijo mongahku Anak, rimai norima Amai ka'a.

²⁴Bain orih, borihta ijo jari ihkam ngonihoh, toparan ihkam pahtu-pahtukoh porocaya, harus ihkam mohagaoh pio-pios ang luwang ahtoi'kam. Amat borihta tuh ihkam mohaga pio-pios, ihkam ahkan toturus bolum hihco umba Anak tutang umba Amai.

²⁵Tutang Jituh ijo tonobowot Kristus bongoi ahkan ihto; bolum sojahti tutang kototahiu.

²⁶Ahku nyurat tuh ahkan'kam, tohou ulun-ulun ijo rahat bousaha monihpu ihkam.

²⁷Tahpi tohou ihkam bongon, Kristus jari nusuh Roh-Oh aang'kam. Tutang kotahin Roh-Oh anai aang ihkam, eam usah ulun bohkon hino majar ihkam. Bain Roh-Oh majar ihkam tohou kokaro aangihco; tutang inon ijo tongajar-Oh rih morong, eam alik, Bain orih hondakrih ihkam te'et, ahkan inon ijo tongajar bain Roh rih, tutang hondakrih ihkam tahtap bolum hihco umba Kristus.

²⁸Jadi, anak-anak'ku, tahtaprih bolum hihco umba Kristus, mangat noin ang ohkot Io lombut, ihto noharep Io honong tuwi kohanyi, tutang eam nyuhuk arop tului mia.

²⁹Ihkam jari ta'an ijo Kristus bolum numbun konohuang Pohotala. Tului orih ihkam harus ta'an hino, ijo nyinong ulun ijo bolum numbun kohondak Pohotala anai rih anak Pohotala.