Read Ot Danum 1 YOHANES 4 Bible Online

1 YOHANES 4 - Ot Danum bible

1 YOHANES 4

¹Konduang-konduang ijo tonyita! Ararih porocaya ahkan paring ulun ijo mongahku arop anaingina Roh, Pohotala, tahpi ngujirih houn iro, ahkan mongota'an, inonrih roh ijo anai aang iro rih asar tahkan Pohotala ata'ai eam. Bain aro nabi polasu jari bokumbang nokuh umo-umoh.

²Koloutuhrih caraoh ihkam ta'an inonrih rih Roh Pohotala, ata'ai eam: Ulun ijo mongahku Yesus Kristus lombut ahkan kolunon kolou ulun, ulun rih ijo anaingina Roh ijo lombut tahkan Pohotala.

³Tahpi ulun ijo eam ngahkuoh, hal tuh tohou Yesus, io eam anaingina Roh Pohotala. Ulun rih anaingina roh tahkan musuh Kristus. Konduang jari ngonih ijo roh rih ahkan lombut, tutang huntuh io jari anai ang luwang kolunon tuh.

⁴Tahpi anak-anak'ku, ihkam ain Pohotala. Ihkam jari ngalah nabi-nabi polasu, tului Roh ijo anai aang'kam labih bokowasa tahkanumba roh ijo anai aang ulun-ulun ain kolunon tuh.

⁵Nabi-nabi polasu rih nuhtui tohou hal-hal kolunon, tutang kolunon ngonih auh iro, tului iro ain kolunon.

⁶Tahpi ihto anairih anak-anak Pohotala; tutang ulun ijo kosono Pohotala ngonih auh ihto. Ulun ijo bohkon ain Pohotala, io eam ngonih auh ihto. Kolourihrih caraoh ihto ngota'an kobohkon holang Roh ijo nonga ajar ijo morong, tutang roh ijo monyosat.

⁷Konduang-konduang ijo tonyita! Olairih ihto hokasih ihco umba ijobohkon, bain kasih asaroh tahkan Pohotala. Ulun ijo mongasih anairih Anak Pohotala, tutang io ngosono Pohotala.

⁸Ulun ijo eam mongasi, io eam ngosono Pohotala; kotului Pohotala anairih pongasih.

⁹Pohotala ngorinah ijo Io mongasih ihto, hawui nyuhu Anak-Oh ijo tukan nokuh luwang kolunon, mangat ihto ngondahpot pombolum nguha Anak-Oh rih.

¹⁰Tuhrih kasih: Bohkon ihto ijo jari ngasi Pohotala, tahpi Pohotala ijo ngasi ihto, tutang nyuhu Anak-Oh, mangat nguha Io ihto mondahpot pongapunan ngosan dusa-dusan ihto.

¹¹Konduang-konduang ijo tonyita, amat Pohotala kolourih mongasih ihto, ihto ka harus ngasih ihco umba ijobohkon.

¹² Eam anai ihcobehti ka ijo pu'u nohto Pohotala, tahpi amat ihto saling hosita, tanda Pohotala hihco umba ihto, tutang asi-Oh monjadi soporuna luwang arop ihto.

¹³Bain kotului Pohotala jari nonga ahkan ihto Roh-Oh, mahka ihto ta'an ijo ihto jari bolum hihco umba Pohotala, tutang Pohotala bolum hihco umba ihto.

¹⁴Ihkai bongon jari nohto Anak Pohotala, tutang ihkai mongabaroh ijo Yesus rih tonyuhu bain Amai, ahkan monjadi Lahca Ponyolamat kolunon tuh.

¹⁵Ia-iai mongahku ijo Yesus rih Anak Pohotala, Pohotala bolum hihco umba ulun rih, tutang ulun rih ka'a bolum hihco umba Pohotala.

¹⁶Ihto bongon ta'an, tutang porocaya, ahkan kasih Pohotala ahkan ihto. Pohotala rih pongasih. Ulun ijo pombolumoh konowasa bain kasih, ulun rih hihco umba Pohotala, tutang Pohotala hihco umba io.

¹⁷Kasih monjadi soporuna luwang arop ihto, mangat ihto tepun kohanyi ang Ondou Ponosara. Ihto ahkan tepun kohanyi, tului pombolum ihto ang kolunon tuh, sama kolou pombolum Kristus.

¹⁸Ulun ijo nginyam asin Pohotala, eam mokomo anyam anai kihkoh; tului kasih ijo soporuna moponihou kokaro nanyam kihkoh. Jadi, korinah rih ijo ulun bolum nginyam sitan Pohotala honong soporuna amat ulun rih mihkoh noharep Ondou Ponosara.

¹⁹Ihto mongasih, tului Pohotala jari labih houn mongasih ihto.

²⁰Amat ihcobehti nuhtui, ‘‘Ahku ngasih Pohotala,’’ tahpi io eam mongasih konduangoh, ulun rih bobalik. Kotului ulun ijo eam mongasih konduangoh ijo gihtaioh, eam harapan tou mongasih Pohotala ijo eam tonohto baiuoh.

²¹Kotului rih, tuhrih poretah ijo tononga Kristus ahkan ihto: Ia-iai ngasih Pohotala harus ngasih konduangoh ka'a.