Read Ot Danum 2 YOHANES 1 Bible Online

2 YOHANES 1 - Ot Danum bible

2 YOHANES 1

¹Ahkan Ine ijo tonopili bain Pohotala, tutang ahkan anak-anak Ine. Surat tuh tahkan ahku, ponotua ukup ijo tu'u-tu'u ngasih ihkam. Eam tihkas ahku tahpi paring ulun ijo ngosono Pohotala ijo morong, ijo ngasih ihkam ka'a.

²Bain Pohotala mohcon ang luwang ahtoi ihto, tutang ahkan toturus anai umba ihto turus-jahamoh.

³Keleh ihto tononga borehkat, pononganasi tutang kosanang bain Pohotala, Amai, tutang Yesus Kristus Anak Amai rih. Keleh paringoh ihto ngina, hawui ahtoi ijo tulus tutang honong kasih.

⁴Ahku jorih samasino ngota'an, ijo anai anak-anak Ine ijo bolum numbun ajaran Pohotala, kolou ijo jari tonoretah Pohotala, Amai, ahkan ihto.

⁵ Tului orih, Ine, ahku nyawot honong paham mangat ihto paring saling hokasih. Ijo ahku manderoh tuh eam rih ihco poretah, ijo bohua; poretah tuh jari tononga ahkan ihto, toparan ihto pahtu-pahtukoh porocaya.

⁶Mongasih, rimai bolum numbun poretah-poretah Pohotala. Tutang poretah ijo ihkam jari ngonih tahkan pahtukoh, iorih, ijo ihkam harus bolum honong hokasih ihco sama bohkon.

⁷Aro ponihpu jari bohambur nokuh hopus kolunon. Iro anairih, ulun-ulun ijo eam ngahku, ijo Yesus Kristus lombut nokuh kolunon, kolou ihcobehti ulun. Ulun somahcam orih anairih ponihpu, tutang Musuh Kristus.

⁸Tului orih jagarih, ara nyiring ihkam nihou, inon ijo jari ihkai usahaoh ahkan ihkam. Bousaharih, mangat ihkam norima tahkan Pohotala upah'kam koparingoh.

⁹Ulun ijo eam nambit aang ajaran Kristus, molekan nyapang tahkan inon ijo tonongajaroh bain Kristus, ulun orih eam anaingina Pohotala. Ulun ijo tahtap ang luwang ajaran Kristus, rimai, anaingina, kohinut Pohotala, Amai, oluka Anak.

¹⁰Tului orih, amat anai ulun lombut tutang mborihtaoh ahkan'kam ajaran ijo eam tongajar Kristus, ara monorima ulun rih ang luwang lohpou'kam ata'ai nonga tahbe ahkaioh.

¹¹Kotului ulun ijo nonga tahbe, ahkan ulun ijo kolourih umba ka'a hihco ulun rih, aang nguan gawioh ijo ja'at.

¹²Aro samasino ijo porulu ahku monyorihtaoh ahkan'kam tahpi anyamoh labih pios ara nguha surat. Ahku moharap dahpot masap tutang hopander bongok umba ihkam, mangat ahtoi ihto tu'u-tu'u jorih.

¹³Anak-anak tahkan konduang bawi, Ine ijo tonopili Pohotala, ngirim tahbe ahkan Ine.