Read Ot Danum PONGORINAH 1 Bible Online

PONGORINAH 1 - Ot Danum bible

PONGORINAH 1

¹Suang surat tuh tohou inon ijo ngorinah bain Yesus Kristus tohou kojadian-kojadian ijo ahkan nyolung. Pohotala momborihtaoh ahkan Kristus, mangat Io ngorinahoh ahkan jihpon-jihpon Pohotala inon ijo jion harus nyolung. Kristus nyuhu molehkat-Oh nokuh Yohanes, jihpoi-Oh, ahkan momborihta kojadian-kojadian rih ahkaioh.

²Mahka Yohanes ka'a momborihta paring ijo tonohtooh rih, tutang tuhrih ponuhtuioh tohou pohtoh tahkan Pohotala, ijo tonotehen bain Yesus Kristus nguha kosaksian-Oh.

³Kosanangrih ahkan ulun ijo mombasaoh, tutang ulun ijo ngonih, borihta tujum surat tuh, hawui te'et umba inon ijo tonyurat ang luwangoh. Tului eam tahi hino paringoh tuh ahkan nyolung.

⁴ Konduang-konduang, ijo anai ang kopihtu ukup ang daerah Asia! Ahku, Yohanes, bokoharap ihkam tonongaoh borehkat tutang kosanang tahkan Pohotala — yorih, Io ijo anai, tutang jari anai, tutang ijo anai toturusoh — tutang ka'a tahkan kopihtu roh ijo anai ang boun pododusan Pohotala,

⁵ tutang tahkan Yesus Kristus, saksi ijo bokehtep. Io ijo sula-sulak tonombolum hoduli tahkan popahtoi, tutang Io rih pongowasa ngosan lahca-lahcan kolunon. Yesus mongasi ihto, tutang umba popahtoi Io momordehka ihto tahkan dusa-dusan ihto,

⁶ tutang ngonjorian ihto ihco uhtus khusus, imam-imam ijo mohalu Pohotala, Amai-Oh. Yesus Kristus orihrih, ijo hajo tutang bokowasa ahkan turus-jahamoh. Amen.

⁷ Nohto, Io lombut ngolindung bounondou! Paring ulun ahkan nohto Io, taput ka'a iro ijo jari nyadop Io. Karon uhtus ang tana ahkan nahtum tului Io. Yo, musti! Amen!

⁸ ‘‘Ahku rih ijo pahtuk tutang ijo kolaiu,’’ hion Tuhan Pohotala, ijo anai, ijo jari anai, tutang ijo anai toturusoh, Ijo Mahakowasa.

⁹Ahku Yohanes, konduang'mu ijo sonasib umba ihkam a'ang karot, ijo tonyuru nyinong murid Kristus. Ihto tabah angkokarot kolou ukup aiu-Oh. Ahku todian nokuh Pulou Patmos tului ahku monyiar pohtoh tahkan Pohotala, ijo konoba'as bain Yesus nguha kosaksian-Oh.

¹⁰Aang ondou Tuhan, ahku konowasa bain Roh Pohotala turus ahku ngonih auh ijo muhing — kolou auh trompet — pander ang lihkut'ku.

¹¹Auh rih nuhtui, ‘‘Surat, inon ijo ihko nohtooh, tutang ngirim surat tuh ahkan pihtu ukup ijo pongotuh: Epesus, Simirna, Pergamus, Tiatira, Sardis, Piladelpia, tutang Laodekia.’’

¹²Ahku nopoliou nokuh lihkut ahkan nohto iai rih ijo pander umba ahku. Turus ahku nohto pihtu owuh sumbu ijo tonapa tahkan bulou.

¹³ Ang tohun-tohun owuh-owuh sumbu rih tombok ihcobehti ijo topahjah kolou kolunon. Io hapa jubah ijo ombuoh nyiring ang pa'aioh. Ang husuk-Oh Io hapa ponuhtuphusuk tahkan bulau.

¹⁴ Balou-Oh puhti kolou bulu tobiri, kopuhti kapas. Mahta-Oh ngonjelak-jelak kolou baho;

¹⁵ pa'ai-Oh mokilat kolou tombaga ijo tonanak ang baho. Auh-Oh kolou nyahai danum sahai ijo hajo.

¹⁶Longoi kotuui-Oh nambit pihtu potion, tutang tahkan nyamai-Oh soluka 'cokobilap padang bonyihi ijo konyihi hososila. Baui-Oh ngorolondang kolou mahtanondou nohtang ang tohun ondou koloang.

¹⁷ Ohkot ahku nohto-Oh, ahku toposuruk ang baui-Oh kolou ulun mahtoi. Tahpi Io ngina longoi kotaui-Oh aang ahku turus nuhtui, ‘‘Ara mihkoh! Ahku rih Io ijo pahtuk tutang ijo kolaiou.

¹⁸Ahku rih Io ijo bolum! Ahku jari matoi, tahpi topahjahrih, Ahku bolum ahkan turus-jahamoh. Ahku bokowasa ngosan popahtoi, tutang ngosan kolunon ulun mahtoi.

¹⁹Tului rih nyurat hal-hal ijo ihko nohto, iorih hal-hal ijo anai huntuh, tutang hal-hal ijo ahkan nyolung noin.

²⁰Tuhrih rahasia tahkan pihtu potion ijo ihko nohto ang longon kotouk-Ku, tutang tahkan pihtu owuh sumbu bulou, orih: Pihtu potion rih iorih molehkat-molehkat kopihtu ukup, tutang pihtu pa'an sumbu rih anairih kapihtu ukup rih.’’