Read Ot Danum PONGORINAH 14 Bible Online

PONGORINAH 14 - Ot Danum bible

PONGORINAH 14

¹ Pongohino ahku nohto, turus gihtan Anak Tobiri rih tombok ang isun Puruk Sion. Homboh Io anai solahtus ohpat pulu ohpat kuhjan behti, ijo aang likou nyino-nyinong tonyurat arai-Oh tutang aran Amai-Oh.

²Turus ahku ngonih auh tahkan langit, mongguruh kolou danum sahainyalut ijo hajo, tutang kolou korutung duhung ijo hebat. Auh rih konahan, kolou auh musik, tahkan pomain-pomain kocahpi ijo rahat nowah kocahpioh.

³Ang baun pododusan tutang koohpat angbolum hawui dolang okon, ang kodiling pododusan rih 144.000 behti rih, monyanyi ihco nyanyian ijo bohua. Nyanyi orih eam dahpot tonyokula bain ihcobehti ka, bohkonumba tahkan 144.000 behti rih, ijo jari tomorodehkaoh tahkan tana.

⁴Iro rih ulun-ulun ijo tahtap brasih kolou anakdara, tului eam nguan kohihco umba ulunbawi. Iro nutut Anak Tobiri rih, nokuh umoh iou Io tulak. Tahkan louk sohopus ukup ulun, irorih ijo jari tomorodehka kolou ponyorahan pahtukoh ahkan Pohotala tutang ahkan Anak Tobiri.

⁵ Eam pu'u iro ngobalik; tutang eam anai kosalan honjiot ka aang iro.

⁶Turus ahku nohto ihcobehti molehkat bohkon, ijo na'ang ang langit. Molehkat rih ngomin borihta, tohau Kabar Hinut ijo abadi ahkan tonosiar, ahkan kolunon ang tana, yorih ahkan paring uhtus, lihting, basa tutang nogara.

⁷Molehkat rih na'ah umba auh ijo muhing, ‘‘Mihkohrih ahkan Pohotala, tutang momuji kohajoi-Oh! Kotului jari ohkotoh Pohotala mosara kolunon. Nyembahrih Io ijo naoi langit, tana, tasik, tutang paring tohasak danum!’’

⁸ Molehkat koduo ngohasu molehkat ijo pahtuk sambil na'ah, ‘‘Jari ngonyahtu! Lowu Babel ijo hajo jari ngonyahtu! Io jari nguan karo uhtus monjadi busou umba danum anggur — yorih tahkan bolai kihaloh!’’

⁹Ihcobehti molehkat kotolu ngohasu duo molehkat rih, sambil na'ah umba auh ijo muhing, ‘‘Ulun ijo momuji ohcinrih honong kopahtungoh, tutang anaingina tanda ohcin rih aang likou ata'ai ang longoioh,

¹⁰ ulun rih ahkan ngorih anggur Pohotala, yorih anggur kosangit-Oh ijo jari tonusuh-Oh koluwang kondarah-Oh, eamanai tongurang honjiot ka! Paring ulun rih ahkan tonosiksa, aang luwang baho tutang sondawa, ang toharep molehkat-molehkat brasih tutang ang toharep Anak Tobiri rih.

¹¹ Asop tahkan baho ijo monyiksa ulun-ulun rih, ahkan nyolobuwuk hototurus ahkan turus-jahamoh. Hondou, ngolomi, eam anai tondo-tondooh, iro tonosiksa yorih, iro ijo nyembah ohcin rih tutang pahtungoh, paring ulun ijo anaingina tanda aran ohcin rih.’’

¹²A'ang hal tuh ukup Pohotala, ijo bokehtep umba poretah-poretah Pohotala, tutang tehen umba Yesus, porulu monjadi tabah.

¹³Turus ahku ngonih auh tahkan soruga nuhtui, ‘‘Nyuratrih tuh: Nopara huntuh, kosanangrih ulun-ulun ijo mahtoi rahat hino mohalu Tuhan!’’ ‘‘Morong!’’ putah Roh Pohotala. ‘‘Iro ahkan tondo bogawi paham, tului bua pohalu iro, toturus ahkan homboh iro.’’

¹⁴ Pongohuli ahku nohto, mahka gihtan ihco bounondou ijo puhti. Ang ngosan bounondou rih, tuot ihcobehti, ijo topahjahoh kolou kolunon. Ang kuhung-Oh 'jokobawak ahkur bulou, tutang ang longoi-Oh anai ihcokobilap getukohtom ijo bonyihi.

¹⁵ Pongohuli ihcobehti molehkat bohkon soluka tahkan Lohpou Tuhan. Umba auh ijo muhing, io na'ah umba Io ijo tuot ang ngosan bounondou rih, ‘‘Ngohtomohrih umba getu-Mu rih, tutang ngohtomrih huntuh, tului jari ohkotoh ahkan panen: Kolunon jari masak ahkan tongohtom!’’

¹⁶Turus Io ijo tuot ang ngosan bounondou rih, ngohtom umba getu-Oh nokuh tana, mahka tana ka tokohtom.

¹⁷Pongohino ahku nohto ihcobehti molehkat ijo bohkon hino, soluka tahkan Lohpou Pohotala ang soruga. Io ka nambit ijo getu ijo bonyihi.

¹⁸Uliorih rih, ihcobehti molehkat bohkon, ijo bokowasa ngosan baho, lombut tahkan mesbeh. Umba auh ijo muhing io na'ah, umba molehkat ijo nambit getu ijo bonyihi rih, ‘‘Ngohetepohrih umba getu'mu rih, tutang ngohetep bua-bua pu'un anggur ang tana, tului bua-buaoh jari masak!’’

¹⁹Mahka molehkat rih ngohetep umba getuoh, nokuh tana tutang mohetep bua-bua anggur tahkan pu'unoh, turus nyahkahoh nokuh luwang pohamih anggur kosangit Pohotala, ijo moluap-luap.

²⁰ Bua-bua anggur orih tonohamih ang luar lowu, tutang tahkan pokahkas pohamih anggur rih, nyalut daha kolou sungoi, komahcu tolu rahtus kilomehter, tutang kotimbonoh korenga duo mehter.