Read Ot Danum PONGORINAH 16 Bible Online

PONGORINAH 16 - Ot Danum bible

PONGORINAH 16

¹Turus ahku ngonih auh hajo tahkan luwang Lohpou Pohotala, nuhtui umba kopihtu molehkat rih. ‘‘Tulak tutang nusuh usin kopihtu kondarah kosangit Pohotala rih nokuh ngosan tana!’’

² Molehkat ijopahtuk tulak tutang nusuh suang kondarahoh nokuh tana. Mahka lombut baha-baha ijo hebat, tutang paham podih aang paring ulun ijo ngina tanda ohcin rih, tutang aang ulun-ulun ijo nyembah pahtungoh.

³Uliorihrih molehkat koduo nusuh suang kondarahoh nokuh tasik. Mahka danum tasik ka malik kolou dahan kolunon mahtoi, tutang uras mahtoi paring angbolum, ijo bolum ang luwang tasik.

⁴ Pongohuli molehkat ijo kotolu nusuh suang kondarahoh nokuh sungoi-sungoi, tutang nokuh tohasak-tohasak danum, Mahka paring danumoh monjadi daha.

⁵Ahku ngonih molehkat ijo bokowasa ngosan danum nuhtui, ‘‘Hukuman ijo Ihko ngonyahtu anairih adil, yo Mahaborasih, Pohotala ijo anai, tutang ijo jari anai!

⁶Iro jari nusuh dahan ukup Pohotala, tutang dahan nabi-nabi, huntuh Ihko nguan iro ngorih daha. Puna kopahtutrih rih ahkan iro!’’

⁷Turus ahku ngonih auh tahkan mesbeh, nuhtui, ‘‘Tuhan, Pohotala Mahakowasa, morong tutang adil hukum-hukumanoh ijo Ihko ngonyahtuoh!’’

⁸Uliorih molehkat koohpat nusuh suang kondarahoh nokuh mahtanondou, mahka mahtanondou ka ngonduon nyaha kolunon umba kolasutoh ijo hebat rih.

⁹Kolunon tosaha bain lasut podioh, tutang iro nulut aran Pohotala, ijo bokowasa ngosan kosusah-kosusah rih. Oluka kolourih, iro eam kani hubah tahkan dusa-dusan iro, tutang eam kani momuji kohajon Pohotala.

¹⁰ Turus molehkat ijo kolimo nusuh suang kondarahoh nokuh pododusan ohcin rih. Mahka sohopus pododusan ohcin rih monjadi pindong, tutang ulun mongirut jola tului koporos.

¹¹Turus iro nulutoh Pohotala ang soruga, tului iro tongoporos tutang tului baha-baha iro. Tahpi iro eam ka'a hubah tahkan konuan-konuan iro ijo ja'at.

¹² Uliorih molehkat koonom nusuh suang kondarahoh nokuh Sungoi Efrat ijo hajo rih. Mahka sungoi rih tohjah nyiring lahca-lahca tahkan hila timur duon nyalan nguhaoh.

¹³Turus ahku nohto tolu roh ja'at, ijo tahpaioh kolou bokatak. Nyino-nyinong bokatak rih soluka tahkan nyaman naga, tahkan nyaman ohcin tutang tahkan nyaman nabi polasu.

¹⁴Iro anairih roh-roh ja'at, ijo napa tandahelan-tandahelan. Kototolu roh rih tulak nokuh paring lahca ang sohopus kolunon tutang mupung iro ahkan hokolahi ang Ondou Ijo Hajo, yorih, Ondou tahkan Pohotala Mahakowasa.

¹⁵ ‘‘Ngonihrih! Ahku lombut kolou ponahkou! Kosanangrih ulun ijo tahtap bojaga tutang mohaga hahtiuoh, nyiring io eam nyalan, hawui hoburang tutang monjadi mia, ang boun ulunaro!’’

¹⁶ Pongohuli roh-roh rih mupung lahca-lahca rih ang unuk, ijo a'ang basa Ibrani, tonohawot Harmagedon.

¹⁷Opahrih molehkat ijo kopihtu monusuh suang kondarahoh nokuh udara. Mahka konahan auh ijo muhing tahkan pododusan ang Lohpou Pohotala, ijo nuhtui, ‘‘Jari genep!’’

¹⁸ Turus nyolung kilat tutung-hotutung tutang auh duhung mongguruh tutang ngorutung, hawui kogerek tana ijo paham. Eam pu'u monjadi kogerek tana kolourih tahkan ulun tona'oi. Tuhrih kogerek tana ijo paling paham!

¹⁹ Lowu ijo hajo rih pusit monjadi tolu kobagi, tutang lonyuh rih ka'a lowu-lowu paring nogara ang kolunon. Turus Pohotala mingat ahkan Babel ijo hajo rih. Mahka Pohotala nguan io ngorih anggur tahkan kondarah anggur Pohotala — iorih anggur kosangit-Oh ijo nyambun-nyambun.

²⁰ Paring pulou nihou, tutang paring puruk ka dilap.

²¹ Uhjan eh hajo ijo nyino-nyinong bahatoh limo pulu kilogram, ngonyahtu tahkan langit nopahas ulun-ulun. Mahka iro nulut Pohotala tului kosusah uhjan eh ijo paham rih.