Read Ot Danum PONGORINAH 20 Bible Online

PONGORINAH 20 - Ot Danum bible

PONGORINAH 20

¹Uliorih rih ahku nohto ihcobehti molehkat nosuluh tahkan soruga. Ang longoioh, io nambit kuhci lowun popahtoi tutang ihcokoliting rataipasung ijo hajo.

² Turus io monawan naga rih, lohi oko — yorih Sehtan ata'ai Roh Ja'at rih — tutang momasungoh ahkan sokujan toun kotahiuoh.

³Pongohuli molehkat rih, ngondian naga rih, nokuh lowun popahtoi, turus nguhci lowun rih, hawui monyegeloh, mangat naga orih eam hino dahpot ngobalik uhtus-uhtus, hounumba ohkot sokujan toun rih opah. Uliorih io harus tonoliwus ahkan ohkot ijo honjiot.

⁴ Turus ahku nohto pododusan-pododusan, tutang ulun-ulun ijo tuot, ang pododusan-pododusan rih tononga kowasa ahkan mutusoh mohukum. Ahku nohto ka'a homboruan-homboruan, ulun-ulun ijo jari tonohtok kuhungoh tului iro nonga kosaksian tohou Yesus, tutang mborihta pohtoh Pohotala. Ulun-ulun rih eam nyembah ohcin, ata'ai ka kopahtungoh. Iroka eam pu'u norima tanda ohcin rih, aang likou ata'ai aang longon iro. Mahka iro bolum hoduli, tutang moretah kolou lahca homboh Kristus kotahin sokujan toun.

⁵Tuhrih tahap pahtukoh ulun-ulun mahtoi konombolum huli. (Tahpi ulun-ulun mahtoi bohkonoh eam konombolum kotahin sokujan toun rih.)

⁶Kosanangrih ahkan ulun-ulun ijo umba tonombolum hoduli ang tahap pahtuk rih. Iro puna monjadi ukup Pohotala. Popahtoi tahap koduo eam bokowasa ngosan iro. Iro ahkan monjadi imam-imam ain Pohotala tutang imam-imam ain Kristus; tutang iro ahkan moretah homboh Io sokujan toun kotahiuoh.

⁷Ulirih opah sokujan toun rih, Sehtan ahkan tonoliwusoh tahkan sipiroh,

⁸ tutang io ahkan tulak ngobalik uhtus-uhtus ijo bororawuh ang sohopus kolunon, yorih Gog tutang Magog. Sehtan muhpung iro ahkan kolahi, angihco jumbalah ijo hajo samasino, sokaro baras angsaran tasik.

⁹Mahka iro ka'a kosoburan nokuh sohopus kolunon, turus ngahpung kemah ukup Pohotala, tutang lowu ijo tonokasih Pohotala. Tahpi baho mosuluh tahkan langit tutang polumat iro.

¹⁰Pongohuli Sehtan ijo mobula iro rih, tonyahkah nokuh luwang tasik baho tutang sondawa. Ang anan unukoh ohcin tutang nabi pobula rih tondian labih houn. Iro ahkan tonyiksa hondou ngolomi ahkan turus-jaham.

¹¹ Uliorih ahku nohto ihco pododusan puhti ijo hajo tutang Io ijo tuot ang ngosanoh. Langit tutang tana dilap tahkan husuk-Oh, nyiring eam gihtan hino.

¹²Tutang ahku nohto ulun-ulun mahtoi, hajo, koik, tombok toharep pododusan rih. Mahka surat-surat ka tonomirang. Turus ihco kobalun surat ijo bohkon tonomirang, yorih Surat Ulun Bolum. Pongohuli hukum tongonyahtu nokuh ngosan ulun-ulun mahtoi, hotohorong umba dolang gawin iro, numbun ijo tosurat luwang surat-surat rih.

¹³Turus tasik hololian ulun-ulun mahtoi ijo anai ang luwangoh. Popahtoi tutang Lowun Popahtoi ka monyorah ulun-ulun mahtoi ijo anai ang luwangoh. Tutang ulun-ulun mahtoi rih paringoh tokona hukum hotohorong umba gawin iro.

¹⁴Pongohuli Popahtoi tutang Lowun Popahtoi ndian ahkan luwang tasik baho. (Tasik baho tuh anairih popahtoi bahagian koduo.)

¹⁵Ulun-ulun ijo eam tosurat araioh ang luwang Surat Ulun Bolum, io ndian nokuh luwang tasik baho rih.