Read Ot Danum PONGORINAH 21 Bible Online

PONGORINAH 21 - Ot Danum bible

PONGORINAH 21

¹ Turus ahku nohto langit ijo bohua, tutang tana ijo bohua. Langit pahtuk tutang tana pahtuk ka nihou, hawui tasik dilap.

² Mahka ahku nohto lowu borasih rih, yorih Yerusalem ijo bohua, nosuluh tahkan soruga tahkan Pohotala. Lowu rih jari tonyodia kolou ihcobehti pongahten bawi ijo tomokahjan ahkan nyombang pongahten ijo bahkas.

³ Turus ahku ngonih auh tahkan pododusan rih na'ah honong muhing, ‘‘Uhuntuh unuk mohcon Pohotala anairih sama-sama umba ulun! Io ahkan bolum umba iro, tutang iro ahkan monjadi ukup Aiu. Pohotala bongoi ahkan anai umba iro ahkan monjadi Pohotalan iro.

⁴ Io ahkan ngapit karon-juhun mahto tahkan mahton iro. Popahtoi eam ahkan anai hino; porosahtoi, tangih, ata'ai ponyahkit ka ahkan eam aro hino. Hal-hal ijo tahilomoi jari dilap.’’

⁵Turus Io ijo tuot ang ngosan pododusan rih nuhtui, ‘‘Uhuntuh Ahku nguan paringoh bohua!’’ Io nuhtui ka'a umba ahku, ‘‘Nyuratrih tuh, tului auh-auh tuh tu'u tutang dahpot tomorocaya.’’

⁶ Turus Io nuhtui, ‘‘Jari genep! Ahku rih ijo pahtukoh, tutang ijo laiu; Ahkurih Tuhan tahkan Kopahtuk nyiring Pongolaiu. Nyinong ulun ijo tohjahbolai, ahkan Ahku nonga korih honong cuma-cuma tahkan tohasak danum, ijo nonga pombolum.

⁷ Ulun-ulun ijo manang ahkan norima hal-hal rih tahkanumba Ahku. Ahku ahkan monjadi Pohotalaioh, tutang io monjadi anak-Ku.

⁸Tahpi ulun ijo pomihkoh, pondoruhaka, ulun bejad, pomunu, ulun ponyundal, ulun ijo hapa ilmu-ilmu gaib, ponyembah songiangdewa, tutang paring pabula, ahkan tonondian nokuh luwang tasik baho tutang sondawa ijo honyelak-honjelou, yorih popahtoi ijo ambal duo.’’

⁹Ihco tahkan louk kopihtu molehkat, ijo jari nambit kondarah-kondarah ijo tuwi, umba kopihtu kosusah ijo laiu rih, lombut ahkak'ku tutang nuhtui, ‘‘Olai! Ahku ahkan ngorinah ahkan'mu Pongahten, yorih oruh Anak Tobiri.’’

¹⁰ Mahka Roh Pohotala mongowasa ahku, tutang molehkat rih ngomin ahku nokuh pupung puruk ijo paling isung. Io nunjuk ahkak'ku, Yerusalem lowu borasih rih, lowu rih nosuluh tahkan soruga, tahkan Pohotala,

¹¹hawui somarak tutang kohajon Pohotala. Lowu rih ngorolondong kolou bahtu poromata, kolou bahtu baiduri pandan, ijo kotining kolou kristal.

¹² Dinding kota lowu rih hokodilingoh isung hajo, umba duo balas bauntukang, tutang konindoi bain duo balas molehkat. Aang bauntukang-bauntukang lowu rih anai tonyurat aran-aran duo-balas lihit Israel.

¹³Anai tolu bauntukang lowu ijo noharep nokuh nyinong titui; tolu noharep hila timur, tolu noharep hila solahtan, tolu noharep hila utara, tutang tolu noharep hila barat.

¹⁴Dinding kotalowu rih tonombok ang ngosan duo balas bahtu galang. Aang bahtu-bahtu galang rih tonyurat aran-aran koduo balas rasul Anak Tobiri rih.

¹⁵ Molehkat ijo bopander umba ahku rih, anaingina sukah ponihpong tahkan bulou, ahkan nihpong lowu rih, bauntukang-bauntukang lawangoh tutang dindingoh.

¹⁶Lowu rih tahpai holapak ohpat — kombuioh sama kolou kolombahoh. Mahka molehkat rih, nihpong lowu rih umba sukah ponihpongoh, korinah kombuioh 2400 kilomehter kolumbahoh tutang koisungoh sama kolou panjangoh.

¹⁷Kotihka molehkat rih nihpong dindingoh, korinah isung korambang rih onom pulu mehter. Tihpong ijo hapan bain molehkat rih anai tihpong ijo tohapan bain ulun.

¹⁸ Dinding lowu rih, tonapa tahkan bahtu baiduri pandan, rahatbahtang lowuoh bongoi tahkan bulou borasih, kotining kolou soramin.

¹⁹Bahtu-bahtu galang lowu rih tonawas umba kokaron mahcam bahtu poromata. Bahtu galang ijo pahtuk tonawas tahkan bahtu baiduri pandan, ijo koduo tahkan bahtu nilam, kotolu tahkan bahtu yakut, koohpat tahkan bahtu zamrud,

²⁰kolimo bahtu unam, koonom ahkik bohandang, kopihtu tahkan bahtu pirus, kojolu arsak, kosioi tahkan yakut bohenda, kosopulu tahkan bahtu ahkik bohijou, kosobalas tahkan bahtu pusparagam, ijo koduo balas tahkan bahtu kocubung.

²¹Koduo balas bauntukang lawangoh anai tonawas tahkan duo balas itan, nyino-nyinong bauntukang tonapa tahkan ihco itan. Jalan ang lowu rih tonawas tahkan bulou borasih, kotining kolou soramin ijo mokilat.

²²Ahku eam nohto Lohpou Pohotala anai luwang lowu rih, tului Lohpou Pohotalaioh iorih Tuhan bongoi, Pohotala Ijo Mahakowasa, tutang Anak Tobiri rih.

²³ Lowu rih eam usah ngorolondang mahtanondou ata'ai bulan, bain kohajon Pohotala ijo ngoloangoh, tutang Anak Tobiri rih anairih ahkan sumbuoh.

²⁴ Uhtus-uhtus ang kolunon ahkan nyalan ang luwang koloangoh, tutang lahca-lahca ka'a ahkan ngomin ponahtou iro nokuh luwang lowu orih.

²⁵ Bauntukang-bauntukang lawang lowu rih ahkan hobangah hondou ngolomi, eam ahkan tonuhtup, tului eam anai ngolomi ang anan.

²⁶Kohajon tutang ponahtou uhtus-uhtus ahkan tonomin nokuh luwang lowu rih.

²⁷ Tahpi ulun ijo nguan hal-hal ijo kojilo-jilok, ata'ai ulun ijo pobula — pandakoh inon ka ijo pali, samasino eam ahkan nyolong nokuh luwangoh. Ijo ahkan nyolong tihkas ulun ijo araioh tonyurat luwang Surat Ulun Bolum, buhku Anak Tobiri rih.