Read Ot Danum PONGORINAH 22 Bible Online

PONGORINAH 22 - Ot Danum bible

PONGORINAH 22

¹ Molehkat rih ka'a ngorinah ahkak'ku, sungoi ijo danumoh nonga pombolum. Sungoi rih mongorinjap kolou kristal, tutang nohasak tahkan pododusan Pohotala, tutang Anak Tobiri rih.

² Ang beteng-beteng jalan ijo ang lowu rih. Ang saran sungoi rih, aang hososilaoh, anai pu'un tohasak pombolum, ijo mua duo balas tikat ihcotoun, yorih sino tikat ihcobulan. Dauioh hapa ahkan ngopios uhtus-uhtus.

³ Ang luwang lowu rih eam todahpot aang'co ka ijo buah tulut Pohotala. Pododusan Pohotala tutang Anak Tobiri rih, ahkan anai ang luwang lowu rih. Jihpoi-jihpoi-Oh ahkan sombayang ahkai-Oh,

⁴tutang turus nopahjah baui-Oh. Arai-Oh ahkan tosurat ang likou iro.

⁵ Iro eam ahkan porulu sumbu ata'ai koloang mahtanondou, tului ngolomi eam anai hino, tutang Tuhan Pohotala bongoi ahkan ngoroloang iro. Mahka iro ahkan moretah kolou lahca ahkan turus-jahamoh.

⁶Turus molehkat rih nuhtui umba ahkak'ku, ‘‘Tuhtui-tuhtui tuh tu'u tutang dahpot tomorocaya. Tuhan Pohotala ijo nonga Roh-Oh ahkan nabi-nabi, jari nyuhu molehkat-Oh mangat ngorinah ahkan jihpoi-jihpoi-Oh inon ijo bojoin harus nyolung.’’

⁷‘‘Nohtoani tuh!’’ hion Yesus, ‘‘Ahku ahkan bojoin lombut. Sanangmangat ulun ijo mote'etoh auh-auh tujum luwang surat tuh!’’

⁸Ahku Yohanes jari ngonih paringoh tuh. Uli ahku jadi ngonih tutang nohtooh, ahku suhkuntu'ut ang boun molehkat rih, ijo jari ngorinah paringoh rih ahkak'ku, tutang ahku hondak nyembah io,

⁹tahpi io nuhtui umba ahku, ‘‘Ara! Ara nyembah ahku! Nyembah iou Pohotala! Kotului ahku ka'a sama kolou ihko, tutang kolou konduang-konduang'mu, nabi-nabi, tutang paring ulun ijo te'et umba pohtoh-pohtoh luwang surat tuh!’’

¹⁰Turus io nuhtui hino, ‘‘Ara ngulim auh tujum luwang surat tuh, kotului jari doni ohkotoh, paringoh tuh ahkan nyolung.

¹¹ Ulun ijo ja'at, nauhoh toturus nguan koja'atoh; ulun ijo kojilok, nauhoh ngojilok aropoh; ulun ijo numbun konohuang Pohotala, nauhoh turus numbun konohuang Pohotala, tutang ulun ijo bolum khusus ahkan Pohotala nauhoh io bolum khusus ahkan Pohotala.’’

¹² ‘‘Nohtoaniohrih tuh!’’ hion Yesus, ‘‘Eam tahi hino Ahku ahkan lombut, ahkan ngomin upah, ahkan malos nyinong ulun numbun inon ijo jari io nguaioh.

¹³ Ahku tuh ijo pahtukoh tutang ijo kolaiuoh, ahku tuh Tuhan tahkan Pahtukoh nyiring Laiuoh.’’

¹⁴ Kosanangrih, ulun ijo muhi jubahoh nyiring borasih, nyiring iro dahpothak, kuman bua tahkan pu'un pombolum, tutang nyolong nokuh lowu rih nguha bauntukang lowuoh.

¹⁵Tahpi ulun-ulun ijo jari nguan hal-hal ijo kojilok, ijo hapa ilmu-ilmu gaib, ulun-ulun rih ijo nguan gawiu-gawiu ijo nyundal, ijo munu, ijo nyembah songiangdewa, tutang ulun-ulun ijo ngobalik, pios umba auh-auh, oluka umba gawiu-gawiu, paring ulun rih unukoh ang luar lowu rih.

¹⁶ ‘‘Ahku, Yesus jari mongirim molehkat-Ku ahkan ihkam, mangat io momborihta hal-hal tuh ahkan kogunan ukup-ukup. Ahku tuh lihit Dawid; Ahku tuh potion tahkan timur ijo boloang rih.’’

¹⁷ Roh Pohotala tutang Pongahten Bawi homouh, ‘‘Kanohtoi!’’ Nyinong ulun ijo ngonih tuh harus ka'a homouh, ‘‘Kanohtoi!’’ Iai ijo tohjahbolai pios io lombut! Tutang iai ijo ngojolikoh, pios io ngomin danum, ijo nonga pombolum rih, honong cuma-cuma.

¹⁸ Ahkan nyinong ulun ijo ngonih tuhtui-tuhtui tujum ang surat tuh, ahku, Yohanes, nonga pongingat tuh; amat ulun ndahang ang'co aang tuhtui-tuhtui tujum tuh, mahka Pohotala ahkan ndahang hukum ulun rih umba kosusah-kosusah ijo tomihtik luwang surat tuh.

¹⁹Tutang amat ulun monahpas angihco tahkan tuhtui-tuhtui tujum ang surat tuh, mahka Pohotala ka'a ahkan monahpas bagiu-Oh ijo tomihtik luwang surat tuh — yorih bagian tahkan pu'un pombolum tutang tahkan lowu borasih rih.

²⁰Io ijo mborihtaoh paring borihta tuh homouh, ‘‘Morong, Ahku ahkan bojoin lombut!’’ Amen! Lombut iou o Tuhan Yesus!

²¹Pios Tuhan Yesus nonga borehkat-Oh ahkan paring ukup Pohotala!