Read Ot Danum PONGORINAH 6 Bible Online

PONGORINAH 6 - Ot Danum bible

PONGORINAH 6

¹Uliorih rih ahku nohto Anak Tobiri rih musit segel, ijo pahtukoh ang louk kopihtu segel rih. Turus ahku ngonih ihco ang louk koohpat angbolum rih nuhtui, ‘‘'Kan otoi!’’ Auh tuhtuioh rih kolou auh duhung.

² Mahka ahku nohto, turus gihtan ihcokungan kuda puhti. Ponunggangoh nambit ihco owuh panah, tutang ahkaioh tononga ihco ahkur. Io maju kolou ihcobehti ijo manang, ijo tulak nyomba'an komanang.

³Pongohuli Anak Tobiri rih musit segel ijo koduo, tutang ahku ngonih angbolum ijo koduo rih nuhtui, ‘‘'Kan otoi!’’

⁴ Turus ihcokungan kuda ijo bohkon nyoluka hino. Kuda rih bohandang kolouoh. Ponunggangoh tononga kowasa polonyuh koada'an damai tahkan ngosan tana, mangat ulun saling munu. Mahka io tononga ihco padang ijo hajo.

⁵ Turus Anak Tobiri rih musit segel ijo kotolu. Tutang ahku ngonih angbolum ijo kotolu nuhtui hioi, ‘‘'Kan otoi!’’ Ahku nohto, mahka gihtan ihcokungan kuda mitom. Ponunggangoh nambit ihco kopasang timbang ang longoioh.

⁶Tutang ahku ngonih angihco ijo konahan kolou auh ijo na'ah, tahkan tohun-tohun koohpat angbolum rih. Auh rih nuhtui, ‘‘Ihco liter gandum, ijo pios boregai ahkan upah ihcoondou, tutang tolu liter gandum mahcam bohkon ijo borega upah ihcoondou ka'a. Tahpi ara morusakoh pu'un-pu'un zaitun tutang pombulan anggur!’’

⁷Pongohuli Anak Tobiri rih musit segel ijo koohpat. Tutang ahku ngonih angbolum ijo koohpat nuhtui, ‘‘'Kan otoi!’’

⁸ Ahku nohto turus gihtan ihcokungan kuda ijo puhcat. Ponunggangoh bogare popahtoi. Tahkan lihkutoh, io tonutut doni-doni bain Lowun Popahtoi. Kowasaioh ngosan soporahpat tana tuh tonosorah ahkan iro, mangat iro dahpot munu nguha kolahi, nguha wayah bolo'u, nguha wabah pondamporos, tutang nguha ohcin-ohcin bosiak.

⁹Uliorih rih Anak Tobiri rih musit segel ijo kolimo. Mahka ahku nohto ang pinda mesbeh, anai homboruan-homboruan ulun-ulun ijo mahtoi tomunu, bain iro ngondehen pohtoh tahkan Pohotala, nguha kosaksian iro.

¹⁰Iro ngombak hawui auh ijo muhing, ‘‘Yo Tuhan Ijo Mahakowasa, ijo borasih tutang morong! Pira kotahiu hino punan Ihko mosara ulun kolunon, tutang mohukum iro, tului iro jari munu ihkai?’’

¹¹Iro nyino-nyinong, tononga ihco kolambar jubah ijo puhti. Turus iro sonuhu ngerenghasong eamtahi hino, johcok jari sukup jumbalah, sobat-sobat sokolahi tutang konduang-konduang iro, ijo ahkan tomunu kolou iro.

¹² Turus ahku nohto Anak Tobiri rih musit segel ijo koonom. Nyolung tana moruguh ijo karas. Mahtan ondou monjadi mitom, kolou benang mitom ijo kasar, tutang bulan bohandang kolou daha.

¹³ Potion-potion sokomedapboduruh tahkan langit nokuh ngosan tana, kolou bua sikun ijo nolahus boduruh tahkan da'aioh aang ohkot tonoruhkuh bain bahiu bolowut.

¹⁴ Langit dilap kolou korahtas tonombalun, tutang paring puruk tutang pulou-pulou tokisat tahkan unukoh.

¹⁵ Turus lahca-lahcan kolunon, ulun-ulun hajo, pongkolima-pongkolima, ulun-ulun tahtou, tutang ulun-ulun bokowasa, tutang ulun-ulun bohkonoh, pios jihpon kanika ulun ijo morodehka, paringoh nyuhuk arop ang luwang guha-guha, tutang ang holat-holat puruk bahtu.

¹⁶ Ahkan puruk-puruk tutang bahtu-bahtu rih iro bokohciak, ‘‘Nopahas ihkai! Posuhuk ihkai tahkan topahjah Tuhan ijo tuot ang ngosan pododusan tutang tahkan kosingi Anak Tobiri rih!

¹⁷ ndou dahsyat ius lombut, uhuntuh iro nusuh kosangit iro, tutang eam ihcobehti ka sanggup botahan ang husuk iro!’’