Read O‘zbek tilidagi Muqaddas Kitob, 2013 Ibtido 11 Bible Online

Ibtido 11 - O‘zbek tilidagi Muqaddas Kitob, 2013 bible

Ibtido 11

¹Butun yer yuzida bitta til bo‘lib, hamma odamlar bir xil so‘zlashardilar.

²Odamlar sharqdan [1] ko‘chib, Shinar yeridagi [2] bir tekislikka keldilar va o‘sha yerda joylashdilar.

³Odamlar bir–birlariga: “Kelinglar, g‘isht quyib, yaxshilab pishiraylik”, dedilar. Shunday qilib, ular qurilish uchun g‘ishtdan, qorishma uchun qora saqichdan foydalanadigan bo‘ldilar.

⁴Keyin odamlar aytdilar: “Kelinglar, o‘zimiz uchun shahar quraylik, shahar minorasining cho‘qqilari osmonga tegib tursin. Shu tariqa nom tarataylik. Aks holda biz butun yer yuziga tarqalib ketamiz.”

⁵Odamlar qurayotgan shaharni va minorani ko‘rish uchun Egamiz pastga tushdi.

⁶Egamiz dedi: “Qaranglar, hammasi bitta xalq, hammasining tili bir! Bu hali ular qilmoqchi bo‘lgan ishning boshlanishi, xolos. Hademay, ular ko‘ngliga kelgan ishni qilishga qodir bo‘ladilar.

⁷Qani, pastga tushaylik–da, ularning tilini aralashtirib yuboraylik [3], toki birining gapini ikkinchisi tushunolmay qolsin.”

⁸Shunday qilib, Egamiz ularni bu yerdan butun yer yuzi bo‘ylab tarqatib yubordi. Odamlar shahar qurilishini to‘xtatdilar.

⁹Egamiz hamma odamlarning tilini shu yerda chalkashtirib, ularning o‘zlarini butun yer yuziga tarqatib yuborgani uchun, shaharning nomi Bobil [4] bo‘lib qoldi.

¹⁰Somning nasl–nasabi tarixi quyidagichadir: Som 100 yoshga kirganda, o‘g‘li Arpaxshodni ko‘rgan edi [5]. Arpaxshod tug‘ilganda, to‘fon bo‘lib o‘tganiga ikki yil bo‘lgan edi.

¹¹Arpaxshod tug‘ilgandan keyin, Som 500 yil yashab, yana o‘g‘il–qizlar ko‘rdi.

¹²Arpaxshod 35 yoshida o‘g‘li Shilaxni ko‘rgan edi.

¹³Shilax tug‘ilgandan keyin, Arpaxshod 403 yil yashab, yana o‘g‘il–qizlar ko‘rdi.

¹⁴Shilax 30 yoshida o‘g‘li Ibirni ko‘rgan edi.

¹⁵Ibir tug‘ilgandan keyin, Shilax 403 yil yashab, yana o‘g‘il–qizlar ko‘rdi.

¹⁶Ibir 34 yoshida o‘g‘li Palaxni ko‘rgan edi.

¹⁷Palax tug‘ilgandan keyin, Ibir 430 yil yashab, yana o‘g‘il–qizlar ko‘rdi.

¹⁸Palax 30 yoshida o‘g‘li Ravuni ko‘rgan edi.

¹⁹Ravu tug‘ilgandan keyin, Palax 209 yil yashab, yana o‘g‘il–qizlar ko‘rdi.

²⁰Ravu 32 yoshida o‘g‘li Sarug‘ni ko‘rgan edi.

²¹Sarug‘ tug‘ilgandan keyin, Ravu 207 yil yashab, yana o‘g‘il–qizlar ko‘rdi.

²²Sarug‘ 30 yoshida o‘g‘li Naxo‘rni ko‘rgan edi.

²³Naxo‘r tug‘ilgandan keyin, Sarug‘ 200 yil yashab, yana o‘g‘il–qizlar ko‘rdi.

²⁴Naxo‘r 29 yoshida o‘g‘li Terahni ko‘rgan edi.

²⁵Terah tug‘ilgandan keyin, Naxo‘r 119 yil yashab, yana o‘g‘il–qizlar ko‘rdi.

²⁶Terah 70 yoshdan o‘tgandan keyin o‘g‘illari Ibrom [6], Naxo‘r va Xaronni ko‘rgan edi.

²⁷Terahning nasl–nasabi tarixi quyidagichadir: Terahdan Ibrom, Naxo‘r va Xaron tug‘ildilar. Xarondan Lut tug‘ildi.

²⁸Terah hali hayot ekan, Xaron otasidan oldin o‘z tug‘ilgan yurtida — Xaldeydagi Ur shahrida [7] olamdan o‘tdi.

²⁹Ibrom — Soray [8] degan qizga, Naxo‘r — Milxo degan qizga uylandilar. Milxo Xaronning qizi edi. Milxoning Iskax degan singlisi ham bor edi.

³⁰Soray bepusht bo‘lib, bolasi yo‘q edi.

³¹Terah o‘g‘li Ibromni, Xaronning o‘g‘li — nabirasi Lutni, Ibromning xotini — kelini Sorayni ergashtirib, Xaldeydagi Ur shahridan chiqib, Kan’on yurtiga qarab yo‘l oldi. Ular Xoron shahriga [9] kelishgach, o‘sha yerda o‘rnashdilar.

³²Terah 205 yoshida Xoronda olamdan o‘tdi.