Read O‘zbek tilidagi Muqaddas Kitob, 2013 Ibtido 13 Bible Online

Ibtido 13 - O‘zbek tilidagi Muqaddas Kitob, 2013 bible

Ibtido 13

¹Shunday qilib, Ibrom [1] xotinini, jiyani Lutni va bor mol–mulkini olib, Misrdan chiqdi va shimolga — Nagav cho‘liga [2] yo‘l oldi.

²Ibrom endi juda boyib ketgan, mol–qo‘ylari, kumushu oltini ko‘p edi.

³U Nagav cho‘lidan Baytilga borgunicha bir joydan ikkinchi joyga ko‘chib yurdi. Nihoyat, Baytil bilan Ay oralig‘iga [3] yetib keldi. U oldin ham shu yerda chodir tikib,

⁴qurbongoh qurgan edi. Ibrom o‘sha yerda yana Egamizga sajda qildi.

⁵Ibrom bilan birga ketayotgan Lut ham juda boy bo‘lib, mol–qo‘ylari, ko‘plab chodirlari bor edi.

⁶Ikkovlari chorvasi bilan bir joyda yashashlari uchun yer torlik qilib qoldi.

⁷Qolaversa, Ibromning cho‘ponlari bilan Lutning cho‘ponlari o‘rtasida janjal chiqib qoldi. Bu paytda o‘sha yurtda Kan’on va Pariz xalqlari yashardilar.

⁸Shunda Ibrom Lutga dedi: — Mening cho‘ponlarim bilan sening cho‘ponlaring o‘rtasida janjal bo‘lmasligi kerak. Axir, biz yaqin qarindoshlarmiz.

⁹Nima qilishimiz lozimligini men senga aytay. Sen mana shu yerdan yaxshi joyini keragicha tanlab ol, keyin bir–birimizdan ajralaylik. Agar sen chap tomonga ketsang, men o‘ng tomonga ketaman, agar sen o‘ng tomonga ketsang, men chap tomonga ketaman.

¹⁰Lut Zo‘var tomondagi Iordan vodiysining serhosil tekisliklariga qaradi. Hammayoq sersuv, go‘yo Egamiz yaratgan boqqa [4] va Misrning ajoyib yerlariga o‘xshardi. Egamiz Sado‘m va G‘amo‘ra shaharlarini vayron qilmasdan oldin vodiy shunaqa edi.

¹¹Shunday qilib, Lut Iordan tekisliklarini tanladi va sharq tomonga ketdi. Shu tariqa Ibrom bilan Lut bir–biridan ayrildilar.

¹²Ibrom Kan’on yurtida o‘rnashdi, Lut esa Iordan tekisliklaridagi shaharlar orasiga o‘rnashib, chodirlarini Sado‘m yoniga ko‘chirdi.

¹³Sado‘m aholisi qabihlik qilishar, Egamiz oldida qattiq gunohkor edilar.

¹⁴Lut Ibromdan ayrilib ketgandan keyin, Egamiz Ibromga dedi: — Mana shu turgan joyingdan shimolga, janubga, sharqqa va g‘arbga qara.

¹⁵Sen ko‘rib turgan hamma yerni senga va sening naslingga abadiy mulk qilib beraman.

¹⁶Men sening naslingni yerdagi qumday ko‘paytiraman. Kimki yerdagi qumni sanay olsa, sening naslingni ham sanay oladi.

¹⁷Qani, otlan, yurtni aylanib chiq. Men bu yurtni senga mulk qilib beraman.

¹⁸Shunday qilib, Ibrom chodirini yig‘ishtirib, Xevrondagi [5] Mamre nomli muqaddas emanzor [6] yoniga keldi va o‘sha yerda o‘rnashdi. U yerda Egamizga qurbongoh qurdi.