Read O‘zbek tilidagi Muqaddas Kitob, 2013 Ibtido 18 Bible Online

Ibtido 18 - O‘zbek tilidagi Muqaddas Kitob, 2013 bible

Ibtido 18

¹Kunning jazirama issiq payti edi. Ibrohim Mamredagi muqaddas emanzorda [1] chodiriga kiraverishda o‘tirgan edi, shu payt Egamiz unga zohir bo‘ldi.

²Shu lahzada Ibrohim ro‘parasida uchta odam turganini bildi. Ibrohim uchalasini ko‘rgan zahoti chodirga kiraverishdan ularni kutib olgani yugurib bordi va muk tushib ta’zim qildi.

³— Hazratim [2], — dedi Ibrohim, — marhamatingizni darig‘ tutmanglar, bu qulingizning eshigini bosib o‘tib ketmanglar.

⁴Xizmatkorlarim suv keltirishsin, oyoqlaringizni yuvishsin, o‘zlaringiz daraxtning soyasida dam olinglar.

⁵Modomiki, bu qulingizning xonadoniga tashrif buyuribsizlar, men non–pon olib kelay. Sayohatingizni davom ettirishdan oldin bardam bo‘lib olinglar. — Mayli, — deyishdi ular, — aytganingday qilaver.

⁶Ibrohim shoshilganicha chodirga qaytdi–da, Soraga dedi: — Tez bo‘l! Unning yaxshisidan darrov uch tog‘ora [3] olib, non yop.

⁷So‘ngra podaga borib, semiz buzoqni tanladi va xizmatkoriga berdi. Xizmatkor darrov buzoqni so‘yib tayyorlashga kirishdi.

⁸U suzma, sut va pishirib tayyorlangan buzoq go‘shtini olib, mehmonlarning oldiga qo‘ydi. Mehmonlar ovqatlanishayotganda, Ibrohim daraxt ostida ularga o‘zi xizmat qilib turdi.

⁹— Xotining Sora qayerda? — deb so‘rashdi ular. — Shu yerda, chodirda, — deb javob berdi Ibrohim.

¹⁰Ulardan biri [4]: — Kelgusi yili shu paytda [5] men qaytib kelganimda, xotining Sora o‘g‘illi bo‘ladi, — dedi. Sora uning orqasida, chodirga kiraverish yonida bu suhbatni eshitib turardi.

¹¹Bu paytda Ibrohim ham, Sora ham juda keksayib qolishgan, Sora bola tug‘ish davridan ancha o‘tgan edi.

¹²U ichida kulib, o‘zicha o‘yladi: “Men munkillagan kampir bo‘lsam–u, qanday qilib lazzatlana olardim?! Buning ustiga, erim ham qarib qolgan bo‘lsa.”

¹³Shunda Egamiz [6] yana Ibrohimga aytdi: — Nima uchun Sora kuldi? Nimaga u: “Qarib qolgan bo‘lsam–u, bola tug‘armidim”, dedi?

¹⁴Men, Egangiz, uchun imkonsiz narsa bor ekanmi?! Kelgusi yil shu paytda men qaytib kelaman. O‘shanda Soraning o‘g‘li bo‘ladi.

¹⁵Lekin Sora qo‘rqib ketgan edi. — Kulmadim, — deb gapidan tondi u. — Yo‘q, kulding, — dedi Egamiz.

¹⁶Shundan keyin uchalovi o‘rinlaridan turib, Sado‘m tomonga yo‘l oldilar. Ibrohim, ularni kuzatib qo‘yay, deb birga yurdi.

¹⁷Egamiz: “Men qilmoqchi bo‘lgan ishlarimni Ibrohimdan sir tutmayman”, dedi O‘ziga.

¹⁸“Ibrohimdan buyuk, qudratli xalq kelib chiqadi. Yer yuzidagi jamiki xalqlar u orqali baraka topadi.

¹⁹Ibrohim o‘g‘illarini, o‘z naslini Mening yo‘limdan yurishga, to‘g‘rilik va adolat bilan ish qilishlariga yo‘l ko‘rsatsin, deb uni tanlaganman. Shunda Men Ibrohimga bergan va’damni bajaraman.”

²⁰So‘ngra Egamiz Ibrohimga dedi: — Sado‘m va G‘amo‘ra aholisi haddan tashqari razillik qilyaptilar, ularning gunohlari naqadar og‘irligini eshitdim!

²¹Men pastga tushaman, Mening qulog‘imga yetib kelgan jinoyatlar haqiqatmi yoki yo‘qmi, ko‘zim bilan ko‘rayin. Shunda Men haqiqatni bilib olaman.

²²Boshqa ikkitasi Sado‘mga qarab ketishdi. Ibrohim esa Egamizning oldida qoldi.

²³Ibrohim Unga yaqinroq kelib, so‘radi: — Sen gunohkorni ham, begunohni ham birday qirib tashlayverasanmi?

²⁴Aytaylik, shaharda ellikta begunoh odam topsang, shaharni vayron qilaverasanmi? Begunoh odamlarning haqi–hurmati uchun shaharga rahm qilmaysanmi?

²⁵Gunohkor odam bilan birga gunohsizni yo‘q qilmagin. Agar shunday qilsang, begunoh gunohkor bilan birga jazolanadi–ku! Aslo bunday qilmagin. Butun olamning Hokimi adolatli ishlarni qilishi kerak emasmi?!

²⁶— Agar Men Sado‘mda ellikta begunoh odamni topsam, — dedi Egamiz, — ularning haqi–hurmati uchun butun shaharga rahm qilaman.

²⁷— Ey, Rabbiy! Men tuproq va kul bo‘lsam ham, Senga gapirayotganimda qo‘polligim uchun kechirgin, — dedi Ibrohim.

²⁸— Ellikta begunoh odamga beshta yetmasa–chi? Beshta kam bo‘lgani uchun butun shaharni qirib tashlaysanmi? — Agar u yerda qirq beshta solih odamni topsam, shaharni qirib tashlamayman.

²⁹Ibrohim Egamizga yana gapirdi: — Balki u yerda qirqta begunoh odam topilar. — O‘sha qirqta begunohning haqi–hurmati uchun bu ishni qilmayman, — dedi Egamiz.

³⁰— Yo, Rabbiy! — dedi Ibrohim. — Gapirsam, O‘zing kechirgaysan. Balki u yerda o‘ttizta begunoh topilar? — Agar u yerda o‘ttizta begunoh odamni topsam, shaharni qirib tashlamayman, — deb javob berdi U.

³¹— Rabbiy! Gapirayotganimda qo‘polligim uchun kechirgin, — dedi Ibrohim. — Balki u yerda yigirmata begunoh odam topilar? — O‘sha yigirmata begunoh odamning haqi–hurmati uchun shaharni qirib tashlamayman, — dedi U.

³²— Rabbiy! Yana bir marta gapirsam, O‘zing kechirgaysan, — dedi Ibrohim. — Balki u yerda o‘nta begunoh odam topilar? — O‘sha o‘nta begunoh odamning haqi–hurmati uchun shaharni qirib tashlamayman, — deb javob berdi Egamiz.

³³Egamiz Ibrohim bilan gaplashib bo‘lgach, O‘z yo‘liga ketdi. Ibrohim ham chodiriga qaytdi.