Read O‘zbek tilidagi Muqaddas Kitob, 2013 Ibtido 20 Bible Online

Ibtido 20 - O‘zbek tilidagi Muqaddas Kitob, 2013 bible

Ibtido 20

¹Ibrohim bu yerdan ko‘chib, janubga — Nagav cho‘li [1] tomonga yo‘l oldi va Kadesh bilan Shur oralig‘ida joylashdi. Keyinroq Garorga [2] ketdi. U yerda bir oz yashadi.

²Ibrohim bu yerdagi odamlarga xotini Sorani, u mening singlim, deb aytar edi. Garor shohi Abumalek odam yuborib, Sorani saroyiga oldirib keldi.

³Abumalek kechasi tush ko‘rdi. Tushida Xudo zohir bo‘lib, unga dedi: “Sen mana shu xotinni olganing uchun o‘lasan, chunki uning eri bor.”

⁴Lekin Abumalek hali Soraga yaqinlashmagan edi. — Yo, Rabbiy! — dedi Abumalek. — Men begunohman–ku! Endi begunoh odamni ham o‘ldiraverasanmi?

⁵Ibrohim menga, u mening singlim, dedi–ku! Ayolning o‘zi ham, Ibrohim — mening akam, dedi. Men bu ishni pok ko‘ngil bilan qildim.

⁶Xudo Abumalekka tushida yana dedi: — Sening pok ko‘ngilli ekaningni bilaman. Shu sababdan Menga qarshi gunoh qilishdan seni saqladim. Soraga tegishingga yo‘l qo‘ymadim.

⁷Endi sen bu ayolni eriga qaytarib ber. Uning eri — payg‘ambar, sen uchun ibodat qiladi. Shunda sen tirik qolasan. Agar bu ayolni eriga qaytarib bermasang, shuni bilib qo‘yki, o‘zing ham, butun oila a’zolaring ham o‘lasizlar.

⁸Ertasi kuni saharda Abumalek hamma a’yonlarini chaqirib, ularga bo‘lgan voqeani aytib berdi. Hammalari qattiq vahimaga tushdilar.

⁹Keyin Abumalek Ibrohimni chaqirtirdi va unga dedi: — Bizni nima qilib qo‘yding? Senga qarshi qanday gunoh qilibman–a! Men ham, shohligim ham shunchalik og‘ir gunohga botishiga sen sababchi bo‘lding! Sen menga hech qachon hech kim qilishi kerak bo‘lmagan ishni qilding.

¹⁰Abumalek Ibrohimdan: — Nimani o‘ylab bu ishni qilding? — deb so‘radi.

¹¹— Bu yerda hech kim Xudodan qo‘rqmaydi, xotinimni tortib olish uchun meni o‘ldiradilar, deb o‘yladim, — dedi Ibrohim.

¹²— Buning ustiga, u haqiqatan ham mening singlim, otamiz bir, lekin onamiz boshqa–boshqa bo‘lgani uchun unga uylanganman.

¹³Xudo meni otamning xonadonidan begona yurtlarga sayohatga olib ketganda, xotinimga shunday degan edim: “Qaysi joyga borsak ham, men to‘g‘rimda gapirganingda, u mening akam, deb aytgin. Shunda menga sodiqligingni ko‘rsatgan bo‘lasan.”

¹⁴Shundan keyin Abumalek mol–qo‘yidan, qul va cho‘rilaridan Ibrohimga berdi. Xotini Sorani ham qaytarib berdi.

¹⁵— Mana, shohligimga qarashli yerlar qarshingda turibdi, — dedi Abumalek. — Qayerda yashashni xohlasang, o‘sha joyni tanlab olaver.

¹⁶Soraga esa shunday dedi: — Mana, akangga ming bo‘lak kumush [3] bilan tovon to‘layapman. Bu kumushlar yoningdagilarga sening pokligingni isbotlaydi [4].

¹⁷[17-18] Egamiz Sora tufayli Abumalekning xonadonidagi hamma ayolni tug‘maydigan qilib qo‘ygan edi. Ibrohim Xudoga ibodat qildi. Xudo Abumalekka shifo berdi, shuningdek, uning xotini va cho‘rilariga ham shifo berib, ularni tug‘adigan qildi.