Read O‘zbek tilidagi Muqaddas Kitob, 2013 Ibtido 21 Bible Online

Ibtido 21 - O‘zbek tilidagi Muqaddas Kitob, 2013 bible

Ibtido 21

¹Egamiz bergan va’dasi bo‘yicha Soraga marhamat qildi.

²Sora homilador bo‘lib, Ibrohimga qarigan chog‘ida o‘g‘il tug‘ib berdi. Bularning hammasi Xudo aytgan vaqtda yuz berdi.

³Ibrohim o‘g‘liga Is’hoq, deb ism qo‘ydi.

⁴Xudo amr qilganday, Is’hoq sakkiz kunlik bo‘lganda, Ibrohim uni sunnat qildi [1].

⁵Is’hoq tug‘ilganda, Ibrohim yuz yoshda edi.

⁶Sora dedi: “Xudo menga shodlik va kulgi [2] ato qildi, bu haqda eshitgan har kim men bilan birga kuladi.

⁷Kim ham, Sora chaqaloqni emizadi, deb Ibrohimga aytar edi?! Axir, Ibrohimga qarigan chog‘ida o‘g‘il tug‘ib berdim–ku.”

⁸Vaqt o‘tib, Is’hoq katta bo‘lib qolgach, Sora uni ko‘krakdan chiqardi. Bu baxtli kunni nishonlab, Ibrohim katta ziyofat berdi [3].

⁹Misrlik Hojarning Ibrohimga tug‘ib bergan o‘g‘li Ismoil [4] Is’hoqni [5] masxara qilayotganini [6] Sora ko‘rib qoldi.

¹⁰Sora Ibrohimga: — Bu cho‘rini o‘g‘li bilan birga haydab yuboring! — deb talab qildi. — Cho‘rining o‘g‘li mening o‘g‘lim bilan merosxo‘r bo‘lmasin [7].

¹¹Bu gapdan Ibrohim juda xafa bo‘ldi, axir, Ismoil ham uning o‘g‘li edi–da.

¹²Lekin Xudo Ibrohimga dedi: — Bola va cho‘ri xotining uchun tashvish tortma. Soraning aytganlarini qil. Chunki Men senga va’da qilgan nasling Is’hoq orqali kelib chiqadi.

¹³Cho‘ri xotiningning bolasi sening ham o‘g‘ling bo‘lgani uchun, Men unga ham farzandlar ato etib, undan xalqlar yarataman.

¹⁴Ibrohim ertasiga saharda turdi. Bir oz yegulik va bir mesh suv olib, Hojarning yelkasiga yukladi–da, o‘g‘li bilan birga jo‘natib yubordi. Hojar Bersheva atroflarida cho‘lda bemaqsad izg‘ib yurdi.

¹⁵Meshdagi suv tamom bo‘lgach, Hojar bolasini bir butaning tagida qoldirdi.

¹⁶So‘ngra: “Bolamning o‘lishini ko‘rmayin”, deb bolasidan bir o‘q otimi nariga borib o‘tirdi. Hojar o‘sha yerda o‘tirib, yig‘lab, faryod qila boshladi.

¹⁷Xudo bolaning yig‘isini eshitdi. Xudoning farishtasi osmondan Hojarni chaqirib, unga dedi: — Nimaga g‘am chekyapsan, Hojar? Qo‘rqma, sen bolani qoldirib ketgan joydan Xudo uning yig‘isini eshitdi.

¹⁸Qani, bolani turgiz, uning qo‘lidan ushla. Men uning naslidan buyuk xalq yarataman.

¹⁹Xudo Hojarning ko‘zini ochib yuborgan edi, u bir quduqni ko‘rdi. Borib, meshni suvga to‘ldirib keldi–da, bolasiga ichirdi.

²⁰Xudo doimo bola bilan birga bo‘ldi. Bola Poron cho‘lida [8] o‘sib–ulg‘aydi. U mohir kamonkash bo‘ldi.

²¹Onasi uni Misr yurtidan bir qizga uylantirdi.

²²Bir kuni Abumalek [9] lashkarboshisi Pixol bilan birga Ibrohimning oldiga bordi va unga dedi: — Sen har qanday ishni qilganingda ham Xudo sen bilan birga.

²³Endi Xudoning nomini o‘rtaga qo‘yib, seni, bolalaringni, naslingni aldamayman, deb qasam ich. Men senga sodiqligimni ko‘rsatdim. Shuning uchun hozir, senga va men istiqomat qilib turgan shu yurtingga sodiq bo‘laman, deb qasam ich.

²⁴— Qasam ichaman, — dedi Ibrohim.

²⁵Shunda Ibrohim Abumalekka: “Xizmatkorlaring zo‘rlik bilan mening qudug‘imni tortib olishdi”, deb shikoyat qilib qoldi.

²⁶— Bu haqda birinchi marta eshityapman, — dedi Abumalek. — Sen menga bu haqda aytmagan eding. Bu ishni kim qilganini bilmayman.

²⁷Shunday qilib, Ibrohim Abumalekka mol–qo‘ylar berdi va ikkalasi ahd qildilar.

²⁸Ibrohim yettita urg‘ochi qo‘zini suruvdan ajratib oldi.

²⁹Abumalek Ibrohimdan: — Sen yettita urg‘ochi qo‘zini ajratib olding, buning ma’nosi nima? — deb so‘radi.

³⁰Ibrohim shunday javob berdi: — Mana shu yettita urg‘ochi qo‘zini sen qo‘limdan olishing kerak, toki bu quduqni o‘zim qaziganimni bular isbotlaydi [10].

³¹Shunday qilib, ikkovlari qasamyod qilishdi. Shuning uchun bu joy hozirgacha Bersheva [11], deb yuritiladi.

³²Ular ahd qilganlaridan keyin, Abumalek o‘z lashkarboshisi Pixol bilan Filistlar yeriga qaytib ketdi.

³³Ibrohim Bershevada tamarisk daraxti [12] o‘tqazdi va u yerda abadiy Xudo — Egamizga sajda qildi.

³⁴Ibrohim Filistlar yerida ancha vaqt turib qoldi.