Read O‘zbek tilidagi Muqaddas Kitob, 2013 Ibtido 23 Bible Online

Ibtido 23 - O‘zbek tilidagi Muqaddas Kitob, 2013 bible

Ibtido 23

¹Sora 127 yoshida,

²Kan’on yurtidagi Xirat–Arbada vafot etdi. (Xirat–Arba hozir Xevron, deb yuritiladi.) Ibrohim Soraga aza tutib, yig‘ladi.

³U Soraning jasadini qoldirib, Xet xalqidan [1] bo‘lgan oqsoqollar oldiga bordi va ularga dedi:

⁴— Men sizlarning orangizda yashayotgan bir musofirman. Iltimos, menga yeringizdan bir ozini sotinglar, toki marhumamni dafn qilay.

⁵Xet xalqidan bo‘lgan oqsoqollar Ibrohimga shunday javob berishdi:

⁶— Gapimizga quloq soling, to‘ram! Biz sizni ulug‘ bek, deb hisoblaymiz. Xotiningizni dafn qilishingiz uchun joylarimizdan eng yaxshisini tanlab oling. Birortamiz marhumangizni dafn qilishingiz uchun sizdan qabristonni ayamaymiz.

⁷Ibrohim ularga egilib ta’zim qildi.

⁸Keyin dedi: — Marhumamni dafn qilishimga rozi ekansizlar, endi mening gapimga quloq solinglar, Zo‘xar o‘g‘li Efro‘nga mening iltimosimni yetkazinglar.

⁹U o‘zining Maxpaladagi dalasining chetida joylashgan g‘orni menga sotsin. Men g‘orning to‘liq narxini to‘lay, toki sizlarning guvohligingizda g‘or mening xonadonim uchun qabriston bo‘lsin.

¹⁰Efro‘n shu paytda shahar darvozasida [2] yig‘ilgan o‘z xalqi orasida o‘tirgan edi. U jamiki Xet xalqiga eshittirib, Ibrohimga shunday javob berdi:

¹¹— To‘ram, endi mening gapimni eshitsinlar. Men dalamni, dalamdagi g‘orni ham sizga in’om qilaman. Xalqimning guvohligida bularni sizga beraman. Marhumangizni dafn qilavering.

¹²Ibrohim yurt xalqiga yana ta’zim qildi.

¹³U yurt xalqiga eshittirib, Efro‘nga shunday javob berdi: — Rahmat, lekin men butun dalangiz uchun kumush to‘lab, sotib olay, toki marhumamni u yerga olib borib dafn qilay. Iltimos, mening taklifimni rad etmang.

¹⁴[14-15] — E, to‘ram, — dedi Efro‘n Ibrohimga, — to‘rt yuz bo‘lak kumush [3] turadigan bir parcha yer bizning oramizda nima bo‘pti?! Marhumangizni dafn qilavering.

¹⁶Ibrohim rozi bo‘lib, Efro‘n hammaga eshittirib aytgan to‘rt yuz bo‘lak kumushni unga tortib berdi. Bu o‘lchov savdogarlar orasida muomalada edi.

¹⁷Shunday qilib, Efro‘nning Mamre sharqida joylashgan Maxpaladagi mulki Ibrohimga o‘tdi. Mulk dalani, daladagi g‘orni va dalaning chetidagi hamma daraxtlarni o‘z ichiga olar edi.

¹⁸Bular shahar darvozasida yig‘ilgan Xet xalqining hammasi guvohligida Ibrohimning doimiy mulki bo‘lib qoldi.

¹⁹Shundan keyin Ibrohim Kan’on yurtida Mamre sharqidagi Maxpala dalasining chetida joylashgan g‘orga xotini Sorani dafn qildi. (Mamre Xevronda joylashgan.)

²⁰Shunday qilib, Xet xalqiga qarashli bo‘lgan dala va u yerdagi g‘or doimiy qabriston sifatida Ibrohimning mulki bo‘lib qoldi.