Read O‘zbek tilidagi Muqaddas Kitob, 2013 Ibtido 25 Bible Online

Ibtido 25 - O‘zbek tilidagi Muqaddas Kitob, 2013 bible

Ibtido 25

¹Ibrohim boshqa ayolga uylandi. U ayolning ismi Xaturo edi.

²U Ibrohimga bir necha o‘g‘il tug‘ib berdi. O‘g‘illarning ismi Zimron, Yoxshon, Midon, Midiyon, Yishboq va Shuvax edi.

³Yoxshonning Shava va Dedon degan o‘g‘illari bor edi. Dedonning nasli Ashur, Latush va Lum xalqlari edi.

⁴Midiyonning o‘g‘illari Efax, Ifar, Xano‘x, Avido va Eldax edilar. Xaturodan bino bo‘lgan o‘g‘illari mana shular edilar.

⁵Ibrohim butun mol–mulkini o‘g‘li Is’hoqqa berdi.

⁶Ibrohim hayot ekan, cho‘rilaridan [1] ko‘rgan o‘g‘illariga hadyalar berdi va o‘sha o‘g‘illarini Is’hoqning oldidan nariga — sharq tomondagi yurtga jo‘natdi.

⁷Ibrohim 175 yil yashab,

⁸nuroniy yoshda, keksayib, olamdan o‘tdi.

⁹O‘g‘illari Is’hoq bilan Ismoil uni Mamre sharqidagi Maxpala dalasining chetida joylashgan g‘orga dafn qildilar. Bu dala ilgari Xet xalqidan bo‘lgan Zo‘xar o‘g‘li Efro‘nniki edi.

¹⁰Bu dalani Ibrohim Xet xalqidan [2] sotib olgan edi. Ibrohim bu g‘orda xotini Soraning yoniga dafn qilindi [3].

¹¹Ibrohim vafot etgandan keyin, Xudo uning o‘g‘li Is’hoqqa baraka berdi. Is’hoq Ber–Laxay–Ruy qudug‘i [4] yonida istiqomat qilardi.

¹²Soraning Misrlik cho‘risi Hojar Ibrohimga tug‘ib bergan Ismoilning nasl–nasabi tarixi quyidagichadir:

¹³Tug‘ilish tartibiga ko‘ra, Ismoil o‘g‘illarining ismlari quyidagicha: to‘ng‘ich o‘g‘li — Navayot, keyingilari Kedar, Adbal, Mivsom,

¹⁴Mishmo, Dumax, Masso,

¹⁵Hadad, Temo, Yatur, Nofish va Kedemax.

¹⁶Ismoilning bu o‘n ikki o‘g‘li o‘n ikki qabilaning yo‘lboshchisi bo‘ldilar. O‘sha qabilalar chodir qurib joylashgan yerlarga ularning ismlari berildi.

¹⁷Ismoil 137 yoshida olamdan o‘tdi.

¹⁸Ismoilning nasli Ossuriyaga ketaverishda — Misrning sharqidagi Xavila bilan Shur [5] orasida o‘rnashdi. Qarindoshlariga dushman bo‘lib yashardilar [6].

¹⁹Ibrohim o‘g‘li Is’hoqning xonadoni tarixi quyidagichadir. Ibrohim Is’hoqning otasi edi.

²⁰Is’hoq Rivqoga uylanganda qirq yoshda edi. Rivqo Batuvalning qizi bo‘lib, akasi Lobon edi. Batuval Oramlik bo‘lib, Paddon–Oramdan [7] edi.

²¹Rivqoning bolasi bo‘lmadi. Is’hoq xotini uchun Egamizga iltijo qildi. Egamiz uning iltijolarini eshitdi. Rivqo homilador bo‘ldi.

²²Rivqoning qornidagi bolalari bir–biri bilan urishardilar. Rivqo: “Agar shunaqa bo‘lsa, homilador bo‘lishimning nima foydasi bor?!” [8] deb bu haqda Egamizdan so‘radi.

²³Egamiz Rivqoga shunday dedi: “Sening qorningda ikkita xalq bor, Sendan tug‘ilganlar ikki xalqqa bo‘linar [9]. Biri ikkinchisidan kuchli chiqajak, Kattasi kichigiga xizmat qilajak.”

²⁴Rivqoning oy–kuni yaqinlashib, egizak tug‘di.

²⁵To‘ng‘ichi tug‘ilganda, qip–qizil [10] ekan. Uning tanasi jun matoga o‘xshardi. Shuning uchun uning ismini Esov qo‘ydilar [11].

²⁶Ukasi esa Esovning tovonini ushlab tug‘ildi, shuning uchun uning ismini Yoqub qo‘ydilar [12]. Egizaklar tug‘ilganda, Is’hoq oltmish yoshda edi.

²⁷Bolalar ulg‘aydilar. Esov — dala–dashtni yaxshi ko‘radigan mohir ovchi, Yoqub esa uyda o‘tirishni yoqtiradigan, beozor odam bo‘ldi.

²⁸Esov ovlab kelgan hayvonlarning go‘shtini Is’hoq tanovul qilib, lazzat olar, shuning uchun u Esovni yaxshi ko‘rardi. Rivqo esa Yoqubni yaxshi ko‘rardi.

²⁹Bir kuni Yoqub yasmiq [13] shovla pishirayotgan edi, Esov ochqaganidan sulayib daladan kelib qoldi.

³⁰Esov Yoqubga: — Menga ana shu qizil ovqatingdan bergin, o‘lguday qornim ochdi, — dedi. (Shuning uchun u Edom [14] degan ism ham olgan.)

³¹— Bo‘pti, — dedi Yoqub, — lekin buning evaziga menga to‘ng‘ichlik huquqingni [15] sot.

³²— E, to‘ng‘ichlik huquqimdan menga nima foyda, qornim ochganidan o‘lay deb turibman, — dedi Esov.

³³— Oldin menga qasam ich, — dedi Yoqub. Esov Yoqubga qasam ichdi. Shunday qilib, u to‘ng‘ichlik huquqini Yoqubga sotdi.

³⁴Shundan keyin Yoqub Esovga non bilan yasmiq shavla berdi. Esov yeb–ichib, o‘rnidan turdi–da, o‘z ishlari bilan chiqib ketdi. Shunday qilib, Esov o‘zining to‘ng‘ichlik huquqini mensimadi.