Read O‘zbek tilidagi Muqaddas Kitob, 2013 Ibtido 27 Bible Online

Ibtido 27 - O‘zbek tilidagi Muqaddas Kitob, 2013 bible

Ibtido 27

¹Is’hoq qaridi, ko‘zlari xiralashib, ko‘rmay qolganda, katta o‘g‘li Esovni chaqirdi: — O‘g‘lim! — Labbay, otajon! — deb javob berdi Esov.

²— Ko‘rib turibsan, men qarib qoldim. To‘satdan o‘lib qolishim mumkin.

³Endi yoyingni, o‘qlaringni olib, dalaga chiq, menga bironta hayvonni ovlab kel.

⁴Keyin men yaxshi ko‘radigan bironta mazali taom tayyorlab keltir. Men taomni yeb, o‘limimdan oldin seni duo qilayin.

⁵Is’hoq o‘g‘li Esovga gapirayotganda, Rivqo eshitib turgan edi. Esov dalaga ovga ketganda,

⁶Rivqo o‘g‘li Yoqubga dedi: — Akang Esovga otangning aytgan gapini eshitib qoldim:

⁷Otang unga: “Menga bironta hayvon ovlab kel, men yaxshi ko‘radigan bironta mazali taom tayyorlagin, taomni yeb, o‘limimdan oldin Egam oldida seni duo qilayin”, dedi.

⁸Endi mening gaplarimni yaxshilab eshit, aytganimni qil, o‘g‘lim.

⁹Suruvga borib, menga ikkita uloqchani tanlab olib kel. Uloqchalardan otang yaxshi ko‘radigan mazali taom tayyorlab beray.

¹⁰Sen taomni otangning oldiga olib kirib, unga yegizgin, toki otang o‘limidan oldin seni duo qilsin.

¹¹— Onajon, bilasiz–ku o‘zingiz, akam Esov serjun, mening terim esa silliq, — dedi Yoqub Rivqoga.

¹²— Mabodo otam meni paypaslab ushlab ko‘rsa, nima bo‘ladi? Aldayotganimni otam bilib qoladi. Otam meni duo qilish o‘rniga la’natlaydi.

¹³— O‘sha la’nat menga kelsin, bolaginam, — dedi Rivqo. — Endi aytganimni qil, bor, uloqchalarni olib kel.

¹⁴Yoqub onasining buyrug‘iga itoat etib, ikkita uloqchani olib keldi. Rivqo uloqchalardan Is’hoq yaxshi ko‘rgan mazali taom tayyorladi.

¹⁵So‘ng u Esovning uydagi yaxshi kiyimlarini oldi–da, Yoqubga kiygizdi.

¹⁶Uloqchalarning terisini Yoqubning qo‘llariga va bo‘ynining tuksiz joylariga o‘radi.

¹⁷O‘zi tayyorlagan mazali taom bilan nonni o‘g‘li Yoqubning qo‘liga berdi.

¹⁸Shunday qilib, Yoqub lagan to‘la taomni otasining oldiga olib kirdi. — Assalomu alaykum, otajon! — Va alaykum assalom! Qaysi biringsan, o‘g‘lim, Esovmisan, Yoqubmisan?

¹⁹— To‘ng‘ichingiz Esovman, — dedi Yoqub otasiga. — Aytganingizni qildim, mana, ovimdan siz yaxshi ko‘rgan taom tayyorladim. Turing, yeb, meni duo qiling.

²⁰Is’hoq o‘g‘liga: — Darrov topib keldingmi, o‘g‘lim? — dedi. — Egangiz Xudo yo‘limni o‘ngladi, — deb javob berdi Yoqub.

²¹Shundan keyin Is’hoq Yoqubga dedi: — Yaqinroq kel–chi, o‘g‘lim, ushlab ko‘ray–chi, haqiqatan ham o‘g‘lim Esovmisan yoki yo‘qmi, bilayin.

²²Yoqub otasiga yaqinroq bordi. Is’hoq uni paypaslab: — Ovoz — Yoqubning ovozi, qo‘llar esa Esovning qo‘llari, — dedi.

²³Yoqubning qo‘llari Esovning qo‘llariga o‘xshab serjun tuyulgani uchun, Is’hoq uni tanimadi. Shuning uchun Is’hoq Yoqubni duo qilishga chog‘landi–yu, lekin yana so‘radi:

²⁴— Sen haqiqatan o‘g‘lim Esovmisan? — Ha, Esovman, — deb javob berdi u.

²⁵Shundan keyin Is’hoq: — Endi taomni keltir, — dedi. — Taomingdan yeb, seni duo qilayin. Yoqub taomni otasiga keltirib berdi. Is’hoq taomni yeb bo‘lgach, Yoqub unga sharob keltirdi. Is’hoq sharobni ham ichdi.

²⁶So‘ngra Is’hoq unga: — Yaqinroq kelib, meni o‘p, o‘g‘lim, — dedi.

²⁷Yoqub yaqinlashib, otasini o‘pdi. Is’hoq uning kiyimlari hidini iskab, shunday duo qildi: “O, o‘g‘limning yoqimli hidi Egam marhamat qilgan Dalaning hidiga o‘xshar.

²⁸Xudoyim yog‘dirsin senga Osmon shabnamini, Bersin yerning unumdor tuprog‘ini, Mo‘l–ko‘l don va sharobni.

²⁹Xizmat qilsin senga xalqlar, Ta’zim qilsin senga el–uluslar. Hukmron bo‘lgin qarindoshlaring ustidan, Ta’zim qilsin onangning nasli senga. Seni la’natlagan la’nati bo‘lsin, Seni duo qilgan baraka topsin.”

³⁰Is’hoq Yoqubni duo qilib bo‘lishi bilanoq, Yoqub otasi huzuridan endi chiqqan ham ediki, akasi Esov ovdan qaytib kelib qoldi.

³¹U ham mazali taom tayyorlab, otasi oldiga olib kirdi. — Otajon, turing, sizga olib kelgan ovimning go‘shtidan yeb, meni duo qiling.

³²— Sen kimsan? — so‘radi Is’hoq undan. — To‘ng‘ich o‘g‘lingiz Esovman, — deb javob berdi u.

³³Is’hoq hayajondan titrab ketib dedi: — Ov ovlab so‘yib, menga olib kelgan kim edi? Sen kelmasingdan oldin, men go‘shtni endigina yeb bo‘lgan edim! Men uni duo qildim, endi duo olgan udir!

³⁴Esov otasining so‘zlarini eshitgach, haddan tashqari qattiq, achchiq nola qildi. — Meni ham duo qiling, otajon! — deb yolvordi u otasiga.

³⁵Lekin Is’hoq: — Ukang oldimga kiribdi, u meni aldabdi, — dedi. — Senga atalgan duoni ukang oldi.

³⁶— Unga Yoqub, deb ism qo‘yilgani bekorga emas ekan–da, — dedi Esov. — U meni ikki marta aldadi–ya! [1] Birinchi marta to‘ng‘ichlik huquqimni olgan edi [2], endi esa menga atalgan duoni o‘g‘irlabdi. Menga bironta ham duo saqlab qo‘ymadingizmi? — deb yana so‘radi u.

³⁷— Men Yoqubni sening ustingdan hukmron qildim, — dedi Is’hoq Esovga. — Uning hamma qarindosh–urug‘larini ham o‘ziga xizmatkor qilib berdim. Don bilan sharobni ham unga berib bo‘ldim. Senga beradigan hech narsa qolmadi–ku, o‘g‘lim!

³⁸— Nahotki menga bironta ham duo qoldirmagan bo‘lsangiz?! — deb o‘tindi Esov. — Meni ham duo qiling, otajon! — deb dod solib yig‘lay boshladi.

³⁹Is’hoq o‘g‘liga shunday javob berdi: “Sening manziling yerning unumdor tuprog‘idan nari bo‘lsin, Osmonning shabnamidan mahrum bo‘lsin.

⁴⁰Sen qilichning damida yashagaysan, Ukangga xizmat qilib o‘tgaysan. Isyon qilganingda esa sen U solgan bo‘yinturuqni uloqtirib tashlagaysan.”

⁴¹Yoqub Esovning duosini o‘g‘irlagani uchun, Esov uni juda yomon ko‘rib qoldi. Esov o‘ziga o‘zi: “Otamning kuni bitib qoldi, azasi o‘tgandan keyin Yoqubni o‘ldiraman”, dedi.

⁴²Lekin kimdir Esovning niyatini Rivqoga yetkazdi. Rivqo Yoqubni chaqirib, unga: — Esov seni o‘ldirmoqchi bo‘lib, o‘ziga taskin berib yuribdi ekan, — dedi.

⁴³— Endi gapimga quloq sol. Hoziroq Xoronga [3] — Lobon akamning oldiga jo‘na.

⁴⁴Akang g‘azabidan tushguncha, Lobon akamning yonida yur.

⁴⁵Esov sening qilmishlaringni unutib, g‘azabidan tushgandan keyin, orqangdan birortasini jo‘nataman, qaytarib olib keladi. Bo‘lmasa, bir kunda akangdan ham, sendan ham ayrilib qolaman [4].

⁴⁶Shundan keyin Rivqo Is’hoqqa dedi: — Esovning anavi Xet [5] xotinlari dastidan jonimdan to‘ydim. Agar Yoqub ham o‘shalarga o‘xshagan birorta Xet qiziga uylansa, unda hayotim nima kechadi?