Read O‘zbek tilidagi Muqaddas Kitob, 2013 Ibtido 29 Bible Online

Ibtido 29 - O‘zbek tilidagi Muqaddas Kitob, 2013 bible

Ibtido 29

¹Yoqub yo‘lida davom etib, nihoyat, sharqdagi yurtga yetib keldi.

²U dashtda bir quduqni uzoqdan turib ko‘rdi. Quduq yonida uch to‘p poda yotardi. Chorva shu quduqdan sug‘orilar, quduqning og‘zi kattakon tosh bilan yopib qo‘yilardi.

³Cho‘ponlar hamma qo‘y–echkilarni u yerga haydab kelganlaridan keyin, quduqning og‘zidagi toshni surishib, qo‘ylarni sug‘orishardi–da, quduqning og‘zini yana o‘sha tosh bilan berkitib qo‘yishardi.

⁴Yoqub cho‘ponlarning oldiga borib, ulardan: — Birodarlar, qayerliksizlar? — deb so‘radi. — Xorondanmiz [1], — deb javob berishdi ular.

⁵— Lobon degan odamni taniysizlarmi? — deb so‘radi Yoqub, — u Naxo‘rning nabirasi bo‘ladi. — Ha, taniymiz, — deb javob berishdi cho‘ponlar.

⁶— Lobon tinch–omonmi? — deb so‘radi Yoqub. — Yaxshi, — deb javob berishdi cho‘ponlar. — Ana, uning qizi Rohila ham qo‘ylarini haydab shu yoqqa kelyapti.

⁷— Suruvni bir joyga to‘plabsizlar, oqshomgacha hali erta, hozir payti emas–ku! — dedi Yoqub. — Qo‘ylarni sug‘orib, o‘tlatgani qaytarib olib bormaysizlarmi?

⁸Cho‘ponlar shunday javob berishdi: — Hamma suruvni bu yerga to‘plab, toshni quduqning og‘zidan surganimizdan keyingina qo‘ylarni sug‘oramiz.

⁹Yoqub cho‘ponlar bilan gaplashib turganda, Rohila otasining qo‘ylarini haydab kelib qoldi. Rohila cho‘ponlik qilardi.

¹⁰Yoqub tog‘asi Lobonning qizi Rohilani va uning qo‘ylarini ko‘rdi. Quduq yoniga borib, quduq og‘zidagi toshni surdi–da, tog‘asining qo‘ylarini sug‘ordi.

¹¹Keyin Rohilani o‘pdi, xursandchiligidan ko‘zlariga yosh keldi.

¹²— Men otangning jiyani, ammang Rivqoning o‘g‘liman, — deb Yoqub o‘zini tanishtirdi. Rohila yugurib borib, otasiga xabar berdi.

¹³Lobon, singlimning o‘g‘li kelibdi, deb eshitdi–yu, o‘sha zahoti, Yoqubni kutib olishga shoshildi. Yoqub bilan quchoqlashib ko‘rishdi. Lobon Yoqubni uyiga olib keldi. Yoqub boshidan kechirganlarini tog‘asiga aytib berdi.

¹⁴— Sen mening jigarimsan, oilamning bir a’zosisan, — dedi Lobon. Yoqub Lobonnikida bir oy turgandan keyin,

¹⁵Lobon unga dedi: — Sen mening qarindoshim bo‘lsang ham, tekinga ishlamasliging kerak. Ayt–chi, xizmat haqingga nima istaysan?

¹⁶Lobonning ikki qizi bo‘lib, kattasining ismi — Leax, kichiginiki — Rohila edi.

¹⁷Leaxning ko‘zlari chiroyli [2], Rohila esa har jihatdan go‘zal — yuzlari chiroyli, qaddi–qomati kelishgan edi.

¹⁸Yoqub Rohilani sevardi, shuning uchun: “Men sizga kichik qizingiz Rohila uchun yetti yil xizmat qilib beraman”, dedi.

¹⁹Shunda Lobon unga dedi: — Mayli, roziman, qizimni begonaga berganimdan ko‘ra, senga berganim yaxshi–ku. Menikida qolaver.

²⁰Shunday qilib, Yoqub Rohilaga qalin uchun yetti yil xizmat qildi. Lekin Yoqubning Rohilaga bo‘lgan sevgisi shunchalik kuchli ediki, yetti yil bir necha kunday tuyuldi.

²¹Nihoyat, Yoqub Rohilaga uylanadigan payt ham keldi. — Men shartni bajardim, — dedi Yoqub Lobonga. — Endi qizingizga uylanishimga ijozat bering.

²²Lobon butun yurt aholisini to‘plab, ziyofat berdi.

²³[23-24] Lekin o‘sha kuni kechasi Lobon Rohilaning o‘rniga, to‘ng‘ich qizi Leaxni Yoqubga berdi. Leaxga xizmat qilsin, deb Lobon o‘zining Zilpo degan cho‘risini Leaxga berdi. Yoqub Leaxning yoniga kirdi.

²⁵Yoqub ertalab turib qarasa, yonida Leax yotibdi! — Bu nima qilganingiz?! — dedi Yoqub g‘azablanib Lobonga. — Men sizga yetti yil Rohila uchun xizmat qildim–ku! Nimaga meni aldadingiz?

²⁶Bizning yurtdagi odat bo‘yicha, katta qizdan oldin kichigi turmushga berilmaydi, — deb javob berdi Lobon.

²⁷— Bir haftada bu qizimning to‘yi tantanasi tugaydi, kutib tur. Agar menga yana yetti yil xizmat qilib beradigan bo‘lsang, xizmating evaziga kichkinasini ham senga beraman.

²⁸Yoqub rozi bo‘ldi. Bir haftadan keyin Yoqub bilan Leaxning to‘yi tantanasi tugadi. Lobon Rohilani ham Yoqubga berdi.

²⁹Lobon o‘zining Bilxax degan cho‘risini qizi Rohilaga bergan edi.

³⁰Shunday qilib, Yoqub Rohilaning yoniga kirdi. U Leaxdan ko‘ra, Rohilani ko‘proq yaxshi ko‘rardi. Yoqub Lobonga yana yetti yil xizmat qilib berdi.

³¹Yoqub Leaxga ko‘ngilsiz ekanini Egamiz ko‘rib turardi. Shuning uchun U Leaxni tug‘ishga qodir qildi, Rohila esa befarzand o‘taverdi.

³²Leax homilador bo‘lib, o‘g‘il tug‘di. U: “Egam mening baxtsizligimni ko‘rdi, endi erim menga albatta ko‘ngil qo‘yadi”, deb o‘g‘lining ismini Ruben [3] qo‘ydi.

³³Leax homilador bo‘lib, yana o‘g‘il tug‘di. “Erim menga ko‘ngilsizligini Egam eshitib, yana bir o‘g‘il berdi”, deb o‘g‘lining ismini Shimo‘n [4] qo‘ydi.

³⁴Leax yana homilador bo‘ldi va yana o‘g‘il tug‘di. U: “Erimga uchta o‘g‘il tug‘ib berdim, endi u albatta menga bog‘lanib qoladi”, deb o‘g‘lining ismini Levi [5] qo‘ydi.

³⁵Leax yana homilador bo‘lib, yana o‘g‘il tug‘di. U: “Endi Egamga hamdu sano aytaman”, deb o‘g‘lining ismini Yahudo [6] qo‘ydi. Shundan keyin u bola tug‘ishdan qoldi.