Read O‘zbek tilidagi Muqaddas Kitob, 2013 Ibtido 30 Bible Online

Ibtido 30 - O‘zbek tilidagi Muqaddas Kitob, 2013 bible

Ibtido 30

¹Rohila Yoqubga bola tug‘ib bera olmagach, endi opasiga hasad qila boshladi. — Menga farzand bering, bo‘lmasa o‘laman! — dedi u Yoqubga.

²Yoqub Rohiladan qattiq g‘azablandi. — Nima, men Xudomanmi?! Seni bepusht qilib yaratgan Xudo–ku!

³Shunda Rohila Yoqubga dedi: — Ana, cho‘rim Bilxaxning yoniga kiring. U menga bola tug‘ib bersin, toki cho‘rim orqali men ham bolali bo‘lay [1].

⁴Shunday qilib, Rohila eriga Bilxaxni olib berdi. Yoqub Bilxaxning yoniga kirdi.

⁵Bilxax homilador bo‘lib, Yoqubga o‘g‘il tug‘ib berdi.

⁶Rohila: “Xudoyim meni oqladi, U mening iltijoimni eshitib, menga o‘g‘il ato etdi”, deb o‘g‘lining ismini Dan [2] qo‘ydi.

⁷Bilxax yana homilador bo‘lib, Yoqubga ikkinchi o‘g‘lini tug‘ib berdi.

⁸Rohila: “Opam bilan qattiq olishib, men yutib chiqdim”, deb o‘g‘lining ismini Naftali [3] qo‘ydi.

⁹Leax bola tug‘ishdan qolganini anglab yetdi. Shunda u ham o‘zining cho‘risi Zilponi Yoqubga olib berdi.

¹⁰Zilpo Yoqubga o‘g‘il tug‘ib berdi.

¹¹Leax: “Menga omad kulib boqdi”, deb o‘g‘lining ismini Gad [4] qo‘ydi.

¹²So‘ngra Zilpo Yoqubga ikkinchi o‘g‘lini tug‘ib berdi.

¹³Leax: “Naqadar baxtliman–a! Endi ayollar meni juda baxtli ekan, deb aytishadi”, deya o‘g‘lining ismini Osher [5] qo‘ydi.

¹⁴Bug‘doy o‘rimi payti edi. Bir kuni Ruben dalaga borganda, mehrigiyo o‘simligini [6] topib olib, onasi Leaxga keltirdi. Rohila: “O‘g‘lingning mehrigiyolaridan menga ham ber”, deb iltimos qildi.

¹⁵Lekin Leax g‘azab bilan javob qildi: — Erimni tortib olganing kamlik qildimi?! Endi o‘g‘limning mehrigiyolarini ham tortib olmoqchimisan?! — O‘g‘lingning mehrigiyolari evaziga bu kecha erim sening yoningga kiradi, unga ijozat beraman, — dedi Rohila.

¹⁶Kechqurun Yoqub daladan kelganda, Leax unga peshvoz chiqdi. — Bu kecha mening yonimga kirishingiz kerak, — dedi u eriga. — O‘g‘lim daladan topib kelgan mehrigiyoga sizni almashtirdim. Shunday qilib, Yoqub Leaxning yoniga kirdi.

¹⁷Xudo Leaxning iltijolariga javob berdi. U yana homilador bo‘lib, Yoqubga beshinchi o‘g‘lini tug‘ib berdi.

¹⁸Leax: “Cho‘rimni erimga olib berganim uchun, Xudoyim meni mukofotladi”, deb o‘g‘lining ismini Issaxor [7] qo‘ydi.

¹⁹So‘ngra u yana homilador bo‘lib, Yoqubga oltinchi o‘g‘lini tug‘ib berdi.

²⁰Leax dedi: “Xudoyim menga yaxshi hadya berdi. Endi erim meni hurmat qiladigan bo‘ladi, chunki unga oltita o‘g‘il tug‘ib berdim.” Shunday deb, o‘g‘lining ismini Zabulun [8] qo‘ydi.

²¹Keyin Leax qiz tug‘ib, ismini Dina qo‘ydi.

²²Nihoyat, Xudo Rohilaga ham marhamat qildi va uning iltijolariga javob berib, bola tug‘ishga qodir qildi.

²³Rohila homilador bo‘lib, o‘g‘il tug‘di. “Xudo menga o‘g‘il ato etib, sharmandaligimni olib tashladi”, dedi.

²⁴“Egam menga yana o‘g‘il bersin”, deb o‘g‘lining ismini Yusuf [9] qo‘ydi.

²⁵Rohila Yusufni tuqqandan keyin ko‘p o‘tmay, Yoqub Lobonga dedi: — Ijozat bersangiz, men yurtimga qaytmoqchiman.

²⁶Xotinlarim bilan bolalarimni ham olib ketsam, degandim. O‘zingiz bilasiz, sizga ko‘p xizmatim singgan, sizga peshana terimni to‘kib ularni topganman. Endi ketishga ijozat bersangiz.

²⁷Lobon esa unga shunday javob berdi: — Endi iltimos qilaman, mening gapimga quloq sol: fol ochtirib ko‘rgan edim, Egam menga sen tufayli baraka berganini bildim [10].

²⁸Xizmat haqingni ayt, to‘lay.

²⁹— O‘zingiz bilasiz: uzoq yillar davomida sizga ko‘p xizmat qildim. Mol–qo‘ylaringiz mening mehnatim tufayli qanchalik ko‘payganini bilasiz.

³⁰Aslida men kelmasimdan oldin molingiz oz edi, endi esa boyligingiz haddan ziyod ko‘paydi. Men tufayli Egam sizga hamma narsada baraka berdi [11]. Endi oilamni o‘ylaydigan payt keldi.

³¹— Xizmat haqingga nima istaysan? — deb yana so‘radi Lobon. — Menga hech qanday xizmat haqi kerak emas, — deb javob qildi Yoqub. — Agar rozi bo‘lsangiz, bir taklifim bor. Men qo‘y–echkilaringizni boqaveray.

³²Bugun suruvingizni oralab, olachipor va xol–xol qo‘ylaringizni, qora qo‘zilaringizni, echkilaringizdan ham xol–xolini va olachiporini [12] ajratib olay. Xizmat haqimga shularni bersangiz kifoya.

³³Agar men halol bo‘lmasam, siz keyin osonlikcha bilib olasiz. Mening xizmatimni tekshirgani kelganingizda, qo‘y–echkilarimning orasida birortasi ola–bula, xol–xol bo‘lmasa, yoki qo‘zilarimning orasida ham birortasi qora bo‘lmasa, meni o‘g‘ri, deb hisoblashingiz mumkin.

³⁴— Yaxshi, sen aytganday bo‘la qolsin, — dedi Lobon.

³⁵Lobon o‘sha kuni oqi bor xol–xol va olachipor taka hamda urg‘ochi echkilarni ajratib oldi, qora qo‘zilarni ham ayirib oldi. Hammasini o‘g‘illarining ixtiyoriga berdi.

³⁶Lobonning o‘g‘illari o‘sha qo‘y–echkilarni Yoqub turgan joydan uch kunda boradigan joyga olib ketdilar. Yoqub esa Lobonning qolgan qo‘y–echkilarini boqaverdi.

³⁷Yoqub terak, bodom va chinor daraxtining novdalaridan olib, novdalarni yo‘l–yo‘l qilib po‘stlog‘ini shildi.

³⁸So‘ngra u po‘stlog‘i tozalangan novdalarni qo‘y–echkilarga ko‘rinadigan joyga — suv ichadigan oxurlar ichiga qo‘ydi [13]. Chunki Lobonning qo‘y–echkilarini sug‘organi olib kelganda, hayvonlar shu yerda juftlashar edi.

³⁹Qo‘y–echkilar oq yo‘li bor novdalarni ko‘rib turganda juftlashib, yo‘l–yo‘l, olachipor va xol–xol nasl berardi.

⁴⁰Yoqub Lobonning boshqa qo‘y–echkilaridan sovliqlarini [14] ajratib oldi. Sovliq qo‘ylar juftlashayotganda, Yoqub qo‘ylarning yuzini Lobonning suruvidagi yo‘l–yo‘l va qop–qora hayvonlarga qaratib qo‘yardi. Shu tariqa Yoqub Lobonning qo‘y–echkilaridan o‘zining suruvini vujudga keltirdi [15] va Lobonnikidan alohida qilib qo‘ydi.

⁴¹Suruvdagi sog‘lom urg‘ochi qo‘y yoki echkilar juftlashishga tayyor bo‘lganda, Yoqub po‘stlog‘i archilgan novdalarni hayvonlarning oxuriga tashlab qo‘yardi. Hayvonlar yo‘l–yo‘l novdalarni ko‘rib turganlarida juftlashardilar.

⁴²Lekin u nimjon hayvonlarga shunday qilmasdi. Oqibatda Lobon nimjon qo‘y–echkilarga, Yoqub esa sog‘lom qo‘y–echkilarga ega bo‘lib qoldi.

⁴³Shu yo‘l bilan Yoqubning qo‘y–echkilari tezlik bilan ko‘payib bordi, u juda ham boyib ketdi, ko‘plab qul va cho‘rilarga, tuyalar va eshaklarga ega bo‘ldi.