Read O‘zbek tilidagi Muqaddas Kitob, 2013 Ibtido 33 Bible Online

Ibtido 33 - O‘zbek tilidagi Muqaddas Kitob, 2013 bible

Ibtido 33

¹Yoqub qarasa, Esov kelayotgan ekan, yonida to‘rt yuzta odami ham bor. Yoqub bolalarini Leaxga, Rohilaga va ikkala cho‘risiga [1] taqsimladi.

²Cho‘rilari bilan ularning bolalarini eng oldinga, Leax bilan uning bolalarini ulardan keyin, Rohila bilan Yusufni esa oxiriga qo‘ydi.

³Yoqubning o‘zi ularning oldida bordi. Akasining oldiga yetib borguncha yetti marta egilib ta’zim qildi.

⁴Esov ham ukasini kutib olgani yugurib borib, uni quchoqlab oldi. Yoqubning bo‘yniga osilib, o‘pdi. Ikkovi ham yig‘lar edilar.

⁵Esov ayollarga va bolalarga qarab: — Yoningdagi bu odamlar senga kim bo‘ladi? — deb so‘radi. — Men, qulingizga Xudo inoyat qilib bergan bolalarim, — dedi Yoqub.

⁶Shundan keyin cho‘rilar bilan ularning bolalari Esovning oldiga kelishib, unga egilib ta’zim qildilar.

⁷Ulardan keyin Leax bilan uning bolalari yaqin kelib, egilib ta’zim qilishdi. Oxirida Yusuf bilan Rohila yaqin kelib, egilib ta’zim qildilar.

⁸— Menga suruvlaru podalar jo‘natibsan, bundan maqsading nima edi? — deb so‘radi Esov. — Hazratimning iltifotiga sazovor bo‘lishim uchun hadya qilib yuborgan edim, — deb javob berdi Yoqub.

⁹— Rahmat, uka, o‘zimniki juda ko‘p, o‘zingniki o‘zingga buyursin, — dedi Esov.

¹⁰— Yo‘q, iltimos, agar meni iltifotingizga sazovor bilsangiz, hadyalarimni olasiz, — deb turib oldi Yoqub. — Siz meni shunday yaxshi kutib oldingizki, men uchun sizning yuzingizni ko‘rish — Xudoning yuzini ko‘rishga o‘xshaydi.

¹¹Iltimos qilaman, hadyalarimni oling. Xudo menga inoyat qilib, kerakli hamma narsani berdi. Yoqub qattiq iltimos qilavergandan keyin, oxiri, Esov hadyalarni olishga rozi bo‘ldi.

¹²— Qani, endi ketaylik, men senga yo‘l ko‘rsatib boraman.

¹³Yoqub esa shunday dedi: — O‘zingiz ko‘rib turibsiz, hazratim, bolalarim chiniqmagan, qo‘y–sigirlarim ham bolalagan. Qo‘y–sigirlarimni bir kungina qistab haydasalar, butun chorva nobud bo‘ladi.

¹⁴Shuning uchun mendan oldinda ketaversangiz. Men chorvaning yurishiga va bolalarning qadamiga qarab sekin boraveraman. Siz bilan Seir yurtida [2] uchrashamiz.

¹⁵— Bo‘pti, bo‘lmasa, odamlarimdan ba’zilarini sen bilan qoldiray, ham sizlarga yo‘l ko‘rsatib boradi, ham qo‘riqlab ketadi, — dedi Esov. — Nima qilasiz ovora bo‘lib?! Menga ko‘p mehribonlik ko‘rsatyapsiz, shunga ham rahmat.

¹⁶Esov o‘sha kuni Seirga qaytib ketdi.

¹⁷Yoqub esa oilasi bilan Suxo‘tga qarab ketdi. U yerda o‘ziga bir uy, chorvasi uchun qo‘ralar qurdi. Shuning uchun bu joyga Suxo‘t [3], deb nom berildi.

¹⁸Shunday qilib, Yoqub Paddon–Oramdan [4]Kan’on yurtidagi Shakam shahriga [5] eson–omon qaytib keldi. Shahar tashqarisida chodirlarini tikdi.

¹⁹U chodir tikkan joylar Xamo‘r degan odamning o‘g‘illariga qarashli mulk edi. Xamo‘r Shakamning otasi edi. Yoqub bu joylarni Xamo‘rning o‘g‘illaridan yuz bo‘lak kumushga [6] sotib oldi.

²⁰U bu yerda qurbongoh qurib, bu joyni: “Xudo Isroilning Xudosidir” [7], deb atadi.