Read O‘zbek tilidagi Muqaddas Kitob, 2013 Ibtido 34 Bible Online

Ibtido 34 - O‘zbek tilidagi Muqaddas Kitob, 2013 bible

Ibtido 34

¹Bir kuni Yoqubning Leaxdan ko‘rgan qizi Dina shu yerlik qizlarni ko‘rishga bordi.

²Bu yerning begi Xamo‘r bo‘lib, u Xiv urug‘idan edi. Xamo‘rning o‘g‘li Shakam qizni ko‘rib qolib, ushladi va uning nomusiga tegdi.

³Shakam Dinani qattiq sevib qoldi, qizning sevgisini qozonishga harakat qildi.

⁴Otasiga: “Shu qizni menga olib bering”, deb aytdi.

⁵Yoqub qizining nomusi toptalganini eshitdi. Yoqubning o‘g‘illari esa dalada mol–qo‘ylarini boqib yurgan edilar. Ular qaytib kelgunlaricha Yoqub o‘zini bosib turdi.

⁶Shakamning otasi Xamo‘r bu ish yuzasidan gaplashgani Yoqubning oldiga keldi.

⁷Shu paytda Yoqubning o‘g‘illari daladan kelib qolishdi. Singillari sharmanda bo‘lganini eshitishdi–yu, qattiq g‘azablanib, tutaqib ketdilar. Shakam Yoqubning qizini bulg‘ab, Isroilda sharmandali ish qilgan edi. Bunday ish hech bo‘lmasligi kerak edi.

⁸Xamo‘r ularga: — O‘g‘lim Shakamning qizingizga ishqi tushib qolibdi, iltimos, qizingizni o‘g‘limga bersangizlar, — dedi.

⁹— Bir–birimiz bilan quda–andachilik qilaylik, qizlaringizni o‘g‘illarimizga olib beraylik, o‘g‘illaringizga qizlarimizni olib beringlar.

¹⁰Shunda yurtimizda biz bilan birga yashayverasizlar, xohlagan yeringizda yashayverasizlar, bemalol savdo–sotiq qilaverasizlar [1], yerlarimizdan o‘zlaringizga mulk orttirasizlar.

¹¹Shakam ham Dinaning otasi bilan akalariga iltimos qilib, dedi: — Menga muruvvat qilinglar, Dinani menga beringlar, evaziga istagan narsalaringizni beraman.

¹²Qancha qalin yoki sovg‘a talab qilasizlar — men uchun ahamiyati yo‘q, beraman. Faqat qizingizga uylansam bo‘ldi.

¹³Shakam Dinani sharmanda qilgani uchun, Shakam bilan Xamo‘rni Dinaning akalari aldadilar.

¹⁴Ular Shakam bilan Xamo‘rga dedilar: — Singlimizni qandaydir sunnatsiz odamga berolmaymiz. Agar bersak, biz isnodga qolamiz [2].

¹⁵Biz faqat bir shart bilan rozi bo‘lamiz: hamma erkaklaringiz bizga o‘xshab sunnat qilinishlari kerak.

¹⁶Shunda biz qizlarimizni sizlarga beramiz, sizlarning qizlaringizni olamiz. Sizlarning orangizda yashab, sizlar bilan bir xalq bo‘lamiz.

¹⁷Lekin bizning shartimizga ko‘nmasdan, sunnat qilinmasalaringiz, singlimizni [3] olib ketamiz.

¹⁸Ularning gapiga Xamo‘r bilan Shakam bajonidil rozi bo‘lishdi.

¹⁹Shakam Dinaga xushtor bo‘lib qolganidan, bu talabni bajarishni tezlashtirdi. U oilasida eng hurmatga sazovor odam edi.

²⁰Xamo‘r bilan Shakam shahar darvozasiga [4] kelib, shaharning oqsoqollariga shunday deyishdi:

²¹— U odamlar — bizning do‘stlarimiz. Ular bizning yurtimizda yashab, savdo–sotiq qilaversinlar. Yurtimiz keng, ularga ham yetadi. Shunda bir–birimiz bilan qiz olib, qiz berishamiz.

²²Ular faqat bir shart bilan bizning oramizda yashab, biz bilan bir xalq bo‘lishga rozi: oramizdagi hamma erkaklar, ular singari, sunnat bo‘lishlari kerak ekan.

²³Agar biz shunday qilsak, ularning hamma qo‘y–echkilari, mol–mulki bizniki bo‘ladi. Kelinglar, ularning aytganlariga rozi bo‘laylik, toki ular bizning oramizda yashab qolishsin.

²⁴Shahar darvozasiga borganlar Xamo‘r bilan uning o‘g‘li Shakamning gaplarini eshitgach, rozi bo‘ldilar. Butun shahar erkaklari sunnat qilindilar.

²⁵Oradan uch kun o‘tdi. Shaharning hamma erkaklari sunnat qilinganlari uchun hali ham og‘rib yotgan edilar. Yoqubning ikki o‘g‘li — Dinaning akalari Shimo‘n bilan Levi [5] qilichlarini oldilar va bamaylixotir shaharga kirdilar. Shahardagi hamma erkakni o‘ldirdilar.

²⁶Xamo‘r bilan uning o‘g‘li Shakamni ham o‘ldirib, Shakamning uyidan Dinani olib ketdilar.

²⁷Yoqubning qolgan o‘g‘illari, singlimizni sharmanda qilganlari uchun qasos olamiz, deb jasadlarni talab, shaharni talon–taroj qildilar.

²⁸Ular shahardagi va dalalardagi jamiki qo‘y–echkilarni, mol podalarini, eshaklarni olib ketdilar.

²⁹Shahar xalqining hamma boyliklarini, uylaridagi hamma narsasini o‘lja qilib, bolalarini va ayollarini asir qilib olib ketdilar.

³⁰Shunda Yoqub Shimo‘n bilan Leviga dedi: — Sizlar boshimga balo keltirdingiz. Endi bu yurtdagi Kan’on va Pariz xalqlari, qolaversa, hamma meni yomon ko‘radi. Biz ozchilik bo‘lsak, axir. Ular birgalashib hujum qilib qolgudek bo‘lsa, hammamiz qirilib ketamiz–ku!

³¹Shunda o‘g‘illar: — Singlimizga fohishaday muomala qilishiga yo‘l qo‘ymaymiz! — deb e’tiroz bildirdilar.