Read O‘zbek tilidagi Muqaddas Kitob, 2013 Ibtido 39 Bible Online

Ibtido 39 - O‘zbek tilidagi Muqaddas Kitob, 2013 bible

Ibtido 39

¹Ismoiliy savdogarlar Yusufni Misrga olib kelishgach, uni Misrlik Po‘tifar degan bir odamga sotishdi. Po‘tifar fir’avnning a’yonlaridan biri bo‘lib, qo‘riqchilar boshlig‘i edi.

²Egamiz Yusuf bilan birga bo‘lib, unga ko‘p omad keltirardi. Yusuf Misrlik xo‘jayinining xonadonida xizmat qilib yuraverdi.

³Po‘tifar ko‘rdiki, Egamiz Yusuf bilan birga bo‘lib, har bir qilgan ishida unga omad beryapti.

⁴Shunday qilib, Yusuf xo‘jayinining iltifotiga sazovor bo‘ldi, xo‘jayinining mulozimi bo‘lib qoldi. Po‘tifar Yusufni o‘z xonadoni ustidan nazoratchi qilib, butun mol–mulkini unga ishonib topshirdi.

⁵Po‘tifar Yusufni nazoratchi qilib tayinlagani uchun Egamiz Yusuf tufayli Po‘tifarning xonadoni ahliga, uning uyidagi va dalasidagi butun mol–mulkiga baraka berdi.

⁶Shunday qilib, Po‘tifar butun mol–mulkini Yusufning ixtiyoriga qoldirdi. Po‘tifarning yeydigan ovqatidan boshqa hech narsa bilan ishi bo‘lmasdi. Yusuf juda chiroyli, kelishgan yigit edi.

⁷Oradan ma’lum vaqt o‘tgach, xo‘jayinining xotini Yusufga ko‘zlarini suzib: “Men bilan birga bo‘l”, deb taklif qildi.

⁸Lekin Yusuf rad qildi va xo‘jayinining xotiniga dedi: — O‘zingiz o‘ylab ko‘ring, men bu yerda bo‘lganim uchun, xo‘jayinim xonadonidagi hech bir narsa to‘g‘risida qayg‘urmaydi, hamma narsasini mening qo‘limga topshirib qo‘ydi.

⁹Bu xonadonda hech kim mendan katta emas. Sizdan boshqa biror narsani mendan ayamadi. Chunki siz uning xotinisiz. Qanday qilib men shu qadar qabihlik qilib, Xudoga qarshi gunoh qilaman?!

¹⁰Po‘tifarning xotini har kuni Yusufga taklif qilsa ham, lekin Yusuf rad qilib, u bilan bo‘lmadi.

¹¹Bir kuni Yusuf o‘z ishlarini bajarish uchun uyga kirdi. Uyda xizmatkorlardan birontasi ham yo‘q edi.

¹²Ayol Yusufning kiyimidan ushlab: “Men bilan bo‘l!” dedi. Lekin Yusuf tashqariga qochib chiqib ketdi. Yusufning kiyimi esa ayolning qo‘lida qoldi.

¹³Ayol ko‘rdiki, Yusuf kiyimini uning qo‘lida qoldirib, tashqariga qochib chiqib ketdi.

¹⁴Shunda ayol uydagi xizmatkorlarni chaqirdi. Ayol ho‘ngrab dedi: — Qaranglar! Manavi ibroniyni erim, sizlarni tahqirlasin, deb olib kelgan ekan! U men bilan yotgani kirgan ekan, ovozim boricha baqirdim.

¹⁵Dodlaganimdan keyin, kiyimini yonimda qoldirib, tashqariga qochib chiqib ketdi.

¹⁶Xo‘jayin uyga kelguncha, ayol Yusufning kiyimini o‘zida saqlab turdi.

¹⁷Ayol eriga ham o‘sha voqeani aytib berdi: “Siz uyimizga olib kelgan anavi ibroniy qulvachchasi xonamga kirib, meni tahqirlamoqchi bo‘ldi.

¹⁸Men dod solgan edim, u kiyimini yonimda qoldirib, tashqariga qochib chiqib ketdi.”

¹⁹Po‘tifar xotinidan Yusufning qilgan muomalasini eshitgach, g‘azablandi.

²⁰Po‘tifar Yusufni ushlab, shohning mahbuslari saqlanadigan zindonga tashladi. Shunday qilib, Yusuf zindonda qolaverdi.

²¹Lekin Egamiz Yusuf bilan birga bo‘lib, unga inoyat ko‘rsatardi. Natijada zindonboshi Yusufga iltifot qilardi.

²²Zindonboshi zindondagi hamma mahbuslarga qarab turishni Yusufga yuklab qo‘ydi, zindonda bo‘ladigan hamma ishlarga Yusuf mas’ul edi.

²³Egamiz Yusuf bilan birga bo‘lib, uning hamma ishlariga omad berar edi. Shuning uchun Yusuf mas’ul bo‘lgan ishlarga zindonboshi aralashmasdi.