Read O‘zbek tilidagi Muqaddas Kitob, 2013 Ibtido 4 Bible Online

Ibtido 4 - O‘zbek tilidagi Muqaddas Kitob, 2013 bible

Ibtido 4

¹Odam Ato xotini Momo Havoga yaqinlashgandan keyin, Momo Havo homilador bo‘ldi. Momo Havo o‘g‘il ko‘rdi va: “Xudoning qudrati bilan o‘g‘il topdim”, deb nomini Qobil [1] qo‘ydi.

²Keyinroq Momo Havo ikkinchi o‘g‘lini tug‘di va unga Hobil, deb ism qo‘ydi. Bolalar ulg‘ayib, Hobil — qo‘ychivon, Qobil — dehqon bo‘ldi.

³Vaqti kelib, Qobil yerning hosilidan Egamizga nazr olib keldi.

⁴Hobil ham suruvidagi birinchi tug‘ilgan qo‘zilardan bittasini tanlab olib, so‘ydi va qo‘zining yog‘li joylarini Egamizga nazr qilib olib keldi. Egamiz Hobilni va uning nazrini manzur ko‘rdi,

⁵lekin Qobilning o‘zi ham, uning nazri ham ma’qul bo‘lmadi. Qobil qattiq xafa bo‘lib, qovog‘ini soldi.

⁶Shunda Egamiz Qobilga dedi: “Nega xafa bo‘lding? Nimaga qovog‘ingni solding?

⁷Agar sen to‘g‘ri ish qilsang, seni qabul qilmasmidim?! [2] Bilginki, yomon ish qilsang, eshigingda gunoh poylab turadi, sherga o‘xshab tashlanib, seni o‘lja qilmoqchi bo‘ladi. Gunoh sening ustingdan hukmron bo‘lishni istaydi. Lekin gunohni sen mag‘lub qilishing kerak.”

⁸Qobil ukasi Hobilga: “Yur, dalaga boramiz”, deb taklif qildi [3]. Ular dalaga borganlarida, Qobil ukasiga tashlanib, uni o‘ldirdi.

⁹Egamiz Qobildan: “Ukang Hobil qayerda?” — deb so‘radi. — Bilmayman, nima, ukam qayerga borsa, men uning qadamini o‘lchab yurishim kerakmi?! — deb e’tiroz bildirdi.

¹⁰Shunda Egamiz: — Nima qilib qo‘yding?! — dedi. — Eshitib ol: ukangning qoni Menga yerdan faryod qilmoqda.

¹¹Ukangning qoni bilan yerni bulg‘aganing uchun, endi la’nati bo‘lasan, yerga hech qachon ishlov berolmaysan.

¹²Yerga qanchalik jon kuydirib ishlov bermagin, yer sen uchun boshqa mo‘l hosil yetishtirmas. Hozirdan boshlab sen yer yuzida doimo bir joydan boshqa joyga qochib, boshpanasiz, daydib yurasan.

¹³Qobil Egamizga: — Jazoyim shunchalik og‘irki, bir o‘zim ko‘tara olmayman, — deb javob berdi.

¹⁴— Bugun Sen meni yerimdan haydading. Endi men Sendan uzoq bo‘lib yashayman, yer yuzida sarson–sargardon bo‘lib, qochib yuraman. Endi meni birortasi uchratib qolib, o‘ldirib qo‘yishi mumkin.

¹⁵Shunda Egamiz: — Yo‘q, hech kim seni o‘ldirmaydi! — deb javob berdi Qobilga. — Kim seni o‘ldirsa, undan yetti karra o‘ch olaman. Shunday qilib, Egamiz, Qobilni birov urib o‘ldirib qo‘ymasin, deb unga tamg‘a qo‘ydi.

¹⁶So‘ngra Qobil Egamizdan uzoqlashib ketdi va Adanning sharqidagi Nod [4] degan yerga o‘rnashdi.

¹⁷Qobilning xotini homilador bo‘lib, o‘g‘il tug‘di. O‘g‘liga Xano‘x, deb ism qo‘ydilar. Qobil bir shahar qurdi va shaharga o‘g‘lining otini berib, Xano‘x, deb atadi.

¹⁸Xano‘x bir o‘g‘il ko‘rib, ismini Irod qo‘ydi. Iroddan — Maxuvol, Maxuvoldan — Matushol, Matusholdan — Lamex degan o‘g‘illar tug‘ildi.

¹⁹Lamex ikkita xotin oldi. Bittasining ismi Oida, boshqasiniki Zillo edi.

²⁰Oida bir o‘g‘il ko‘rib, ismini Yobol qo‘ydi. Chodirlarda yashaydigan cho‘ponlarning ota–bobosi Yobol bo‘ldi.

²¹Ukasining ismi Yuval edi. Yuval lira va nay chaluvchi sozandalarning ota–bobosi bo‘ldi.

²²Zillo ham bir o‘g‘il ko‘rib, ismini Tuvalqobil qo‘ydi. Tuvalqobil birinchi bo‘lib bronza va temir asboblar yasagan edi. Tuvalqobilning Namax degan singlisi bor edi.

²³Lamex xotinlariga dedi: “Oida va Zillo, menga quloq solinglar. Ey, xotinlarim! Gapimni eshitinglar! Bir odamni o‘ldirdim meni yaralagani–chun, Yana yosh yigitni o‘ldirdim meni urgani–chun.

²⁴Qobilni o‘ldirgandan yetti karra o‘ch olinsa, Lamexni o‘ldirgandan yetmish yetti karra o‘ch olinur.”

²⁵Odam Ato bilan xotini yana bir o‘g‘il ko‘rdilar. Momo Havo: “Qobil o‘ldirgan Hobilning o‘rniga Xudo boshqa farzand berdi”, deb ismini Shis [5] qo‘ydi.

²⁶Shis ulg‘ayib, u ham bir o‘g‘il ko‘rdi va ismini Eno‘sh qo‘ydi. O‘sha paytda odamlar endi Egamizga sajda qila boshlagan edilar.