Read O‘zbek tilidagi Muqaddas Kitob, 2013 Ibtido 40 Bible Online

Ibtido 40 - O‘zbek tilidagi Muqaddas Kitob, 2013 bible

Ibtido 40

¹Bir kuni soqiysi [1] bilan novvoyi Misr fir’avnini qattiq xafa qildi.

²Fir’avn bu ikkala a’yonidan — soqiy bilan novvoyidan g‘azablanib,

³ularni ham Yusuf yotgan zindonga qamatib qo‘ydi. Zindon qo‘riqchilar boshlig‘ining uyida edi.

⁴Qo‘riqchilar boshlig‘i Yusufni soqiy bilan novvoyning xizmatiga qo‘ydi. Yusuf ularga xizmat qila boshladi. Ular ancha vaqt zindonda qoldilar.

⁵Fir’avnning soqiysi bilan novvoyi zindonda yotar ekanlar, bir kuni kechasi ikkovi ham tush ko‘rdilar. Har bir tushning o‘ziga xos ma’nosi bor edi.

⁶Ertalab Yusuf ularning yoniga keldi. Ularning yuzi g‘amgin edi. Yusuf buni payqadi.

⁷— Nimaga bugun juda g‘amgin ko‘rinasizlar? — deb so‘radi Yusuf ulardan.

⁸— Biz tush ko‘rgan edik, bu yerda tushimizni ta’birlab beradigan biron kimsa yo‘q, — deb javob berishdi ular. — Tushlarni ta’birlash Xudodandir, — dedi Yusuf. — Marhamat, tushingizni menga ayting–chi.

⁹Avval soqiy tushini Yusufga aytib berdi: — Tushimda tok ko‘ribman. Tok oldimda turgan emish.

¹⁰Tokning uchta novdasi bor ekan. Novdalar darrov kurtak otib, meva tugib uzumlar pishibdi.

¹¹Fir’avnning qadahi qo‘limda emish. Men uzumlarni olib, fir’avnning qadahiga uzumning sharbatini siqibman. Keyin qadahni fir’avnning qo‘liga beribman.

¹²Yusuf unga dedi: — Tushingizning ta’biri shunday bo‘lur: uchta novda — uch kun degani.

¹³Uch kun ichida fir’avn sizni zindondan ozod qilib, oldingi mansabingizga qaytaradi: siz yana soqiy bo‘lib, ilgarigiday shohga qadah tutasiz.

¹⁴Lekin sizdan bir iltimos: ishlaringiz yaxshi bo‘lib ketganda, meni ham eslab qo‘ying. Siz menga iltifot ko‘rsatib, fir’avnga men to‘g‘rimda ham eslatib qo‘ying: meni zindondan chiqarib olsin.

¹⁵Men aslida ibroniylar yurtidan o‘g‘irlab keltirilganman. Buning ustiga, yana bu yerda zindondaman, lekin hech qanday aybim yo‘q.

¹⁶Novvoy qarasa, tushning ta’biri yaxshilikka ekan. U Yusufga dedi: — Men ham tush ko‘ribman. Boshimda uchta non savatni olib ketayotgan emishman.

¹⁷Eng tepadagi savatda fir’avnga atalgan pishiriqlarning har turidan bor ekan. Lekin qushlar uchib kelib, boshimdagi savatdan pishiriqlarni cho‘qiyotgan ekan.

¹⁸— Tushingizning ta’biri shunday bo‘lur, — dedi Yusuf. — Uchta savat — uch kun degani.

¹⁹Uch kun ichida fir’avn boshingizni tanangizdan judo qilib, tanangizni tik o‘rnatilgan xodaning uchiga qoqtiradi. Qushlar tanangizni cho‘qib yeydi.

²⁰Oradan uch kun o‘tgach, fir’avn tug‘ilgan kunida barcha a’yonlariga ziyofat berdi. Soqiysi bilan novvoyini ham zindondan a’yonlari oldiga chaqirtirdi.

²¹Fir’avn soqiysini ozod qilib oldingi mansabiga qaytardi. Shunday qilib, soqiy yana fir’avnga qadah tutadigan bo‘ldi.

²²Lekin Yusuf aytganday, fir’avn novvoyning boshini oldirib, jasadini tik o‘rnatilgan xodaning uchiga qoqtirdi.

²³Soqiy esa Yusufni eslamadi, uni unutib yubordi.