Read O‘zbek tilidagi Muqaddas Kitob, 2013 Ibtido 46 Bible Online

Ibtido 46 - O‘zbek tilidagi Muqaddas Kitob, 2013 bible

Ibtido 46

¹Shunday qilib, Yoqub [1] butun mol–mulkini olib, yo‘lga chiqdi. U Bershevaga [2] yetib kelib, otasi Is’hoqning Xudosiga qurbonliklar qildi.

²Tunda Xudodan Yoqubga vahiy keldi: — Yoqub! Yoqub! — Labbay! — dedi u.

³— Men Xudoman, otangning Xudosiman, — dedi Xudo. — Qo‘rqmasdan Misrga boraver, Men u yerda sendan buyuk xalq yarataman.

⁴Men sen bilan birga Misrga borib, Sening naslingni u yerdan O‘zim olib chiqaman. Sen Yusufning qo‘lida jon berasan.

⁵So‘ngra Yoqub Bershevadan ketdi. O‘g‘illar otasini, bolalarini, xotinlarini fir’avn yuborgan aravalarga o‘tqazdilar.

⁶Ular Kan’onda orttirgan chorvasini, hamma mol–mulkini olib, Misrga ketdilar. Yoqub va uning hamma oila a’zolari

⁷— o‘g‘illari, qizlari va nabiralari ketdilar.

⁸Misrga ketgan Isroil xalqi, ya’ni Yoqub naslining ismlari quyidagichadir: Yoqubning to‘ng‘ich o‘g‘li Ruben va

⁹uning o‘g‘illari — Xano‘x, Palluv, Xazron va Karmi.

¹⁰Shimo‘n va uning o‘g‘illari — Yamuvol, Yomin, Oxad, Yoxin, Zo‘xar va Shovul. (Shovulning onasi Kan’onlik edi.)

¹¹Levi va uning o‘g‘illari — Gershon, Qohot, Marori.

¹²Yahudo va uning o‘g‘illari — G‘ur, O‘nan, Shelo, Paraz va Zerax. (Lekin G‘ur va O‘nan Kan’on yurtida vafot etgan edilar [3].) Paraz va uning o‘g‘illari — Xazron va Xomul.

¹³Issaxor va uning o‘g‘illari — To‘lo, Puvax, Yoshuv [4] va Shimron.

¹⁴Zabulun va uning o‘g‘illari — Sared, Elo‘n va Yaxliyol.

¹⁵Yoqubning Leaxdan ko‘rgan ana shu nasli va qizi Dina Paddon–Oramda [5] tug‘ilgan edilar. Yoqubning Leaxdan tarqalgan nasli jami bo‘lib o‘ttiz uch kishi edi.

¹⁶Gad va uning o‘g‘illari — Zafo‘n [6], Xagi, Shuno, Ezbo‘n, Eri, Aro‘d [7] va Erali.

¹⁷Osher va uning o‘g‘illari — Yimnax, Yishvo, Yishvi va Bariyo. Bularning Serax degan singillari ham bor edi. Bariyoning o‘g‘illari — Xaber va Malxiyol.

¹⁸Yoqubning Zilpodan tug‘ilgan nasli ana shulardir. Lobon qizi Leaxga Zilponi cho‘ri qilib bergan edi. Ular hammasi bo‘lib o‘n olti kishi edi.

¹⁹Yoqubning xotini Rohiladan tug‘ilgan o‘g‘illar — Yusuf bilan Benyamin.

²⁰Yusuf Misr yurtida xotini Osanatdan Manashe va Efrayimni ko‘rdi. Osanat On shahrining [8]ruhoniysi Po‘tiferoning qizi edi.

²¹Benyamin o‘g‘illari — Belax, Boxir, Oshbol, Gera, No‘mon, Exi, Ro‘sh, Mupim, Xupim va Ard.

²²Yoqubning Rohiladan tarqalgan nasli ana shulardir. Ular hammasi bo‘lib o‘n to‘rt kishi edi.

²³Dan va uning o‘g‘li — Xushim.

²⁴Naftali va uning o‘g‘illari — Yaxzayol, Go‘no, Izar va Shillem.

²⁵Yoqubning Bilxaxdan tarqalgan nasli ana shulardir. Bilxaxni Lobon qizi Rohilaga cho‘ri qilib bergan edi. Hammasi bo‘lib yetti kishi edi.

²⁶Yoqub bilan birga Misrga kelgan uning nasli hammasi bo‘lib oltmish olti kishi [9] edi. Kelinlari bu hisobga kirmasdi.

²⁷Yusuf Misrda ikki o‘g‘il ko‘rgan edi. Shunday qilib, Yoqub xonadonidan Misrga kelganlar hammasi bo‘lib yetmish kishi [10] edi.

²⁸Yoqub Yahudoga: “Yusuf bizni Go‘shen yerlariga [11] boshlab borsin”, deb oldin uni Yusufning oldiga jo‘natgan edi. Ular Go‘shenga yetib kelganlaridan keyin,

²⁹Yusuf aravasini qo‘shib, otasini kutib olish uchun Go‘shenga ketdi. Yusuf otasini ko‘rishi bilanoq, uni quchoqlab, bo‘yniga osilib, uzoq yig‘ladi.

³⁰Yoqub Yusufga: — Tirik ekaningni ko‘zlarim bilan ko‘rdim, endi o‘lsam ham armonim yo‘q, — dedi.

³¹Yusuf akalariga, otasi xonadonining qolgan ahliga dedi: — Men borib, fir’avnga: “Kan’on yurtidan aka–ukalarim, otamning qolgan oila a’zolari mening oldimga kelishdi”, deb xabar berayin.

³²Men fir’avnga yana: “Ular cho‘pon, chorvadorlik bilan shug‘ullanishadi, mol–qo‘ylarini, bor mulkini olib kelishibdi”, deb aytayin.

³³Fir’avn sizlarni chaqirib: “Kasb–koringiz nima?” deb so‘rab qolsa,

³⁴unga: “Biz, qullaringiz, yoshligimizdan hozirgacha cho‘ponlik bilan mashg‘ulmiz, ota–bobolarimiz ham cho‘pon bo‘lib o‘tishgan”, deb aytinglar. Toki Go‘shen yerlariga o‘rnashib olishlaringizga u ijozat bersin. Chunki Misrliklar cho‘ponlardan hazar qilishadi.