Read O‘zbek tilidagi Muqaddas Kitob, 2013 Ibtido 6 Bible Online

Ibtido 6 - O‘zbek tilidagi Muqaddas Kitob, 2013 bible

Ibtido 6

¹Yer yuzida insonlar borgan sari ko‘paya boshladi. Qizlar ham tug‘ilgan edi.

²Ilohiy zotlar [1], bu qizlar [2] chiroyli ekan, deb yoqtirganlarini o‘zlariga xotin qilib olaverdilar.

³Shunda Egamiz aytdi: “Men ato etgan Ruh [3] insonlar bilan abadiy qolmaydi [4], chunki ular o‘ladigan jonlardir [5]. Kelgusida ular 120 yil umr ko‘rsin.”

⁴O‘sha kunlarda, undan keyin ham bu olamda ulkan pahlavonlar [6] yashadi. Ilohiy zotlar bilan ayol zotidan [7] tug‘ilgan bu pahlavonlar qadimgi davrning buyuk qahramonlari, mashhur jangchilari bo‘lgan edilar.

⁵Egamiz ko‘rdiki, yer yuzida inson zoti qilayotgan qabihliklar juda ham ko‘p ekan. Ularning ko‘nglida faqat qabih niyat bor ekan.

⁶U yer yuzida insonlarni yaratganidan pushaymon bo‘ldi, yurakdan afsuslandi.

⁷Egamiz aytdi: “O‘zim yaratgan inson zotini yer yuzidan qirib yuboraman. Men inson bilan birga hayvonlarni, sudralib yuruvchi jonivorlarni, hasharotlarni, qushlarni ham qiraman, ularni yaratganimdan pushaymon bo‘lyapman.”

⁸Faqat Nuh Egamizning marhamatiga sazovor bo‘lgan edi.

⁹Nuhning nasl–nasabi tarixi quyidagichadir. O‘sha davrda yer yuzidagi solih, benuqson odam faqat Nuh bo‘lib, Xudoga hamroh bo‘lib yashardi.

¹⁰Nuhning Som, Xom, Yofas degan uchta o‘g‘li bor edi.

¹¹Endilikda yer yuzi Xudoning oldida axloqsizlikka, zo‘ravonlikka to‘lib–toshib ketgan edi.

¹²Xudo ko‘rdiki, olam buzilib ketgan, yer yuzidagi jamiki insoniyat yo‘ldan ozgan edi.

¹³Xudo Nuhga aytdi: “Men butun yer yuzidagi insonlarni qirib tashlashga qaror qildim. Chunki yer yuzi ularning dastidan zo‘ravonlikka to‘lib–toshdi. Endi ularni butun yer bilan birga yo‘q qilmoqchiman.

¹⁴O‘zingga yaxshi qattiq yog‘ochdan [8] kema yasa, kemaning ichida xonalar ham yasab, kemaning ichi–tashini qora saqich bilan suvab chiq.

¹⁵Kemaning uzunligi 300 tirsak, kengligi 50 tirsak, balandligi 30 tirsak [9] bo‘lsin.

¹⁶Kemaning tomini yasaganingda, tom bilan kemaning devori oralig‘ida bir tirsak [10] ochiq joy qoldir [11]. Eshigini kemaning yon tomonidan yasa. Kemani uch qavatli qilib yasa.

¹⁷Men yer yuzini to‘fonga bostirib, har qanday tirik jonzotni qirib tashlayman. Yer yuzidagi hamma narsa nobud bo‘ladi.

¹⁸Sen bilan esa Men ahd qilaman. Sen kema ichiga kirasan, sen bilan birga o‘g‘illaring, xotining, kelinlaring ham kiradi.

¹⁹Hayvonlarning har bir turidan bir juftdan — erkagi va urg‘ochisidan kema ichiga o‘zing bilan olib kirasan, toki to‘fon paytida ular sen bilan birga tirik qolsin.

²⁰Qushlarning, hayvonlarning, sudralib yuruvchi jonivorlarning va hasharotlarning har bir turidan juft–juft qilib, o‘zing bilan olib kirasan, toki ular tirik qolsin.

²¹O‘zing bilan oziq–ovqatlarning har bir turidan g‘amlab ol. Oziq–ovqatlar oilang bilan barcha jonzotlarga yegulik bo‘ladi.”

²²Nuh hamma narsani Xudo amr etganday qildi.