Read O‘zbek tilidagi Muqaddas Kitob, 2013 Ibtido 7 Bible Online

Ibtido 7 - O‘zbek tilidagi Muqaddas Kitob, 2013 bible

Ibtido 7

¹Nihoyat, vaqti kelib, Egamiz Nuhga aytdi: “Sen butun oila a’zolaring bilan kema ichiga kir. Yer yuzidagi xalqlar orasida Mening oldimda solih bo‘lib yurganlardan faqat seni topdim, xolos.

²O‘zing bilan halol hayvonlarning urg‘ochi va erkagidan yetti juft, harom hayvonlarning [1] urg‘ochi va erkagidan esa bir juft ol.

³Qushlarning har bir turidan — erkagi va urg‘ochisidan ham yetti juft tanlab ol, toki butun yer yuzida bu jonzotlarning turlari saqlanib qolsin.

⁴Yetti kundan keyin, men yer yuziga qirq kechayu qirq kunduz davomida yomg‘ir yog‘diraman. O‘zim yaratgan har bir tirik narsani yer yuzidan yo‘q qilaman.”

⁵Nuh hammasini Xudo amr etganday qildi.

⁶Yer yuzini to‘fon bosganda, Nuh 600 yoshda edi.

⁷Nuh bilan birga o‘g‘illari, xotini, kelinlari to‘fondan omon qolish uchun kemaning ichiga kirdilar.

⁸Halol va harom hayvonlardan, qushlardan, yerda sudralib yuruvchi jonivorlardan, hasharotlardan har biri

⁹— erkak va urg‘ochisi juft–juft bo‘lib Nuh bilan birga kemaga kirdi. Zotan, Xudo Nuhga shunday amr qilgan edi.

¹⁰Yetti kundan keyin yer yuzini to‘fon bosa boshladi.

¹¹Nuh 600 yoshga kirganda, ikkinchi oyning o‘n yettinchi kuni yer ostidagi buloqlar otilib chiqdi [2], osmonning qopqalari ochildi [3].

¹²[12-13] Ayni o‘sha kuni Nuh bilan birga uning o‘g‘illari Som, Xom va Yofas, xotini va uchala kelini kema ichiga kirdilar. Qirq kechayu qirq kunduz tinmay yomg‘ir yog‘di.

¹⁴Ular bilan birga yovvoyi hayvonlardan, chorvadan, yerda sudralib yuruvchi hamma jonivor va hasharotlardan, qushlardan — hammasining har bir turidan kemaga kirdi.

¹⁵Bu tirik jonzotlar ikkita–ikkitadan bo‘lib Nuh bilan birga kemaga kirdi.

¹⁶Xudo Nuhga amr qilganday, hamma jonivorlarning erkak va urg‘ochisi kemaga kirib bo‘lgach, Egamiz Nuhning orqasidan eshikni yopdi.

¹⁷Yer yuzida qirq kun davomida to‘fon bo‘lib, suv yerni ko‘mdi, kemani yerdan yuqori ko‘tardi.

¹⁸Suv yer ustida tobora ko‘payib borar, kema suv yuzida suzardi.

¹⁹Suv yer yuzida shunchalik to‘lib–toshdiki, baland tog‘lar ham ko‘milib ketdi.

²⁰Suv tog‘lardan o‘n besh tirsak [4] balandlikka ko‘tarildi.

²¹Yer yuzida yurgan jamiki jonzot — qushlar, chorva, yovvoyi hayvonlar, uymalashib yurgan jonivorlar, inson zoti nobud bo‘ldi.

²²Quruq yer ustida yashab turgan hamma tirik jonzot nobud bo‘ldi.

²³Yer yuzidagi har qanday jonzotni — insonlarni, hayvonlarni, sudralib yuruvchi jonivorlarni, hasharotlarni, qushlarni Xudo yo‘q qilib yubordi, hammasi yer yuzidan qirilib ketdi. Faqat Nuh va u bilan birga kemada bo‘lganlargina tirik qoldilar, xolos.

²⁴Suv 150 kun davomida yer yuzini qoplab turdi.