Read O‘zbek tilidagi Muqaddas Kitob, 2013 Ibtido 9 Bible Online

Ibtido 9 - O‘zbek tilidagi Muqaddas Kitob, 2013 bible

Ibtido 9

¹Xudo Nuh bilan uning o‘g‘illariga marhamat qilib, ularga dedi: “Uvali–juvali bo‘linglar, yer yuzini to‘ldiringlar.

²Yer yuzidagi jamiki hayvonlar, osmondagi hamma qushlar, yerda sudralib yuruvchi jonivor va hasharotlarning hammasi, dengizdagi hamma baliqlar sizlardan qo‘rqib, hurkadigan bo‘ladi. Bularning hammasi ustidan sizlar hukmron bo‘lasizlar.

³O‘tni va sabzavotlarni sizlarga yemish qilib berganim singari, hamma tirik jonzotlarni ham sizlar uchun yemish qilib beraman.

⁴Lekin etni qoni bilan yemaysizlar. Qonda jon bo‘lgani uchun, Men buni taqiqlayman.

⁵Qotillik jazolanadi. Insonning jonini olgan insondan Men xun talab qilaman, insonni o‘ldirgan har qanday hayvon o‘ldirilishi lozim.

⁶Kimki inson qonini to‘ksa, Uning qonini ham inson to‘kur. Zero, inson zotini Men, Xudo, Yaratgandir O‘z suratimda.

⁷Barakali bo‘lib ko‘payinglar, yer yuzida to‘lib–toshib, tobora ortib boringlar.”

⁸Xudo Nuh bilan uning o‘g‘illariga yana gapirdi:

⁹“Men endi sizlar bilan va sizlarning avlodingiz bilan ahd qilaman.

¹⁰Sizlar bilan kemadan chiqqan hamma tirik jonzotlar — qushlar, chorva, yer yuzida yashovchi hamma jonivorlar bilan ham ahd qilaman.

¹¹Sizlar bilan qat’iy ahd qilaman: bundan buyon barcha jonzot to‘fon tufayli qirilib ketmaydi, yer yuzini qirib bitiradigan to‘fon boshqa hech qachon bo‘lmaydi, deb va’da beraman.

¹²Sizlar bilan, jamiki tirik jonzotlar bilan qilayotgan abadiy ahdimning alomati shu bo‘ladi:

¹³Men bulutlar orasida O‘z kamalagimni [1] hosil qilaman. Bu kamalak Mening olam ahli bilan qilgan ahdimning alomati bo‘ladi.

¹⁴Men bulutlarni yer ustiga olib kelganimda, kamalak bulutlar orasida ko‘rinib turadi.

¹⁵Ana o‘shanda Men O‘zim bilan sizlar va hamma tirik jonzotlar o‘rtasida qilgan ahdimni yodimda tutaman. To‘fon endi hech qachon jamiki jonzotlarni yo‘q qilmaydi.

¹⁶Kamalak bulutlar orasida turganda, Men kamalakni ko‘rib, yer yuzidagi tirik jonzotlar bilan O‘zim qilgan abadiy ahdimni yodimda tutaman.”

¹⁷Xudo yana Nuhga dedi: “Yer yuzidagi jamiki tirik jonzotlar bilan Men qilayotgan ahdning alomati ana shudir.”

¹⁸Nuhning kemadan chiqqan o‘g‘illari Som, Xom va Yofas edilar. Keyinroq Xom o‘g‘il ko‘rib, ismini Kan’on qo‘ydi.

¹⁹Nuhning uchala o‘g‘lidan esa butun yer yuzidagi xalqlar tarqaldi.

²⁰To‘fondan keyin Nuh dehqon bo‘ldi va ilk bor tokzor barpo qildi.

²¹Bir kuni u o‘zi tayyorlagan maydan ichdi. Mast bo‘lib, chodirida yalang‘och yotgan edi,

²²Kan’onning otasi Xom otasining yalang‘och yotganini ko‘rdi va tashqariga chiqib, akalariga aytdi [2].

²³Som bilan Yofas bir kiyimni olib, yelkalariga tashladilar. Orqalari bilan chodirga kirib, otalarining yalang‘och tanasini ko‘rmaslik uchun, yuzlarini teskari o‘girib, uning ustini kiyim bilan yopib qo‘ydilar.

²⁴Nuh o‘ziga kelgach, kenja o‘g‘lining qilmishini bildi.

²⁵Shunda Nuh dedi: “Kan’on [3] la’nati bo‘lsin! Qullarning ham quli bo‘lsin akalariga [4]!”

²⁶Nuh yana dedi: “Somning Xudosi Egamizga Hamdu sanolar bo‘lsin. Kan’on Somga qul bo‘lsin!

²⁷Xudo Yofasga mo‘l yer bersin [5], Uning nasli Somning Xalqi bilan yashasin! Kan’on Yofasga qul bo‘lsin!”

²⁸Nuh to‘fondan keyin 350 yil yashadi.

²⁹U 950 yoshida olamdan o‘tdi.