Read O‘zbek tilidagi Muqaddas Kitob, 2013 2 Shohlar 16 Bible Online

2 Shohlar 16 - O‘zbek tilidagi Muqaddas Kitob, 2013 bible

2 Shohlar 16

¹Dovud Zaytun tog‘ining narigi tomoniga oshib o‘tayotganda, Mefibositning [1] xizmatkori Zibaxga duch kelib qoldi. Zibax egarlangan ikkita eshak ustiga ikki yuzta non, yuz hovuch mayiz [2], yuz hovuch ho‘l meva va bir mesh sharob yuklab olgan edi.

²— Bularni nimaga olib kelding? — deb so‘radi shoh Zibaxdan. — Eshaklarni shohning xonadoni ahli minadi, non bilan ho‘l mevalarni yigitlar yeydi, sharobni esa sahroda toliqib sulayib qolganlar ichadi, — deb javob berdi Zibax.

³— Xo‘jayiningning nabirasi qayerda? — so‘radi Dovud. — Mefibosit Quddusda qoldi, — dedi Zibax. — Isroil xalqi bugun bobomning shohligini menga qaytarib beradi, deb o‘ylayapti u.

⁴— Mefibositning hamma narsasi endi seniki, — dedi shoh. — Qulingiz bo‘lay, shoh hazratlari! Tilagim shuki, har doim iltifotingizga sazovor bo‘lay, — dedi Zibax.

⁵Shoh Dovud Boxurimga yetib borganda, Shoul xonadonidan Shimax degan bir odam qarg‘anib o‘rtaga chiqdi. U Gera deganning o‘g‘li edi.

⁶Shohning o‘ng va chap tomonida hamma odamlari, qo‘riqchilari himoya qilib turishardi. Shunga qaramay, Shimax Dovudga va uning a’yonlariga tosh otardi.

⁷Shimax shunday deb haqorat qilar edi: — Yo‘qol, ket, ey, razil odam, sening qo‘ling qon!

⁸Sen Shoulning o‘rniga shoh bo‘lgan eding. Shoul xonadonidan qancha qonlar to‘kkan bo‘lsang, Egam hammasini o‘z boshingga qaytardi, shohlikni o‘g‘ling Absalomga berdi. Qo‘ling qon bo‘lgani uchun, qilmishingga yarasha kulfat tortyapsan.

⁹— Bu o‘lik ko‘ppak nega shoh hazratlarini haqorat qilar ekan? — dedi Zeruya o‘g‘li Abushay Dovudga. — Ijozat bersinlar, borib boshini uzib tashlay.

¹⁰Lekin shoh: — Bu sizlarga aloqador ish emas, ey, Zeruya o‘g‘illari! — dedi. — Egam unga “Dovudni qarg‘a!” degani uchun, u qarg‘ayotgan bo‘lsa, kim undan: “Nega bunday qilyapsan?” deb so‘ray oladi?!

¹¹Keyin Dovud Abushay bilan barcha sipohlarga aytdi: — O‘zimning pushti kamarimdan paydo bo‘lgan o‘g‘lim meni o‘ldirmoqchi bo‘lyapti–yu, Benyamin naslidan bo‘lgan shu odamning qilig‘iga hayron bo‘lyapsizlarmi?! Qo‘yinglar uni, mayli, haqorat qilaversin, chunki unga shunday qil, deb Egam buyurgan.

¹²Balki Egam kulfatlarimni ko‘rib, bugungi haqoratlar evaziga yaxshilik qaytarar.

¹³Dovud odamlari bilan yo‘lida davom etaverdi. Dovudning yon tomonida — qir yonbag‘rida yurib ketayotgan Shimax uni qarg‘ar, tosh otardi.

¹⁴Shoh va hamrohlari boradigan joylariga yetib kelgunlaricha charchashdi va dam olish uchun to‘xtashdi.

¹⁵O‘sha paytda Absalom bilan unga ergashgan Isroil xalqi Quddusga kirdilar. Maslahatchi Oxito‘fel ham Absalom bilan birga edi.

¹⁶Dovudning do‘sti, Orx urug‘idan Xushay Absalomning yoniga borib: — Shohimizning umri uzoq bo‘lsin! Shohimizning umri uzoq bo‘lsin! — deb hayqirdi.

¹⁷Absalom Xushayga: — Do‘stingga sadoqating shumi? Nimaga do‘sting bilan ketmading? — deb so‘radi.

¹⁸— Nega ketar ekanman?! — dedi Xushay. — Men Egam va mana bu xalq, qolaversa, butun Isroil xalqi tanlagan odamni yoqlayman, o‘sha odamning yonida bo‘laman.

¹⁹Ha, men Dovudning o‘g‘li Absalomdan boshqa yana kimga ham xizmat qilardim?! Otangga qanday xizmat qilgan bo‘lsam, senga ham shunday xizmat qilaman.

²⁰Shunda Absalom Oxito‘felga qarab: — Nima qilaylik, bizga maslahat ber–chi, — dedi.

²¹Oxito‘fel shunday maslahat berdi: — Otang, saroyga qarab turasizlar, deb kanizaklarini qoldirib ketgan edi. O‘sha kanizaklarning [3] oldiga kir. Shunda sen otangni ochiqchasiga sharmanda qilganingni Isroil xalqi eshitadi. Seni qo‘llab–quvvatlagan odamlarning qarori yanada qat’iy bo‘ladi.

²²Saroy tomida Absalom uchun bir chodir qurishdi. Absalom esa jamiki Isroil xalqining ko‘zi oldida otasining kanizaklari oldiga kirdi [4].

²³O‘sha paytlari Oxito‘felning aytgan so‘zlari shunchalik dono ediki, xuddi to‘ppa–to‘g‘ri Xudodan kelganday tuyulardi. Shuning uchun, Absalom ham, Dovud qilganiday, Oxito‘felning hamma maslahatini so‘zsiz qabul qilardi.