Read O‘zbek tilidagi Muqaddas Kitob, 2013 2 Shohlar 21 Bible Online

2 Shohlar 21 - O‘zbek tilidagi Muqaddas Kitob, 2013 bible

2 Shohlar 21

¹Dovud shohligi paytida uch yil muttasil ocharchilik hukm surdi. Dovud Egamizdan shu haqda so‘ragan edi [1], Egamiz shunday javob berdi: “Qon to‘kkan Shoul va uning xonadoni bu ocharchilikka sababchi, chunki Shoul Givonliklarni qirgan edi.”

²Shundan so‘ng shoh Givonliklarni chaqirtirib keldi va ular bilan gaplashdi. Givonliklar Isroil qavmlaridan bo‘lmay, Amor xalqlarining [2] qolgan–qutgani edi. Isroil xalqi ularga, sizlarni tirik qoldiramiz, deb ont ichishgan edi–yu, lekin Shoul Isroil va Yahudo xalqi butun yurtni nazorat qilsin, deb istagan va ularni qirib tashlashga harakat qilgan edi.

³Xullas, Dovud: — Sizlar uchun nima qilay? — deb so‘radi Givonliklardan. — Egamning xalqini duo qilishingiz uchun bu gunohni qanday yuvsam bo‘ladi?

⁴Givonliklar unga: — Bizga Shoul va uning xonadonidan oltin ham, kumush ham kerak emas, Isroil xalqidan birortasini o‘ldirish niyatimiz ham yo‘q, — deb javob berishdi — Nima istasangiz, bajo qilaman, — dedi Dovud.

⁵Shundan so‘ng Givonliklar aytishdi: — Shoul bizni Isroil yurtida yashamasin, deb qirib tashlashni va bizni yo‘qotishni maqsad qilib qo‘ygan edi.

⁶Shuning uchun Shoulning o‘g‘illaridan yettitasi bizga berilsin. Biz ularni Givonda, aynan Egamiz tanlab olgan Shoulning shahrida, Egamizning huzurida o‘ldiramiz. Jasadlarini tik o‘rnatilgan xodaning uchiga qoqamiz. — Sizlarga beraman ularni, — dedi shoh.

⁷Dovud Shoulning nabirasi — Yo‘natanning o‘g‘li Mefibositga [3] rahm qildi. Dovud bilan Yo‘natan Egamizning nomini o‘rtaga qo‘yib bir–biriga qasamyod qilishgan edi.

⁸Oyo qizi Rizpa Shouldan Ormanax va Mofibaset degan o‘g‘illar ko‘rgan edi. Dovud Mefibositning o‘rniga Shoulning o‘sha ikkala o‘g‘lini oldi. Shoulning qizi Merav [4] Maxlalik Borzulay o‘g‘li Odriyoldan beshta o‘g‘il ko‘rgan edi. Dovud o‘sha o‘g‘illarning

⁹hammasini Givonliklarning qo‘liga berdi. Givonliklar yettovini tog‘da — Egamizning oldida o‘ldirib, jasadlarini tik o‘rnatilgan xodaning uchiga qoqdishdi. Yettovi ham birga jon berdi. Ular o‘ldirilganda, o‘rim–yig‘im endi boshlangan, arpa o‘rimining ilk kunlari edi [5].

¹⁰Oyo qizi Rizpa qanor [6] oldi va jasadlar yonidagi bir qirning tepasiga borib, qanorni yoydi. O‘rim payti boshlangandan to jasadlar ustiga osmondan yomg‘ir yoqqunga qadar [7] Rizpa o‘sha yerda qoldi. Jasadlarni kunduzi osmonda uchadigan qushlardan, kechalari yovvoyi hayvonlardan qo‘riqladi.

¹¹Shoulning kanizagi [8] Oyo qizi Rizpa qilgan ishni Dovudga yetkazishdi.

¹²Dovud Giladdagi Yobosh xalqining oldiga borib, Shoul va uning o‘g‘li Yo‘natanning suyaklarini ulardan oldi. Filistlar Gilbova tog‘ida Shoulni o‘ldirgan kuni uning va o‘g‘lining jasadlarini Bayt–Shan shahri maydonida devorga qoqib qo‘ygan edilar. Giladdagi Yobosh xalqi esa ikkovining jasadini yashirincha u yerdan olib ketishgan edi [9].

¹³Dovud Shoul bilan o‘g‘li Yo‘natanning suyaklarini u yerdan olib kelgandan so‘ng, o‘ldirilgan yetti kishining jasadlarini ham olishdi.

¹⁴Shoul bilan o‘g‘li Yo‘natanning suyaklarini Benyamin hududidagi Zilaga — otasi Kishning xilxonasiga dafn qilishdi. Shunday qilib, shohning hamma farmonlarini ijro etishdi. Shundan keyin Xudo yurt uchun qilingan iltijolarga javob berdi.

¹⁵Filistlar bilan Isroil lashkari o‘rtasida yana urush boshlandi. Dovud odamlari bilan Filistlarga qarshi urushga otlandi. Ammo janglar davomida Dovud juda toliqib qoldi.

¹⁶Filist jangchilaridan biri Yishbibano‘v Dovudni o‘ldirmoqchi bo‘ldi. Yishbibano‘v Rafa xalqidan [10] edi. U qo‘lida uchi 750 misqol [11] keladigan bronza nayza ko‘targan, beliga esa yangi qilich bog‘lab olgandi.

¹⁷Zeruya o‘g‘li Abushay [12] Dovudni himoya qilib, o‘sha Filistni mag‘lub qilib o‘ldirdi. Shundan keyin Dovudning odamlari unga: “Endi siz biz bilan birga urushga bormaysiz, toki Isroilning chirog‘i o‘chib qolmasin”, deb aytishdi.

¹⁸Shundan so‘ng Gov shahrida Filistlar bilan yangidan urush boshlandi. Bu urushda Xushalik Sibbaxay degan odam Sof degan odamni o‘ldirdi. Sof Rafa xalqidan edi.

¹⁹Isroil lashkari bilan Filistlar o‘rtasida Govda yana bir marta urush bo‘ldi. Baytlahmlik Elxanon Gatlik [13] Go‘liyotni o‘ldirdi. Elxanon Yovir deganning o‘g‘li edi. Go‘liyot nayzasining sopi to‘quvchining dastgohi xodasiday kelardi.

²⁰So‘ngra yana Gat shahrida urush bo‘ldi. U yerda ham Rafa xalqidan devday bir odam bor edi. Qo‘llari, oyoqlari olti barmoqli edi, hammasi bo‘lib yigirma to‘rtta barmog‘i bor edi.

²¹O‘sha odam Isroil lashkarini haqorat qilgan edi, Yo‘natan uni o‘ldirdi. Yo‘natan Dovudning akasi Shimoning [14] o‘g‘li edi.

²²Dovud va uning odamlari tomonidan o‘ldirilgan o‘sha to‘rtalasi ham Gatlik bo‘lib, Rafa xalqidan edi.