Read O‘zbek tilidagi Muqaddas Kitob, 2013 2 Shohlar 5 Bible Online

2 Shohlar 5 - O‘zbek tilidagi Muqaddas Kitob, 2013 bible

2 Shohlar 5

¹Jamiki Isroil qabilalari Xevronga — Dovudning huzuriga kelib shunday deyishdi: — Biz ham sizning jigaringizmiz.

²Ilgari Shoul shohimiz bo‘lganda ham, urushlarda Isroil lashkariga o‘zingiz bosh bo‘lar edingiz. Egamiz sizga: “Sen xalqim Isroilning cho‘poni bo‘lib, ularni boqasan, Isroilga sen rahnamolik qilasan”, deb va’da bergan edi.

³Shunday qilib, Dovud Xevronda Isroil oqsoqollari bilan Egamiz oldida ahd qildi. Isroil oqsoqollari Dovudning boshiga moy surtib, uni Isroil ustidan shoh qilib ko‘tarishdi.

⁴Dovud o‘ttiz yoshida shoh bo‘lib, qirq yil shohlik qildi.

⁵Xevronda yetti yilu olti oy Yahudo ustidan, Quddusda esa o‘ttiz uch yil butun Isroil va Yahudo ustidan shoh bo‘ldi.

⁶Shoh Dovud odamlari bilan Quddusda yashayotgan Yobus xalqiga qarshi otlanganda, ular Dovudga: “Sen bu yerga kira olmaysan, hatto oramizdagi ko‘rlar bilan cho‘loqlar ham seni orqangga uloqtirib yuboradi”, deyishdi. Yobus xalqi: “Dovud shahrimizni bosib ololmaydi”, deb o‘ylagan edi.

⁷Ammo Dovud Sion qal’asiga [1] bostirib kirib, qal’ani egalladi. Keyinchalik bu qal’aga “Dovud qal’asi”, deb nom berildi.

⁸O‘sha kuni Dovud odamlariga shunday dedi: — Kimki Yobus xalqini yengmoqchi bo‘lsa, shaharga quvur orqali kirib, “cho‘loq” va “ko‘r” Yobuslarga hujum qilsin. Ularni ko‘rgani ko‘zim yo‘q.” Shu sababdan: “Ko‘rlar bilan cho‘loqlar Xudo uyiga kirmaydi”, degan gap paydo bo‘lgan.

⁹Shunday qilib, Dovud qal’ani egallab, bu yerni “Dovud qal’asi”, deb atadi. U Millo degan joydan [2] boshlab butun shahar atrofini devor bilan mustahkamladi.

¹⁰Dovud tobora kuchayib borardi, chunki Parvardigori Olam — Egamiz unga yor edi.

¹¹Tir [3] shohi Xiram Dovudga elchilar jo‘natib, sadr yog‘ochlarini, duradgorlar va tosh teruvchilarni ham yo‘lladi. Ular Dovudga bir saroy qurib berishdi.

¹²Dovud endi bildiki, Egamiz uni Isroil ustidan shoh qilib tayinlagan ekan, Egamiz O‘z xalqining haqi–hurmati uchun uning shohligini yuksaltirgan ekan.

¹³Dovud Xevrondan Quddusga kelgandan keyin, bu yerda yana kanizaklar [4], xotinlar oldi, ulardan yanada ko‘p o‘g‘il–qizlar ko‘rdi.

¹⁴Dovudning Quddusda tug‘ilgan farzandlari quyidagilar edi: Shimo [5], Sho‘vav, Natan, Sulaymon,

¹⁵Yibxar, Elishuva, Nafax, Yofiya,

¹⁶Elishama, Elyodax va Elifalet.

¹⁷Filistlar: “Isroil xalqi Dovudga moy surtib shoh qilishibdi” degan xabarni eshitishdi. Shundan keyin barcha Filist lashkari Dovudni qidirib jangga otlandilar. Dovud bu xabarni eshitib, muhofaza qo‘rg‘oniga chiqdi.

¹⁸Filistlar kelib, Rafa soyligida [6] yoyildilar.

¹⁹Dovud Egamizdan: — Filistlarga hujum qilaymi? Ularni qo‘limga berasanmi? — deb so‘radi [7] — Hujum qil! — deb javob berdi Egamiz Dovudga, — ularni albatta qo‘lingga beraman.

²⁰Shunday qilib, Dovud Baal–Perazimga ketdi va u yerda Filistlarni tor–mor qildi. Keyin shunday dedi: — Suv to‘g‘ondan toshib dalani bosgani singari, Egam g‘animlarimni bosib, oldimdan uloqtirib yubordi. Shu sababdan bu yerga “Baal–Perazim” [8] degan nom berildi.

²¹Filistlar o‘sha yerda butlarini tashlab qochgan edilar, Dovud odamlari bilan o‘sha butlarni olib ketdi.

²²Undan so‘ng Filistlar yana Rafa soyligiga kelib, jangga shay bo‘lib turishdi.

²³Dovud tag‘in Egamizning xohish–irodasini so‘radi. Egamiz esa shunday javob berdi: “Old tomonidan hujum qilma. Ularning orqasiga aylanib o‘tgin–da, mumiyoli daraxtlar tomondan yaqinlashib bor.

²⁴Mumiyoli daraxtlar tepasida qadam tovushlarini eshitganing zahoti ularga hujum qil. O‘shanda Men Filist lashkarini yo‘q qilish uchun sening qarshingdan chiqaman.”

²⁵Dovud, Egamiz amr berganiday qilib, G‘ibodan Gezer shahrigacha bo‘lgan joylarda Filistlarni tor–mor qildi.