Read O‘zbek tilidagi Muqaddas Kitob, 2013 3 Shohlar 15 Bible Online

3 Shohlar 15 - O‘zbek tilidagi Muqaddas Kitob, 2013 bible

3 Shohlar 15

¹Isroil shohi Yeribom hukmronlik qilayotganiga o‘n sakkiz yil bo‘lganda, Abiyo Yahudoga shoh bo‘ldi.

²U Quddusda uch yil shohlik qildi. Onasining ismi Maxo bo‘lib, u Absalomning [1] qizi edi.

³Abiyo ham otasining ilgari qilgan gunohlarini davom ettirdi. U o‘zining Egasi Xudoga chin dildan bog‘langan bobosi Dovud singari emas edi.

⁴Parvardigor Egamiz Dovudning haqi–hurmati uchun Dovuddan keyin uning o‘g‘lini taxtga o‘tqazdi. Shunday qilib, Quddusni mustahkam qilib, shu shaharda unga so‘nmas bir chiroq berdi.

⁵Dovud Egamiz oldida doim to‘g‘ri ish qildi. Umrining oxirigacha, Xet xalqidan bo‘lgan Uriyoga [2] qilgan nomunosib xatti–harakatini hisobga olmaganda, Egamizning amridan zinhor bo‘yin tovlamadi.

⁶Raxabom bilan Yeribom o‘rtasida boshlangan urush Abiyoning umri oxirigacha davom etdi.

⁷Abiyoning boshqa ishlari, butun faoliyati “Yahudo shohlari tarixi” kitobida yozib qoldirilgan. Abiyo bilan Yeribom o‘rtasida urush muttasil davom etgan edi.

⁸Abiyo olamdan o‘tdi. Uni Dovud qal’asida ota–bobolari yoniga dafn qildilar, uning o‘rniga o‘g‘li Oso shoh bo‘ldi.

⁹Yeribom Isroilga hukmronlik qilayotganiga yigirma yil bo‘lganda, Oso Yahudo hukmdori bo‘ldi.

¹⁰U Quddusda qirq bir yil shohlik qildi. Buvisining ismi Maxo bo‘lib, u Absalomning qizi edi.

¹¹Oso, bobosi Dovud kabi, Egamiz oldida to‘g‘ri ishlar qildi.

¹²Sajdagohlardagi fahshbozlarni [3] bu yurtdan quvdi. Ota–bobolari yasagan hamma butlarni yo‘q qildi.

¹³Buvisi Maxo Asheraning makruh tasvirini yasatgan edi, shuning uchun buvisini ham malikalik martabasidan [4] mahrum qildi. Oso buvisi yasagan butni yorib, Qidron soyligida [5] yoqib yubordi.

¹⁴Oso sajdagohlarni yo‘q qila olmagan bo‘lsa–da, umr bo‘yi Egamizga chin ko‘ngildan bog‘landi.

¹⁵Otasi nazr etgan narsalarni ham, o‘zi nazr etgan narsalarni — oltin, kumushlarni, idishlarni ham Egamizning uyiga olib keldi.

¹⁶Oso bilan Isroil shohi Basho umrlarining oxirigacha bir–birlari bilan urishib o‘tdilar.

¹⁷Isroil shohi Basho Yahudoga hujum qildi. Odamlar Yahudo yurtiga osonlikcha kirib chiqa olmasligi uchun, u Rama shahrini [6] mustahkamladi.

¹⁸Oso esa Egamiz uyining xazinasida qolgan hamma oltin va kumushni hamda shoh saroyi xazinalarini oldi. Xazinalarni a’yonlari orqali Oram shohi Banhadad huzuriga jo‘natdi. Xeziyonning nabirasi Banhadad Tavrimmo‘nning o‘g‘li edi. Oso Damashqda o‘tirgan Banhadadga shu gaplarni yetkazishni buyurdi:

¹⁹“Sening otang bilan mening otam o‘rtasida ittifoq bo‘lgani kabi, sen bilan mening o‘rtamda ham ittifoq bo‘lsin. Senga hadya qilib kumush va oltin berib yuboryapman. Isroil shohi Basho bilan ittifoq tuzgan eding, endi o‘shani bekor qil, toki u ro‘paramdan daf bo‘lsin.”

²⁰Banhadad shoh Osoning taklifini qabul qildi, lashkarboshilariga: “Isroil shaharlariga hujum qilinglar”, deb ularni o‘sha yoqqa yubordi. Ular Iyxon, Dan, Ovil–Bayt–Maxo shaharlarini, butun Naftali yerlari bilan birga Jalila ko‘li [7] atroflarini bosib oldilar.

²¹Basho bu voqeani eshitgach, Ramani mustahkamlash fikridan voz kechib, Tirzaga qaytib keldi.

²²Shoh Oso Yahudo xalqining bittasini ham qoldirmay chaqirdi. Ularga Rama shahrini mustahkamlashda Basho ishlatgan tosh va yog‘ochlarni tashittirdi. Oso o‘sha tosh va yog‘ochlar bilan Benyamin yerlaridagi G‘ibo hamda Mispax shaharlarini mustahkamladi.

²³Osoning boshqa ishlari, kahramonliklari, butun faoliyati, mustahkam qilgan shaharlari haqida “Yahudo shohlari tarixi” kitobida yozib qoldirilgan. U ham keksayib, oyoqlari og‘riydigan bo‘lib qoldi.

²⁴Nihoyat, Oso olamdan o‘tib, bobosi Dovudning qal’asida ota–bobolari yoniga dafn qilindi. O‘rniga o‘g‘li Yohushafat shoh bo‘ldi.

²⁵Oso Yahudoda shohlik qilayotganiga ikki yil bo‘lganda, Nadov Isroil shohi bo‘ldi va ikki yil hukmronlik qildi. Nadov Yeribomning o‘g‘li edi.

²⁶U ham Egamiz oldida qabihliklar qildi. Isroilni gunohga botirgan otasidan namuna oldi.

²⁷Issaxor xonadonidan Oxiyo o‘g‘li Basho Nadovga qarshi suiqasd uyushtirib, Filistlarning Gibiton shahrida uni o‘ldirdi. O‘shanda Nadov va butun Isroil lashkari Gibiton shahrini qamal qilib turgan edi.

²⁸Oso Yahudoda uchinchi yili shohlik qilayotganda, Basho Nadovni o‘ldirdi. Basho Nadovning o‘rniga shoh bo‘ldi.

²⁹U shoh bo‘lgandan keyin Yeribomning butun oilasini bitta qo‘ymay qirib tashladi. Shunday qilib, Egamizning o‘z quli, Shilo‘lik Oxiyo [8] orqali aytgan so‘zlari [9] bajo bo‘ldi.

³⁰Yeribomning o‘zi ham gunoh qilib, Isroil xalqini ham gunohga botirib, Isroil xalqining Xudosi — Egamizni g‘azablantirgani uchun, shu voqealar yuz berdi.

³¹Nadovning boshqa ishlari, butun faoliyati “Isroil shohlari tarixi” kitobida yozib qoldirilgan.

³²Oso bilan Isroil shohi Basho umrlarining oxirigacha bir–biri bilan urishib o‘tdilar.

³³Yahudo shohi Oso shohlik qilayotganiga uch yil bo‘lganda, Basho Tirzada butun Isroil xalqi ustidan hukmdor bo‘ldi va yigirma to‘rt yil shohlik qildi.

³⁴U ham Yeribomning yo‘lidan ketib, Egamiz oldida qabihliklar qilib, Isroilni gunohga botirdi.