Read O‘zbek tilidagi Muqaddas Kitob, 2013 3 Shohlar 21 Bible Online

3 Shohlar 21 - O‘zbek tilidagi Muqaddas Kitob, 2013 bible

3 Shohlar 21

¹Voqealar ketidan voqealar yuz beraverdi. Yizril shahrida, Samariya shohi Axabning saroyi yonida shu yerlik Navo‘t degan odamning uzumzori bor edi.

²— Uzumzoringni menga ber, men u yerni poliz qilaman, — dedi Axab Navo‘tga. — Uzumzoring mening uyimga yaqin. O‘sha joyning o‘rniga men senga undan ham yaxshiroq uzumzor beraman. Istasang, bahosini ayt, kumush berayin.

³— Otalarimdan qolgan merosni [1] sizga beramanmi?! Xudo saqlasin, — javob qaytardi Navo‘t Axabga.

⁴Yizrillik Navo‘tning: “Otalarimdan qolgan merosni sizga beramanmi?!” degan gapidan Axab g‘azablandi, xafahol uyiga keldi. Non ham yemay o‘ringa kirib, teskari qarab yotaverdi.

⁵Xotini Izabel Axabning yoniga kelib, undan: “Nega ruhingiz tushkun, non ham yemadingiz?” deb so‘radi.

⁶Axab bo‘lib o‘tgan voqeani aytib berdi: — Yizrillik Navo‘tga: “Uzumzoringni menga sot, kumush beraman, yoki istasang uning o‘rniga senga boshqa uzumzor beray”, desam, u: “Uzumzorimni sizga bermayman”, deb javob qildi.

⁷— Siz Isroil shohimisiz o‘zi?! — dedi Izabel Axabga. — Turing o‘rningizdan, non–pon yeb oling. Ko‘nglingizni chog‘ qilavering. Yizrillik Navo‘tning uzumzorini sizga men olib beraman.

⁸Izabel Axab nomidan maktublar yozdi, Axabning muhri bilan tasdiqladi. Maktublarni Navo‘t yashayotgan shaharning oqsoqollariga, aslzodalariga yubordi.

⁹Maktub quyidagi mazmunda bitilgan edi: “Ro‘za e’lon qilinglar. Hammani to‘plab, Navo‘tni ularning oldiga o‘tqazib qo‘yinglar.

¹⁰Uning ro‘parasiga ikkita yaramas odamni turg‘izib qo‘yinglar. Ular: “Ey, Navo‘t, sen Xudoni va shohni haqorat qilding”, deb guvohlik bersinlar. Keyin uni tashqariga olib chiqib, toshbo‘ron qilib o‘ldiringlar.”

¹¹Navo‘t istiqomat qiladigan shahardagi odamlar, aslzodalar va oqsoqollar hammasini Izabel buyurganiday qildilar.

¹²Avval ro‘za e’lon qildilar. Keyin xalqni to‘plab, Navo‘tni xalqning oldiga o‘tqazdilar.

¹³Ikkita [2] yaramas odam kelib, Navo‘tning ro‘parasiga o‘tirdi. Ular xalqning oldida: “Navo‘t Xudoni va shohni haqorat qildi” [3], deb Navo‘tga ayb qo‘yishdi. Shundan so‘ng Navo‘tni shahar tashqarisiga olib chiqib, toshbo‘ron qilib o‘ldirdilar.

¹⁴Oqsoqollar va aslzodalar: “Navo‘t toshbo‘ron qilib o‘ldirildi”, deb Izabelga xabar berdilar.

¹⁵Izabel Navo‘tning toshbo‘ron qilib o‘ldirilganini eshitgan zamon Axabga dedi: — Yizrillik Navo‘t uzumzorini sizga kumushga ham sotmagan edi. Boring endi, uning o‘sha uzumzorini o‘zingizning mulkingizga qo‘shib oling. Navo‘t endi yo‘q. U o‘libdi.

¹⁶Axab Navo‘tning o‘ldirilganini eshitdiyu: “Tezroq borib, Yizrillik Navo‘tning uzumzorini o‘zimga mulk qilib olay”, deb harakatga tushdi.

¹⁷O‘sha payt Tishba shahridan bo‘lgan Ilyosga Egamiz shu so‘zlarni ayon qilgan edi:

¹⁸“Bor, Samariyada o‘tirgan Isroil shohi Axabni kutib olish uchun chiq. U hozir Navo‘tning uzumzorida, o‘sha uzumzorni o‘ziga mulk qilib olmoqchi bo‘lib, u yerga keldi.

¹⁹Axabga shu gaplarni yetkaz: — Egam shunday aytmoqda: Navo‘tni o‘ldirib uning mulkini o‘zingga olmoqchimisan?! Navo‘tning qonini ko‘ppaklar yalagan yerda sening qoningni ham ko‘ppaklar yalaydi.”

²⁰— Ha, dushmanim, meni bu yerga ham topib keldingmi? — dedi Axab Ilyosga. — Ha, topib keldim, — dedi Ilyos, — sen Egamiz oldida qabihliklarga rosa mukkangdan ketding.

²¹Egamizning gapi shunday: “Boshingga balo yog‘diraman, seni ildizingdan quritaman. Isroildagi senga qarashli erkak zotini, hoh qul bo‘lsin, hoh ozod bo‘lsin, qirib tashlayman.

²²Isroilni gunohga botirib, Egamizni g‘azablantirganing uchun sening xonadoningni Nabat o‘g‘li Yeribomning xonadoni ko‘yiga, Oxiyo o‘g‘li Bashoning xonadoni ko‘yiga solaman.”

²³Egamiz Izabel haqida ham aytdi: “Yizril devori ichkarisida Izabel ko‘ppaklarga yem bo‘lar.

²⁴Axabga qarashli shaharda vafot etgan odam ko‘ppaklarga yem bo‘lar, qirda vafot etgan odami ko‘kdagi qushlarga yem bo‘lar.”

²⁵Shu paytgacha hech kim Axab singari Egamiz oldida qabihliklarga mukkasidan ketmagan edi. Xotini Izabel esa uni gijgijlab turar edi.

²⁶Axab, Amor xalqi singari, butlarga ergashib, ko‘p qabihliklar qilgan edi. Amor xalqini esa gunoh ishlari uchun Egamiz u yurtdan haydab, yurtni Isroil xalqiga bergan edi.

²⁷Axab Ilyosning aytganlarini eshitib, qayg‘udan kiyimlarini yirtdi, egniga qanor ilib oldi, ro‘za tutdi, qanor kiyib uxladi [4], doimo g‘amgin yurdi.

²⁸Shundan keyin Ilyosga Egamiz shu so‘zlarni ayon qildi:

²⁹“Ko‘rdingmi, Axab tavba qilib, Mening oldimda qanday mo‘min bo‘lib qoldi! U Menga itoat qilgani uchun, u barhayot ekan, boshiga balo keltirmayman. O‘g‘li shoh bo‘lgandan so‘ng, uning xonadoniga balo–qazo yog‘diraman.”