Read O‘zbek tilidagi Muqaddas Kitob, 2013 3 Shohlar 6 Bible Online

3 Shohlar 6 - O‘zbek tilidagi Muqaddas Kitob, 2013 bible

3 Shohlar 6

¹Isroil xalqi Misr yurtidan chiqqanlariga 480 yil bo‘lganda, Sulaymon Isroil taxtiga o‘tirganiga to‘rt yil bo‘lgan edi [1]. U o‘sha yilning ikkinchi oyida — Ziv oyida [2]Egamizning uyini barpo qilishni boshladi.

²Shoh Sulaymon Egamiz uchun qurayotgan uyning uzunligi 60 tirsak [3], eniga 20 tirsak, balandligi 30 tirsak edi.

³Egamiz uyining asosiy xonasi oldida ayvon bo‘lib, ayvonning uzunligi asosiy xonaning eni bilan bir o‘lchovda — 20 tirsak, eni 10 tirsak edi.

⁴Uyga panjarali derazalar ham yasattirdi.

⁵Uyning tashqaridagi devorining yoniga va orqasiga uch qavatli yon xonalar qurdirdi.

⁶Birinchi qavatning kengligi 5 tirsak, ikkinchi qavatning kengligi 6 tirsak, uchinchi qavatning kengligi 7 tirsak edi. Sulaymon uyning devorlarini, yon xonalarning hajmiga moslab, zinapoya shaklida qurdirdi. Shu sababdan yon xonalar uyning devoriga taqalmagan edi.

⁷Uy qurilishi uchun toshlardan foydalanildi. Toshlar konning o‘zida yo‘nib tayyorlandi. Shu sababdan uy qurilayotganda, na bolg‘a, na bolta, na biror temir asbob ovozi eshitildi.

⁸O‘rta qavatdagi yon xonaning eshigi uyning janub tomonida edi: aylanma zinapoya orqali o‘rta qavatga, o‘rta qavatdan esa uchinchisiga chiqilardi.

⁹Shunday qilib, Sulaymon uyning devorlarini qurib bitkazdi. So‘ng uyning tomini sadr daraxtidan qilingan to‘sinlar va taxtalar bilan yopdi.

¹⁰Uyning aylanasi bo‘ylab qurilgan yon xonalarning har bir qavatining balandligi 5 tirsak edi. To‘sinlar yon xonalar bilan uyning devorini bog‘lab turardi.

¹¹Egamiz Sulaymonga shu so‘zlarni ayon qildi:

¹²— Mana, sen uyni quryapsan. Agar Mening farmonlarimga ko‘ra yursang, qonun–qoidalarimga rioya etsang, hamma amrlarimga itoat qilsang, o‘shanda otang Dovudga bergan va’dalarimni sen orqali bajaraman.

¹³Har doim Isroil xalqi orasidan maskan qilaman, xalqim Isroilni aslo tark etmayman.

¹⁴Shunday qilib, Sulaymon Xudoning uyini qurib bo‘ldi.

¹⁵Sulaymon Egamiz uyining devori ichkarisini yerdan shiftiga qadar sadr yog‘ochidan qilingan taxta bilan qoplatdi. Polini sarv yog‘ochi taxtasidan qildi.

¹⁶Ichki xona uyning ichkarisiga qurilgan bo‘lib, yerdan shiftiga qadar sadr yog‘ochi bilan ajratilgan edi. Bu xona Eng muqaddas xona, deb ataldi. Bu xonaning bo‘yi 20 tirsak chiqardi.

¹⁷Uyning asosiy xonasi 40 tirsak bo‘lib, Eng muqaddas xonaning old tomonida edi.

¹⁸Uyning ichkarisi sadr taxtalari bilan qoplanib, taxtalarga qovoq va ochilib turgan gullar surati shunday o‘yilgan ediki, devor toshlari ko‘rinmas edi.

¹⁹Eng muqaddas xona Egamizning ahd sandig‘ini qo‘yish uchun hozirlangan edi.

²⁰O‘sha xonaning uzunligi ichki tarafdan 20 tirsak, kengligi 20 tirsak, balandligi ham 20 tirsak edi. Sulaymon bu xonani toza oltin bilan qoplatdi. Sadr yog‘ochidan yasalgan tutatqi qurbongohini ham oltin bilan qoplatdi [4].

²¹Sulaymon uyning asosiy xonasini ham oltin bilan qoplatdi. Oltin bilan qoplangan Eng muqaddas xonaning old tomoniga oltin zanjirlar torttirdi.

²²Shunday qilib, Sulaymon uyning hamma joyini boshdan oxirigacha oltin bilan qoplatdi. Eng muqaddas xonaning kiraverishidagi tutatqi qurbongohini ham tamomila oltin bilan qopladi.

²³So‘ng Eng muqaddas xonaga qo‘yish uchun zaytun daraxti yog‘ochidan ikkita karub yasattirdi. Karublarning balandligi 10 tirsak edi.

²⁴Karublarning qanotlari 5 tirsakdan edi. Qanotlarning u uchidan bu uchigacha hammasi bo‘lib 10 tirsak chiqardi.

²⁵Har ikkala karubning shakli, hajmi bir edi.

²⁶Har bir karubning balandligi 10 tirsak edi.

²⁷Sulaymon karublarni Eng muqaddas xonaga yonma–yon qo‘ydi. Karublarning qanotlari cho‘zilib ketgan, birining qanoti bir devorga, ikkinchisining qanoti esa narigi devorga tegib turardi. Uyning o‘rtasida esa ikkovining qanotlari bir–biriga tutashardi.

²⁸Sulaymon karublarni ham toza oltin bilan qoplatdi.

²⁹Ikkala xonaning devoriga gir aylanasi bo‘ylab karublar, palma daraxtlari, ochilib turgan gullarning suratini o‘ydirdi.

³⁰Bu xonalarning polini ham oltin bilan qoplatdi.

³¹Eng muqaddas xonaning kirish joyiga zaytun yog‘ochidan ikki tavaqali eshik yasattirdi. Eshikning kesakisi [5] besh qirrali edi.

³²Zaytun yog‘ochidan yasalgan ikki tavaqali eshikka karublar, palma daraxtlari, ochilib turgan gullar suratini o‘ydirdi, so‘ng eshik ustini, karublar va palma daraxtlari suratini ham oltin bilan qoplatdi.

³³Asosiy xonaning kiraverishidagi to‘rt burchakli kesakini zaytun yog‘ochidan,

³⁴ikkita eshikni sarv daraxti yog‘ochidan yasadi. Eshiklarning har biri ikki tavaqali, yig‘ma edi.

³⁵Eshiklarning yuzasiga ham karublar, palma daraxti, ochilib turgan gullar suratini o‘ydirib, ularni oltin bilan bir tekis qilib qoplatdi.

³⁶Ichki hovli devorlarining uch qatorini taroshlangan toshdan, bir qatorini sadr yog‘ochidan qildi.

³⁷Egamiz uyining poydevori Sulaymon hukmronligining to‘rtinchi yilida — Ziv oyida [6] qo‘yilib,

³⁸o‘n birinchi yilning sakkizinchi oyida — Bul oyida [7] loyihaga binoan batamom, hamma ikir–chikirigacha qurib bitkazildi. Shunday qilib, Sulaymon uyni yetti yil davomida bunyod qildi.