Read O‘zbek tilidagi Muqaddas Kitob, 2013 1 Solnomalar 13 Bible Online

1 Solnomalar 13 - O‘zbek tilidagi Muqaddas Kitob, 2013 bible

1 Solnomalar 13

¹Dovud har bir lashkarboshi — mingboshi va yuzboshi bilan maslahatlashdi.

²[2-3] So‘ng butun Isroil jamoasiga dedi: “Shoh Shoul davrida biz Xudoyimizning ahd sandig‘iga e’tiborsiz bo‘lib keldik. Bordi–yu, siz buni lozim topsangiz va bunga Egamiz Xudoning irodasi bo‘lsa, kelinglar, ahd sandig‘ini qaytarib olib kelaylik. Buning uchun butun Isroil bo‘ylab xabar jo‘natib yurtdagi jamiki qarindosh–urug‘larimizni shu yerga yig‘aylik, o‘z shaharlarida yashaydigan ruhoniyu levilar ham oldimizga yig‘ilib kelishsin.”

⁴Butun jamoaga bu taklif ma’qul tushib, hamma taklifga rozi bo‘ldi.

⁵Shunday qilib, Dovud Xudoning sandig‘ini Xirat–Yorimdan Quddusga olib kelish uchun butun yurtdagi — Misrdagi Shixor daryosidan tortib, to shimoldagi Levo–Xomat shahriga qadar bo‘lgan joylardagi jamiki Isroil xalqini to‘pladi.

⁶Ular birgalikda Xudoning ahd sandig‘ini olib kelish uchun Yahudodagi Baalax, ya’ni Xirat–Yorim shahriga yo‘l olishdi. Ahd sandig‘i ikki karub uzra taxt qurgan Egamizning nomi bilan atalgan edi.

⁷Xudoning sandig‘i Abunadovning uyida edi. Sandiq yangi arava ustiga ortilgach, Uzzox bilan Oxyo aravani haydab ketishdi.

⁸Dovud va jamiki Isroil xalqi Xudoning huzurida berilib, o‘yin–kulgi qilayotgan edilar. Ular lira, arfa, childirma, zang va karnaylar chalib, qo‘shiklar bilan bu voqeani bayram qilayotgan edilar.

⁹Ular Xidon degan odamning xirmoniga yetganlarda, ho‘kizlar qoqilib ketdi. Uzzox sandiqni ushlab qolmoqchi bo‘lib qo‘lini uzatdi.

¹⁰Lekin Uzzox hurmatsizlik qilgani uchun, Egamiz undan g‘azablandi. Uzzoxni urib, jonini oldi. Uzzox o‘sha yerda — Xudoning oldida jon berdi.

¹¹Egamiz Uzzoxni urgani uchun, Dovud qattiq g‘azablandi. O‘sha kundan buyon shu joy “Paraz–Uzzox”, deb aytiladi.

¹²Dovud o‘sha kuni Xudodan qo‘rqib: “Qanday qilib Xudoning sandig‘ini o‘zim bilan olib kela olar ekanman?” deb o‘yladi.

¹³U sandiqni o‘zi bilan Dovud qal’asiga olib bormay, uni Gatlik Obidadomning uyiga tashlab ketdi.

¹⁴Xudoning sandig‘i u yerda uch oy turdi. Obidadomning xonadoniga va jamiki mol–mulkiga Egamiz baraka berdi.